સ્ટાફ સિલેક્શન કમિશન (SSC) ની પરીક્ષા પ્રક્રિયાને લઈને ચાલી રહેલો વિવાદ હવે કાનૂની લડાઈમાં ફેરવાયો છે. પ્રખ્યાત યુટ્યુબર નીતિશ રાજપૂત સામે એજ્યુક્વિટી ટેકનોલોજીસ (Eduquity Technologies) દ્વારા દિલ્હીની અદાલતમાં ₹2.5 કરોડનો માનહાનિનો દાવો દાખલ કરવામાં આવ્યો છે.
શું છે સમગ્ર વિવાદ? 
આ વિવાદની શરૂઆત નીતિશ રાજપૂત દ્વારા અપલોડ કરવામાં આવેલા એક વીડિયોથી થઈ હતી. આ વીડિયોમાં નીતિશે RTI (માહિતી અધિકાર) હેઠળ મળેલી વિગતો અને જાહેર દસ્તાવેજોના આધારે SSC ની ટેન્ડર પ્રક્રિયા અને પરીક્ષા લેવા માટે વેન્ડરોની પસંદગી પર ગંભીર સવાલો ઉઠાવ્યા હતા.
વીડિયોમાં દાવો કરવામાં આવ્યો હતો કે, પરીક્ષાના નિયમોમાં થયેલા ફેરફારો અને કાર્યપદ્ધતિ પરીક્ષાઓની વિશ્વસનીયતાને અસર કરી શકે છે.
કંપનીનો પક્ષ અને આક્ષેપો પરીક્ષા લેતી કંપની એજ્યુક્વિટી ટેકનોલોજીસનું કહેવું છે કે, નીતિશ રાજપૂતનો વીડિયો ભ્રામક અને ખોટા તથ્યો પર આધારિત છે. કંપનીના મતે આ વીડિયોને કારણે તેમની પ્રતિષ્ઠાને મોટું નુકસાન થયું છે. આથી, કંપનીએ કોર્ટમાં વળતરની માંગ સાથે વીડિયોને સોશિયલ મીડિયા પ્લેટફોર્મ પરથી હટાવવા માટે પણ અપીલ કરી છે.
નીતિશ રાજપૂતનો મક્કમ નિર્ધાર બીજી તરફ, નીતિશ રાજપૂત પોતાના સ્ટેન્ડ પર અડગ છે. તેમણે વીડિયો હટાવવાનો સાફ ઇનકાર કરી દીધો છે. નીતિશનું કહેવું છે કે તેમનું વિશ્લેષણ ચકાસાયેલા રેકોર્ડ્સ પર આધારિત છે અને તે લાખો ઉમેદવારોની ચિંતાઓનો પડઘો પાડે છે, જેઓ અવારનવાર ટેકનિકલ ખામીઓ અને ગેરવ્યવસ્થાનો સામનો કરે છે.
સરકારી નોકરીની આશા રાખતા લાખો યુવાનોમાં આ વિવાદ ટોક ઓફ ધ ટાઉન બન્યો છે. હવે જોવાનું એ રહેશે કે કોર્ટ આ મામલે શું વલણ અપનાવે છે.
&nbsp;

નીતિશ રાજપૂત કોર્ટના સકંજામાં

RTIના આધારે SSC ટેન્ડર પ્રક્રિયા પર ઉઠાવ્યા હતા સવાલ; હવે કાનૂની જંગ; વીડિયો હટાવવાની માંગ

February 11, 2026 | 13:53 IST