ટીમ ઈન્ડિયાનો ઝડપી બોલર હર્ષિત રાણા છેલ્લા કેટલાક સમયથી તેના ખરાબ પ્રદર્શન અને ટીકામાં સ્થાન મળવાને કારણે સતત ટીકાઓનો સામનો કરી રહ્યો છે. કેટલાક લોકો માને છે કે, રાણા ભારતીય ટીમના મુખ્ય કોચ ગૌતમ ગંભીરનો નજીકનો હોવાથી તેને ટીમમાં સ્થાન મળી રહ્યું છે. જોકે, આ આક્ષેપો વચ્ચે રાણાના બાળપણના કોચ શ્રવણે એક મોટો ખુલાસો કર્યો છે.
ગંભીરે રાણાને આપી હતી ધમકી
કોચ શ્રવણે જણાવ્યું કે ગૌતમ ગંભીરે હર્ષિત રાણાને ઠપકો પણ આપ્યો હતો અને સ્પષ્ટ શબ્દોમાં ચેતવણી આપી હતી કે, "પ્રદર્શન કર નહીંતર હું તને બહાર મોકલી દઈશ." આનાથી સ્પષ્ટ થાય છે કે ટીમમાં સ્થાન ટકાવી રાખવા માટે ખેલાડીનું પ્રદર્શન જ અંતિમ માપદંડ છે.
શ્રવણે વધુમાં જણાવ્યું કે, "હું જાણું છું કે કેટલાક ક્રિકેટરો કહે છે કે તેઓ ગંભીરની નજીક છે, પરંતુ ગંભીરને ખબર છે કે, ટેલેન્ટને કેવી રીતે ઓળખવી છે અને પછી તે તેમનો સાથે આપે છે." તેમણે ઉમેર્યું કે ગંભીરે અગાઉ પણ ઘણા ક્રિકેટરોને સપોર્ટ કર્યો છે, જેમણે ટીમ માટે સારું પ્રદર્શન કર્યું છે.
ટીકાઓથી દબાણ અનુભવી રહ્યો હતો રાણા
કોચ શ્રવણે ખુલાસો કર્યો કે સિડનીમાં અંતિમ વન-ડે મેચ પહેલા હર્ષિત રાણા દબાણ અનુભવી રહ્યો હતો. શ્રવણે જણાવ્યું કે રાણાએ તેમને ફોન કરીને કહ્યું હતું કે તે તેના પ્રદર્શનના આધારે જે ટીકાનો સામનો કરી રહ્યો હતો તેને રોકવા માંગે છે. કોચે તેને ફક્ત પોતાના પર વિશ્વાસ રાખવા કહ્યું હતું.
નોંધનીય છે કે રાણાએ સિડનીમાં રમાયેલી અંતિમ વન-ડેમાં મહત્ત્વની ભૂમિકા ભજવી હતી, જ્યાં તેણે ચાર વિકેટ લઈને ઓસ્ટ્રેલિયાને 236 રનમાં ઓલઆઉટ કરવામાં મદદ કરી હતી. ભારતે આ મેચ જીતીને સીરિઝને ક્લીન સ્વીપ થતી બચાવી હતી, અને રાણાએ પોતાના પ્રદર્શનથી ટીકાકારોને જવાબ આપ્યો હતો.

હર્ષિત રાણાના પર્ફોરમન્સ પર મોટો ખુલાસો

બાળપણના કોચનો ખુલાસો: 'પ્રદર્શન કર નહીંતર હું તને બહાર મોકલી દઈશ'

October 26, 2025 | 16:31 IST