Hardik Pandya IPL Trade Rumors: IPL 2026 ની સીઝન સમાપ્ત થયા બાદ ભારતીય ક્રિકેટ જગતમાં સ્ટાર ઓલરાઉન્ડર હાર્દિક પંડ્યાના ભવિષ્યને લઈને જોરદાર ચર્ચાઓ ચાલી રહી છે. સોશિયલ મીડિયા અને વિવિધ મીડિયા અહેવાલોમાં દાવો કરવામાં આવી રહ્યો હતો કે પાંચ વખતની ચેમ્પિયન મુંબઈ ઇન્ડિયન્સ (MI) અને ચેન્નઈ સુપર કિંગ્સ (CSK) વચ્ચે હાર્દિક પંડ્યાના ટ્રેડિંગ અંગેની વાટાઘાટો અંતિમ તબક્કામાં પહોંચી ગઈ છે. જો કે, ક્રિકેટ ચાહકોમાં ચાલી રહેલી આ અટકળો વચ્ચે હવે બંને મોટી ફ્રેન્ચાઇઝીઓએ સત્તાવાર નિવેદનો જાહેર કરીને પોતાનું વલણ સંપૂર્ણપણે સ્પષ્ટ કરી દીધું છે અને આ અહેવાલોને નકારી કાઢ્યા છે.
સીએસકેના સીઇઓનો ખુલાસો આ મામલે ચેન્નઈ સુપર કિંગ્સના સીઈઓ (CEO) કાસી વિશ્વનાથને સ્પષ્ટતા કરતા જણાવ્યું છે કે હાર્દિક પંડ્યાને ટીમમાં સામેલ કરવા અંગે હાલમાં ફ્રેન્ચાઇઝી સમક્ષ કોઈ સત્તાવાર પ્રસ્તાવ આવ્યો નથી. તેમણે ઉમેર્યું કે હાલમાં યુએસએમાં રમાઈ રહેલી મેજર લીગ ક્રિકેટ (MLC) ના કારણે સીએસકે મેનેજમેન્ટે હજુ સુધી તેની ગત આઇપીએલ સીઝનની આંતરિક સમીક્ષા પ્રક્રિયા પૂર્ણ કરી નથી. આ વાર્ષિક સીઝન સમીક્ષા પૂર્ણ થયા બાદ જ મેનેજમેન્ટ નક્કી કરશે કે આગામી ટ્રેડ વિન્ડોમાં કયા ખેલાડીઓ માટે ચર્ચા કરવી કે કઈ પોઝિશન પર નવા ખેલાડીઓની જરૂર છે.
મુંબઈ ઇન્ડિયન્સમાં મોટી બેઠકોનો દોર બીજી તરફ, મુંબઈ ઇન્ડિયન્સે પણ ટ્રેડિંગની વાતોને પાયાવિહોણી ગણાવી છે. રિલાયન્સ ઇન્ડસ્ટ્રીઝ લિમિટેડ (RIL) ની વાર્ષિક સામાન્ય સભા (AGM) પૂર્ણ થયા બાદ મુંબઈ ઇન્ડિયન્સ મેનેજમેન્ટે લાંબી સમીક્ષા બેઠક શરૂ કરી છે. આ વર્ષની સમીક્ષા પાછલા વર્ષો કરતા વધુ વ્યાપક અને વિગતવાર થવાની અપેક્ષા છે. મુંબઈ ઇન્ડિયન્સના પ્રવક્તાના જણાવ્યા અનુસાર, ટીમ હાલમાં કોઈ ખેલાડીના વેપાર માટે વાટાઘાટો કરી રહી નથી. આ પોસ્ટ-સીઝન સમીક્ષા દરમિયાન માત્ર ખેલાડીઓના પ્રદર્શનનું જ નહીં, પરંતુ સમગ્ર સપોર્ટ સ્ટાફ અને મુખ્ય કોચના રિપોર્ટનું પણ મૂલ્યાંકન કરવામાં આવશે. તમામ પાસાઓનો કાળજીપૂર્વક વિચાર કર્યા પછી જ મેનેજમેન્ટ અંતિમ નિર્ણય લેશે.
IPL 2027 માં હાર્દિક પંડ્યાને ખરીદવા રેસમાં ઉતરી શકે છે આ મોટી ટીમો અહેવાલો અનુસાર, હાર્દિક પંડ્યા અને મુંબઈ ઈન્ડિયન્સના હાઈ-લેવલ મેનેજમેન્ટ વચ્ચે આંતરિક સ્તરે વાતો ચોક્કસ થઈ છે, પરંતુ બંને પક્ષે હજુ સુધી ઓફિશિયલ માહિતી શેર કરી નથી. આનો અર્થ એ થાય કે હાર્દિક માટે સીએસકેનો સોદો અત્યારે નકારી શકાય નહીં, પણ તેના માટે કોઈ ઉતાવળ પણ નથી. જો ભવિષ્યમાં હાર્દિક પંડ્યા આઇપીએલ 2027 ની મેગા ઓક્શન પહેલા ટ્રેડ વિન્ડોમાં ઉપલબ્ધ થાય છે, તો માત્ર ચેન્નઈ સુપર કિંગ્સ જ નહીં પરંતુ કોલકાતા નાઈટ રાઇડર્સ, રાજસ્થાન રોયલ્સ અને દિલ્હી કેપિટલ્સ પણ તેને પોતાની ટીમમાં લેવા માટે એડીચોટીનું જોર લગાવી શકે છે. જો કે, સૌથી મોટો પ્રશ્ન એ છે કે શું મુંબઈ ઇન્ડિયન્સને હાર્દિકના બદલામાં અન્ય કોઈ ટીમ પાસેથી એવું મજબૂત પ્લેયર પેકેજ મળશે જે ફ્રેન્ચાઇઝીને સંતોષ આપી શકે. આ સમગ્ર ચિત્ર સ્પષ્ટ થવામાં હજુ થોડો સમય લાગશે.

અફવાઓ વચ્ચે ચેન્નઈ સુપર કિંગ્સ અને મુંબઈ ઇન્ડિયન્સે તોડ્યું મૌન

July 2, 2026 | 12:12 IST