BCCI સેન્ટ્રલ કોન્ટ્રાક્ટમાંથી A+ કેટેગરી રદ કરશે

ભારતીય ક્રિકેટ કંટ્રોલ બોર્ડ (BCCI) પુરુષ ક્રિકેટરોના વાર્ષિક સેન્ટ્રલ કોન્ટ્રાક્ટમાં મોટા ફેરફારો કરવાની યોજના બનાવી રહ્યું છે. લેટેસ્ટ અહેવાલો મુજબ, BCCI વર્ષ 2018 માં શરૂ કરાયેલ પ્રીમિયમ 'A+' કેટેગરીને સંપૂર્ણપણે નાબૂદ કરી શકે છે. આ પગલાનો મુખ્ય ઉદ્દેશ્ય કોન્ટ્રાક્ટ પ્રક્રિયાને વધુ સરળ અને પારદર્શક બનાવવાનો છે.

નવું માળખું અને શ્રેણીઓ અત્યાર સુધી BCCI ખેલાડીઓને ચાર શ્રેણીમાં વહેંચતું હતું:

A+ શ્રેણી: વાર્ષિક 7 કરોડ રૂપિયા

A શ્રેણી: વાર્ષિક 5 કરોડ રૂપિયા

B શ્રેણી: વાર્ષિક 3 કરોડ રૂપિયા

C શ્રેણી: વાર્ષિક 1 કરોડ રૂપિયા

હવે નવા આયોજન મુજબ ખેલાડીઓને માત્ર A, B અને C એમ ત્રણ જ શ્રેણીમાં રાખવામાં આવશે.

સ્ટાર ખેલાડીઓની સ્થિતિ : 

વર્તમાન A+ કેટેગરીમાં રોહિત શર્મા, વિરાટ કોહલી, જસપ્રીત બુમરાહ અને રવિન્દ્ર જાડેજાનો સમાવેશ થાય છે. આમાંથી વિરાટ અને રોહિત હવે માત્ર વન-ડે ફોર્મેટ પર ધ્યાન આપી રહ્યા છે, જ્યારે જાડેજા ટેસ્ટ અને વન-ડે રમે છે. જસપ્રીત બુમરાહ એકમાત્ર એવો ખેલાડી છે જે ત્રણેય ફોર્મેટમાં સક્રિય છે.

બુમરાહના પગાર પર અસર નહીં થાય : 

નવી સિસ્ટમમાં પણ જસપ્રીત બુમરાહને આર્થિક નુકસાન નહીં થાય. તે ત્રણેય ફોર્મેટ રમતો હોવાથી તેને ટોચની શ્રેણીમાં જ રાખવામાં આવશે અને તેનો વર્તમાન પગાર જાળવી રાખવામાં આવશે. આ મહત્વપૂર્ણ નિર્ણય પર અંતિમ મહોર આગામી એપેક્સ કાઉન્સિલની બેઠકમાં મારવામાં આવી શકે છે.