દ. આફ્રિકા સામે 0-2થી હાર, પંતે સ્વીકારી નિષ્ફળતા

ભારતીય ક્રિકેટ ટીમે દક્ષિણ આફ્રિકા સામેની બે ટેસ્ટ મેચની ઘરઆંગણેની શ્રેણીમાં 0-2થી શરમજનક હારનો સામનો કરવો પડ્યો છે. આ કારમી હાર બાદ ભારતીય ટીમ પર ચારેબાજુથી આકરી ટીકાઓ થઈ રહી છે. ગુવાહાટી ટેસ્ટમાં ભારતીય ટીમનું નેતૃત્વ કરનાર વિકેટકીપર-બેટ્સમેન ઋષભ પંતે આ હાર બાદ સોશિયલ મીડિયા પર એક ભાવુક સંદેશ શેર કરીને નિષ્ફળતાનો સ્વીકાર કર્યો છે.

પંતનો ભાવુક સંદેશ: 'અમે અપેક્ષાઓ પર ખરા ન ઉતર્યા'

ઋષભ પંતે સોશિયલ મીડિયા પ્લેટફોર્મ X પર લખ્યું, "આ વાતમાં કોઈ શંકા નથી કે અમે છેલ્લા બે અઠવાડિયામાં સારું ક્રિકેટ રમ્યા નથી. એક ટીમ તરીકે અને વ્યક્તિગત રીતે, અમે હંમેશા ઉચ્ચતમ સ્તરે પ્રદર્શન કરવા અને અબજો ભારતીયોના ચહેરા પર સ્મિત લાવવા માંગીએ છીએ. અમને દુઃખ છે કે અમે આ વખતે અપેક્ષાઓ પર ખરા ઉતરી શક્યા નથી."

જોકે, પંતે વિશ્વાસ વ્યક્ત કરતા કહ્યું કે રમતગમત તમને શીખવાનું, અનુકૂલન સાધવાનું અને વિકાસ કરવાનું શીખવે છે.

પંતે આગળ લખ્યું, "ભારત માટે રમવું એ અમારા જીવનનું સૌથી મોટું સન્માન છે. અમે જાણીએ છીએ કે આ ટીમ શું સક્ષમ છે. અમે સખત મહેનત કરીશું, ફરીથી સંગઠિત થઈશું અને ટીમ તેમજ વ્યક્તિગત રીતે મજબૂત અને વધુ સારી રીતે પાછા ફરવા માટે ફરીથી સેટ કરીશું. તમારા અતૂટ સમર્થન અને પ્રેમ બદલ આભાર. જય હિંદ."

કેપ્ટન તરીકે ખરાબ શરૂઆત અને વ્યક્તિગત નિષ્ફળતા

આ ટેસ્ટ શ્રેણી ઋષભ પંત માટે કેપ્ટન તરીકેની સત્તાવાર શરૂઆત હતી. પ્રથમ ટેસ્ટમાં કેપ્ટન ગિલના ઈજાગ્રસ્ત થયા બાદ પંતે ટીમની કમાન સંભાળી હતી અને ટીમ 30 રનથી હારી હતી. ગુવાહાટીમાં રમાયેલી બીજી ટેસ્ટમાં પંતને સત્તાવાર રીતે કેપ્ટનશીપ સોંપવામાં આવી, જેમાં ભારતને 408 રનની વિશાળ હારનો સામનો કરવો પડ્યો. ટેસ્ટ ક્રિકેટમાં રનની દ્રષ્ટિએ આ ભારતનો સૌથી મોટો પરાજય હતો.

કેપ્ટનશીપ ઉપરાંત, પંતનું વ્યક્તિગત પ્રદર્શન પણ ઘણું નબળું રહ્યું. તે શ્રેણીની ચાર ઇનિંગ્સમાં માત્ર 49 રન જ બનાવી શક્યો હતો, જેના કારણે તેની બેટિંગ ફોર્મ અને કેપ્ટનશીપની યોગ્યતા બંને પર સવાલો ઉભા થયા છે. હવે જોવાનું એ રહે છે કે ટીમ આગામી શ્રેણીમાં કેવી રીતે પુનરાગમન કરે છે.