ટી20 વર્લ્ડ કપના સુપર-8 મુકાબલામાં દક્ષિણ આફ્રિકા સામે મળેલી હાર બાદ ભારતીય ટીમમાં ખળભળાટ મચી ગયો છે. 188 રનના વિશાળ લક્ષ્યાંકનો પીછો કરતી વખતે ભારતીય બેટ્સમેનોએ જે રીતે હથિયાર હેઠા મૂકી દીધા, તેનાથી ક્રિકેટ જગતના દિગ્ગજો નારાજ છે. ખાસ કરીને ત્રીજા ક્રમે બેટિંગ કરવા આવેલા તિલક વર્માના વલણ અને તેના શૉટ સિલેક્શન પર પૂર્વ કેપ્ટન સુનીલ ગાવસ્કરે ગંભીર સવાલો ઉઠાવ્યા છે.
ગાવસ્કરનો આક્રોશ: તિલક વર્માએ જવાબદારી સમજવી જોઈતી હતી
અમદાવાદમાં રમાયેલી આ મેચમાં જ્યારે ઈશાન કિશન વહેલી વિકેટ ગુમાવીને પેવેલિયન પરત ફર્યો, ત્યારે તિલક વર્મા પાસે અપેક્ષા હતી કે તે પારીને સંભાળશે. જોકે, તિલક માત્ર 1 રન બનાવીને માર્કો જાનસેનની જાળમાં ફસાઈ ગયો હતો. સુનીલ ગાવસ્કરે આ અંગે ટિપ્પણી કરતા જણાવ્યું કે તિલક એક પ્રતિભાશાળી બેટ્સમેન હોવા છતાં તેનો અભિગમ અત્યંત નિરાશાજનક હતો. જ્યારે રન રેટ કાબૂમાં હતો, ત્યારે ક્રિઝ પર સમય પસાર કરવાને બદલે હવામાં ફટકો મારી વિકેટ ફેંકી દેવી તે ટીમ માટે નુકસાનકારક સાબિત થયું. અભિષેક શર્મા સંઘર્ષ કરી રહ્યો હતો ત્યારે તિલકે પાવરપ્લેમાં મજબૂત ભાગીદારી નોંધાવવાની જરૂર હતી.
આંકડામાં મોટો તફાવત: તિલકનું કથળતું ફોર્મ
સાઉથ આફ્રિકા સામે ભૂતકાળમાં તિલક વર્માનો રેકોર્ડ શાનદાર રહ્યો છે. તેણે આ ટીમ સામે અગાઉ 70 થી વધુની સરેરાશથી રન બનાવ્યા હતા, જેમાં બે શાનદાર સદીઓનો પણ સમાવેશ થાય છે. પરંતુ વર્તમાન વર્લ્ડ કપમાં તેનું બેટ જાણે શાંત થઈ ગયું હોય તેમ લાગે છે. ચાલુ ટૂર્નામેન્ટની પાંચ મેચોમાં તે માત્ર 107 રન જ બનાવી શક્યો છે. તેની આ નિષ્ફળતાને કારણે મધ્યમ ક્રમ પર દબાણ વધી રહ્યું છે, જે ટીમ ઈન્ડિયા માટે ચિંતાનો વિષય છે.
શું સંજુ સેમસનની થશે એન્ટ્રી ?
ભારતીય ટોપ ઓર્ડરની સતત નિષ્ફળતાને જોતા હવે પ્લેઈંગ ઈલેવનમાં મોટા ફેરફારના સંકેતો મળી રહ્યા છે. ટીમના સહાયક કોચ રયાન ટેન ડોશેટે પણ આ બાબતે ઈશારો કર્યો છે. આગામી નિર્ણાયક મેચોમાં તિલક વર્માના સ્થાને સંજુ સેમસનને તક આપવામાં આવી શકે છે. સેમસને તાજેતરમાં નામિબિયા સામે આક્રમક બેટિંગ કરીને ફોર્મમાં હોવાના પુરાવા આપ્યા હતા. ભારત માટે હવે સેમીફાઈનલની રેસમાં ટકી રહેવા માટે ઝિમ્બાબ્વે અને વેસ્ટ ઈન્ડિઝ સામે જીત મેળવવી અનિવાર્ય છે.
ટીમ મેનેજમેન્ટ માટે મોટી કસોટી :&nbsp;
કેપ્ટન સૂર્યકુમાર યાદવ અને કોચિંગ સ્ટાફ માટે હવે યોગ્ય બેટિંગ ઓર્ડર નક્કી કરવો પડકારજનક રહેશે. શું ટીમ મેનેજમેન્ટ તિલક વર્મા પર ફરી વિશ્વાસ બતાવશે કે પછી સંજુ સેમસન જેવા અનુભવી ખેલાડીને મેદાનમાં ઉતારશે, તે આવનારી મેચમાં સ્પષ્ટ થશે. ભારતનો આગામી મુકાબલો ચેન્નાઈમાં થવાનો છે, જ્યાં સ્પિનરોની ભૂમિકા મહત્વની રહેશે.

તિલક વર્મા ફ્લોપ સુનીલ ગાવસ્કર

શું હવે તિલક વર્માના સ્થાને સંજુ સેમસનને મળશે પ્લેઈંગ-11માં તક?

February 23, 2026 | 15:15 IST