IPL 2027 Schedule Change: ઇન્ડિયન પ્રીમિયર લીગ (IPL) ના કરોડો ચાહકો અને ખેલાડીઓ માટે એક મહત્વના સમાચાર સામે આવ્યા છે. ભારતીય ક્રિકેટ કંટ્રોલ બોર્ડ (BCCI) વર્ષ 2027ની IPL સીઝન તેના નિયત સમય કરતાં વહેલી શરૂ કરવાનું ગંભીરતાથી વિચારી રહ્યું છે. મે મહિના દરમિયાન ભારતમાં પડતી અસહ્ય અને તીવ્ર ગરમી તેમજ લૂ (Heatwave) થી ખેલાડીઓ અને સ્ટેડિયમમાં આવતા દર્શકોને બચાવવા માટે બોર્ડ દ્વારા આ વ્યૂહાત્મક ફેરફાર કરવામાં આવી રહ્યો છે. બોર્ડના સચિવ દેવજીત સૈકિયાએ આ અંગે સંકેત આપતા જણાવ્યું છે કે, આગામી સીઝન 10 માર્ચથી 15 મે દરમિયાન યોજવાનું આયોજન વિચારણા હેઠળ છે.
વધતા તાપમાન અને ચાહકોની ફરિયાદોને પગલે લેવાયો નિર્ણય સામાન્ય રીતે IPL ની સીઝન માર્ચ મહિનાના છેલ્લા અઠવાડિયામાં શરૂ થાય છે અને મે મહિનાના અંત સુધી ચાલુ રહે છે. પરંતુ તાજેતરના વર્ષોમાં મે મહિનાના અંત ભાગમાં દેશના મોટાભાગના વિસ્તારોમાં, ખાસ કરીને ઉત્તર અને પશ્ચિમ ભારતમાં તાપમાનનો પારો ખૂબ ઊંચો જતો રહે છે. બોર્ડના સચિવ દેવજીત સૈકિયાએ જણાવ્યું કે, "આ વર્ષે IPL 28 માર્ચથી 31 મે સુધી રમાઈ હતી. અમે જોયું છે કે 15 મે પછી દેશમાં ચોમાસા પહેલાનું વાતાવરણ (Pre-monsoon) સક્રિય થાય છે અને વરસાદના કારણે ટુર્નામેન્ટના અંતિમ તબક્કાની મેચોમાં વિક્ષેપ પડવાની શક્યતા રહે છે. આ ઉપરાંત, મે મહિનાના છેલ્લા પખવાડિયામાં હવામાન એટલું ગરમ થઈ જાય છે કે જે ખેલાડીઓ અને સ્ટેડિયમમાં બેસતા ચાહકો બંને માટે અનુકૂળ નથી હોતું. અમને ઉત્તર અને પશ્ચિમ ભાગોમાં રમાતી મેચો દરમિયાન ગરમીને લઈને ખેલાડીઓ અને ફેન્સ બંને તરફથી ઘણી ફરિયાદો મળી છે. વિદેશી ખેલાડીઓ આવી કાળઝાળ ગરમીમાં રમવા ટેવાયેલા હોતા નથી. આથી અમારું પ્રાથમિક લક્ષ્ય ટુર્નામેન્ટને 15 મે સુધીમાં જ પૂર્ણ કરી લેવાનું છે."
એબી કુરુવિલાને નવું શેડ્યૂલ તૈયાર કરવા આદેશ આ આયોજનને વાસ્તવિક રૂપ આપવા માટે બીસીસીઆઈ તેમજ આઈપીએલ ગવર્નિંગ કાઉન્સિલમાં વિસ્તૃત ચર્ચાઓ શરૂ થઈ ચૂકી છે. સૈકિયાએ વધુમાં ઉમેર્યું કે, તેમણે બોર્ડના જનરલ મેનેજર (ગેમ ડેવલપમેન્ટ) અને પૂર્વ ફાસ્ટ બોલર એબી કુરુવિલાને એક ખાસ શેડ્યૂલ તૈયાર કરવા માટેની સત્તાવાર સૂચના આપી દીધી છે. આ નવા રોડમેપ અનુસાર, વર્ષ 2027 થી આઈપીએલને માર્ચના અંતના બદલે 10 માર્ચ સુધીમાં જ શરૂ કરી દેવામાં આવશે, જેથી તેને બે અઠવાડિયા વહેલી એટલે કે 15 મે સુધીમાં જ આટોપી શકાય.
વ્યસ્ત ઇન્ટરનેશનલ શેડ્યૂલ વચ્ચે મેચોની સંખ્યા 74 જ રહેશે આઈપીએલના ફોર્મેટ અને મેચોની સંખ્યા વધારવાને લઈને ચાલી રહેલી અટકળો પર વિરામ મુકતા બોર્ડના સચિવે સ્પષ્ટ કર્યું છે કે આગામી સીઝનમાં મેચોની સંખ્યા 74 જ રાખવામાં આવશે અને તેને વધારીને 94 કરવામાં આવશે નહીં. વ્યસ્ત આંતરરાષ્ટ્રીય ક્રિકેટ શેડ્યૂલને જોતાં આ નિર્ણય લેવાયો છે. સૈકિયાએ સ્પષ્ટતા કરી કે, "હાલના તબક્કે મેચોની સંખ્યા વધારવી બિલકુલ શક્ય નથી. આઈપીએલ માટે વિન્ડો મેળવવા માટે આપણે વિવિધ દેશોના ક્રિકેટ બોર્ડ અને તેમના ખેલાડીઓની ઉપલબ્ધતા પર નિર્ભર રહેવું પડે છે. આ બે મહિનાનો સમયગાળો પણ આંતરરાષ્ટ્રીય ક્રિકેટ કાઉન્સિલ (ICC) સાથે ઘણી મુશ્કેલીઓ પછી નક્કી થયો છે. તેને બે મહિનાથી વધુ લંબાવવો અશક્ય છે કારણ કે અન્ય દેશોએ પણ પોતાની દ્વિપક્ષીય (Bilateral) સિરીઝ રમવાની હોય છે. આથી મેચો વધારવાની કોઈ ચર્ચા નથી. આ નિર્ણય લેતી વખતે ફક્ત ભારતના જ નહીં, પરંતુ ઓસ્ટ્રેલિયા, ઇંગ્લેન્ડ, ન્યૂઝીલેન્ડ, દક્ષિણ આફ્રિકા અને વેસ્ટ ઇન્ડીઝ જેવા ક્રિકેટ રમતા દેશોના ખેલાડીઓના હિતો અને તેમના વર્કલોડ મેનેજમેન્ટને પણ ધ્યાનમાં રાખવું અનિવાર્ય છે." બીસીસીઆઈના આ નવા અભિગમથી સ્પષ્ટ થાય છે કે ભવિષ્યમાં આઈપીએલ વધુ રોમાંચક બનશે અને ખેલાડીઓને ગરમીથી રાહત મળતાં તેઓ વધુ બહેતર પ્રદર્શન કરી શકશે.

જાણો શા માટે BCCI વહેલી શરૂ કરવા માગે છે IPL

June 18, 2026 | 15:03 IST