વર્લ્ડ કપ સુપર-8 પહેલા ભારતની 5 મોટી નબળાઈઓ

ટી-20 વર્લ્ડ કપ 2026 ના ગ્રુપ સ્ટેજમાં ભારતીય ટીમે શાનદાર પ્રદર્શન કરતા સતત ચાર જીત મેળવી છે. શાનદાર નેટ રન રેટ સાથે ભારત હવે સુપર-8 માં પ્રવેશ્યું છે. જોકે, આ સફળતાની પાછળ કેટલીક એવી ગંભીર નબળાઈઓ પણ સામે આવી છે, જે દક્ષિણ આફ્રિકા અને વેસ્ટ ઈન્ડિઝ જેવી મજબૂત ટીમો સામે ભારત માટે જોખમી સાબિત થઈ શકે તેમ છે.

1. ઓપનિંગ જોડીનું કથળતું ફોર્મ : 

ટૂર્નામેન્ટમાં ભારત માટે સૌથી મોટી ચિંતા અભિષેક શર્માનું ફોર્મ છે. આક્રમક બેટિંગ માટે જાણીતો અભિષેક અપેક્ષા મુજબનું પ્રદર્શન કરી શક્યો નથી. અમેરિકા સામે તે શૂન્ય રને આઉટ થયો હતો. છેલ્લા કેટલાક સમયથી તે સતત વહેલો પેવેલિયન ભેગો થઈ રહ્યો છે, જેના કારણે મિડલ ઓર્ડર પર દબાણ વધી રહ્યું છે.

2. મધ્યક્રમમાં રનની ધીમી ગતિ : 

ટીમમાં ત્રીજા નંબરે બેટિંગ કરતા તિલક વર્મા હાલમાં સંઘર્ષ કરી રહ્યા છે. નેધરલેન્ડ અને પાકિસ્તાન સામેની મેચોમાં તેની ધીમી ઇનિંગ્સને કારણે ટીમ મોટો સ્કોર કરવામાં નિષ્ફળ રહી છે. સુપર-8 જેવી મહત્વની મેચોમાં પાવરપ્લે બાદ રન રેટ જાળવી રાખવો ભારત માટે મોટો પડકાર છે.

3. સ્પિનરો સામે બેટ્સમેનોની લાચારી : 

ભારતીય બેટ્સમેનો પરંપરાગત રીતે સ્પિન સામે સારા ગણાય છે, પરંતુ આ વર્લ્ડ કપમાં વાર્તા કંઈક અલગ છે. અમેરિકા અને નામીબિયા જેવી ટીમોના સ્પિનરોએ પણ ભારતીય સ્ટાર બેટ્સમેનોને મુશ્કેલીમાં મૂક્યા છે. આ નબળાઈ આગામી મેચોમાં ભારતને ભારે પડી શકે છે.

4. ડેથ ઓવર્સમાં રન રોકવામાં નિષ્ફળતા : 

બોલિંગની વાત કરીએ તો શરૂઆતની ઓવરોમાં ભારત મજબૂત છે, પરંતુ છેલ્લી ઓવરોમાં બોલરો રન લુટાવી રહ્યા છે. નેધરલેન્ડ જેવી ટીમે છેલ્લી ચાર ઓવરમાં મોટી સંખ્યામાં રન બનાવ્યા હતા. મજબૂત ટીમો સામે ડેથ ઓવર્સમાં ચોકસાઈપૂર્વકની બોલિંગ ખૂબ જ જરૂરી છે.

5. ફિલ્ડિંગમાં જોવા મળતી બેદરકારી : 

જીત વચ્ચે પણ ટીમની ફિલ્ડિંગમાં ખામીઓ સ્પષ્ટ દેખાય છે. પાકિસ્તાન અને નેધરલેન્ડ જેવી મેચોમાં ભારતે મહત્વના કેચ છોડ્યા હતા. સુપર-8 માં જો આવી ભૂલો થશે, તો મેચનું પરિણામ બદલાઈ શકે છે.

સુપર-8 નું શિડ્યુલ : 

ભારત હવે 21 ફેબ્રુઆરીથી સુપર-8 ના અભિયાનની શરૂઆત કરશે. ટીમની ટક્કર દક્ષિણ આફ્રિકા (22 ફેબ્રુઆરી), વેસ્ટ ઈન્ડિઝ અને ઝિમ્બાબ્વે સામે થશે. સૂર્યકુમાર યાદવની કેપ્ટનશિપ હેઠળ ટીમે આ ખામીઓ પર વહેલી તકે કામ કરવું પડશે.