KKRને મોટો ઝટકો: હર્ષિત રાણા IPL 2026માંથી બહાર

ઇન્ડિયન પ્રીમિયર લીગની આગામી સિઝન શરૂ થવાને હવે ગણતરીના દિવસો બાકી છે, ત્યારે કોલકાતા નાઈટ રાઈડર્સ (KKR) ના છાવણીમાંથી નિરાશાજનક સમાચાર મળી રહ્યા છે. ટીમના મુખ્ય ઝડપી બોલર હર્ષિત રાણા ઘૂંટણની ગંભીર ઈજાને કારણે આગામી આખી સિઝનમાંથી બહાર થઈ ગયા છે. આ સમાચારથી KKRના ચાહકો અને મેનેજમેન્ટની ચિંતામાં વધારો થયો છે.

વૉર્મઅપ મેચ દરમિયાન થઈ ઈજા : 

હર્ષિત રાણાને દક્ષિણ આફ્રિકા સામેની T20 વર્લ્ડ કપની વૉર્મઅપ મેચ દરમિયાન આ ઈજા થઈ હતી. મેચ દરમિયાન તે પોતાનો રન-અપ પૂરો કરવામાં અસમર્થ દેખાતો હતો અને એક જ ઓવરમાં બે વાર તેણે બોલિંગ અટકાવવી પડી હતી. ઘૂંટણમાં અચાનક દુખાવો ઉપડતા તે લડખડાતા મેદાનની બહાર નીકળી ગયો હતો. તપાસ બાદ જાણવા મળ્યું કે તેની ઈજા ગંભીર છે અને તેને સાજા થવામાં લાંબો સમય લાગી શકે છે, જેના કારણે તે હવે IPLમાં રમી શકશે નહીં.

KKR માટે ટાઈટલ જીતાડવામાં ભજવી હતી મોટી ભૂમિકા : 

હર્ષિત રાણા KKRની બોલિંગનો મહત્વનો હિસ્સો રહ્યો છે. વર્ષ 2024માં જ્યારે કોલકાતા નાઈટ રાઈડર્સ ચેમ્પિયન બન્યું ત્યારે રાણાએ 19 વિકેટ ઝડપીને મહત્વનું યોગદાન આપ્યું હતું. તેના શાનદાર પ્રદર્શનને જોતા જ ફ્રેન્ચાઈઝીએ તેને 4 કરોડ રૂપિયામાં રિટેન કર્યો હતો. ગત સિઝનમાં પણ તેણે 15 વિકેટ લઈને પોતાની ઉપયોગીતા સાબિત કરી હતી. ડેથ ઓવર્સમાં રન રોકવાની તેની ક્ષમતા ટીમને ખૂબ જ કામ લાગતી હતી.

પથિરાનાની ફિટનેસ અને નવા ખેલાડીનું આગમન : 

KKR માટે માત્ર હર્ષિત રાણા જ નહીં પરંતુ શ્રીલંકન બોલર મથીશા પથિરાનાની ફિટનેસ પણ સવાલ હેઠળ છે. આ દરમિયાન ટીમે ઝિમ્બાબ્વેના ફાસ્ટ બોલર બ્લેસિંગ મુઝરબાનીને ટીમમાં સામેલ કરવાની જાહેરાત કરી છે. મુઝરબાનીએ IPL માટે પાકિસ્તાન સુપર લીગ છોડી દીધી છે. જોકે, હર્ષિત રાણા જેવો ભારતીય વિકલ્પ ગુમાવવો એ ટીમ માટે વ્યૂહાત્મક રીતે મોટું નુકસાન સાબિત થઈ શકે છે.

29 માર્ચે મુંબઈ સામે પ્રથમ ટક્કર : 

BCCIના શેડ્યૂલ મુજબ કોલકાતા નાઈટ રાઈડર્સ પોતાની પ્રથમ મેચ 29 માર્ચ 2026ના રોજ મુંબઈ ઈન્ડિયન્સ સામે રમશે. પ્રથમ મેચ પહેલા જ મુખ્ય બોલરનું બહાર થવું એ કેપ્ટન અને કોચ માટે પ્લેઈંગ ઈલેવન સેટ કરવામાં મોટી મુસીબત ઉભી કરી શકે છે. હવે જોવાનું એ રહેશે કે KKR મેનેજમેન્ટ રાણાના સ્થાને કયા ભારતીય બોલર પર પસંદગી ઉતારે છે.