ICC ના અલ્ટિમેટમ છતાં નથી સુધર્યું બાંગ્લાદેશ

ક્રિકેટ જગતમાં હાલમાં વહીવટી અને રાજકીય ખેંચતાણ ચરમસીમાએ પહોંચી છે. બાંગ્લાદેશ ક્રિકેટ બોર્ડ (BCB) અને આંતરરાષ્ટ્રીય ક્રિકેટ પરિષદ (ICC) વચ્ચે ચાલી રહેલો વિવાદ હવે રાજકીય વળાંક લઈ રહ્યો છે. બાંગ્લાદેશના રમતગમત સલાહકાર આસિફ નઝરુલે સીધી રીતે ભારતીય ક્રિકેટ કંટ્રોલ બોર્ડ (BCCI) અને ICC ને આડે હાથ લેતા એક મોટું નિવેદન આપ્યું છે, જેનાથી રમત જગતમાં ખળભળાટ મચી ગયો છે.

આ સમગ્ર વિવાદ આવતા મહિને ભારતમાં યોજાનાર T20 વર્લ્ડ કપને લઈને છે. બાંગ્લાદેશ ક્રિકેટ બોર્ડે સુરક્ષાની ચિંતાઓને ટાંકીને ભારતમાં રમવા સામે અચકાટ દર્શાવ્યો છે. BCB ની માંગ છે કે તેમની મેચો ભારતને બદલે શ્રીલંકામાં યોજવામાં આવે. જોકે, ICC એ સ્પષ્ટ કર્યું છે કે ટુર્નામેન્ટના શેડ્યૂલમાં છેલ્લી ઘડીએ ફેરફાર કરવો શક્ય નથી.

ગયા અઠવાડિયે ઢાકામાં મળેલી મહત્વની બેઠકમાં ICC એ BCB ને ૨૧ જાન્યુઆરી સુધીનું અલ્ટીમેટમ આપ્યું છે. જો બાંગ્લાદેશ ૨૧ જાન્યુઆરી સુધીમાં ભારતમાં રમવા અંગે અંતિમ નિર્ણય નહીં લે, તો ICC તેમની જગ્યાએ બીજી કોઈ ટીમ (સંભવિત સ્કોટલેન્ડ) ને ટુર્નામેન્ટમાં સામેલ કરી શકે છે તેવી અટકળો તેજ થઈ છે.

આસિફ નઝરુલની ICC અને BCCI ને ખુલ્લી ચેતવણી

બાંગ્લાદેશના રમતગમત સલાહકાર આસિફ નઝરુલે આ મુદ્દે આક્રમક વલણ અપનાવતા કહ્યું કે, "અમને હજુ સુધી સ્કોટલેન્ડને સામેલ કરવા અંગે કોઈ સત્તાવાર માહિતી મળી નથી. પરંતુ જો ICC, ભારતીય બોર્ડ (BCCI) ના પ્રભાવ હેઠળ આવીને અમારા પર કોઈ અન્યાયી શરતો લાદશે, તો અમે તેને કોઈ પણ સંજોગોમાં સ્વીકારીશું નહીં."

નઝરુલે વધુમાં ઉમેર્યું કે ICC એ એક સ્વતંત્ર અને નિષ્પક્ષ સંસ્થા તરીકે વર્તવું જોઈએ, નહીં કે કોઈ એક શક્તિશાળી બોર્ડના ઈશારે કામ કરવું જોઈએ. તેમણે સ્પષ્ટ કર્યું કે બાંગ્લાદેશ ક્રિકેટમાં કોઈપણ પ્રકારનું રાજકીય કે વ્યાપારી દબાણ ચલાવી લેવામાં આવશે નહીં.

ગ્રુપ ફેરફારની માંગ અને ICC નો ઈનકાર

અહેવાલો મુજબ, BCB એ ICC ને એક પ્રસ્તાવ આપ્યો હતો જેમાં આયર્લેન્ડને ગ્રુપ C માં અને બાંગ્લાદેશને ગ્રુપ B માં ખસેડવાની વિનંતી કરવામાં આવી હતી. આ ફેરફાર પાછળનો હેતુ એ હતો કે બાંગ્લાદેશની મેચો શ્રીલંકાના મેદાન પર યોજી શકાય. જોકે, ICC એ આ પ્રસ્તાવને ફગાવી દીધો છે. હાલના શેડ્યૂલ મુજબ બાંગ્લાદેશ ગ્રુપ C માં ઈંગ્લેન્ડ, નેપાળ, ઈટાલી અને વેસ્ટ ઈન્ડિઝ સાથે છે.

બાંગ્લાદેશની લીગ મેચો કોલકાતાના ઐતિહાસિક ઈડન ગાર્ડન્સ અને મુંબઈના વાનખેડે સ્ટેડિયમ ખાતે રમાવાની છે. ટીમનો પ્રથમ મેચ ૭ ફેબ્રુઆરીએ વેસ્ટ ઈન્ડિઝ સામે છે, જે આ ટુર્નામેન્ટનો ઉદઘાટન મેચ પણ છે.

શું બાંગ્લાદેશ વર્લ્ડ કપમાંથી બહાર થશે?

હાલમાં સૌથી મોટો પ્રશ્ન એ છે કે શું બાંગ્લાદેશ આ વર્લ્ડ કપ રમશે? ICC પાસે સમય ઓછો છે અને તેઓ શેડ્યૂલમાં ફેરફાર કરવા તૈયાર નથી. બીજી તરફ, બાંગ્લાદેશ સરકાર અને ક્રિકેટ બોર્ડ પોતાના સ્ટેન્ડ પર અડગ છે. આસિફ નઝરુલે સ્પષ્ટ કર્યું છે કે બાંગ્લાદેશે મેદાન પરના પ્રદર્શનથી પોતાનું સ્થાન મેળવ્યું છે અને કોઈ તેને બાજુ પર ધકેલી શકશે નહીં.

જો 21 જાન્યુઆરી સુધીમાં કોઈ સમજૂતી નહીં થાય, તો ક્રિકેટના ઈતિહાસમાં આ એક મોટી ઘટના બની શકે છે જ્યાં એક મોટી ટીમ સુરક્ષા કે રાજકીય કારણોસર વર્લ્ડ કપ જેવી ટુર્નામેન્ટમાંથી બહાર થઈ જાય અથવા તેને હટાવી દેવામાં આવે. હવે આખી દુનિયાની નજર ૨૧ જાન્યુઆરીના રોજ લેવાનારા નિર્ણય પર ટકેલી છે.