કેરળની એક અદાલતે એક 57 વર્ષીય પૂર્વ ટ્યુટર (ટ્યુશન ટીચર)ને ભૂતકાળમાં સગીર વિદ્યાર્થિની પર વારંવાર જાતીય હુમલો કરવાના ગુનામાં કુલ 18 વર્ષની જેલની સજા ફટકારી છે.&nbsp;
આ કેસની સૌથી ચોંકાવનારી વાત એ છે કે આ ગુનો 11 વર્ષ પહેલા આચરવામાં આવ્યો હતો, પરંતુ તેનો ખુલાસો વર્ષ 2024માં થયો જ્યારે પીડિતા હવે એક મેડિકલ (MBBS) વિદ્યાર્થિની છે.
શું છે સમગ્ર મામલો?
વર્ષ 2013માં જ્યારે પીડિતા ધોરણ 5 માં અભ્યાસ કરતી હતી, ત્યારે તે 57 વર્ષીય આરોપી પાસે ટ્યુશન લેવા જતી હતી. જાન્યુઆરી 2014 સુધી આરોપીએ અનેકવાર માસૂમ બાળકીનું જાતીય શોષણ કર્યું હતું. આરોપીની ધમકીઓને કારણે બાળકીએ આ વાત કોઈને કહી નહોતી અને ધોરણ 6 માં પહોંચતા જ ટ્યુશન છોડી દીધું હતું.
જોકે, આ આઘાતને કારણે તેને વર્ષો સુધી માનસિક પીડા અને ભયમાં જીવવું પડ્યું હતું.
11 વર્ષ બાદ ખુલાસો
પીડિતાએ આ આઘાતને કારણે અનેક માનસિક સમસ્યાઓનો સામનો કર્યો, જેના કારણે તેનું એક શૈક્ષણિક વર્ષ પણ બગડ્યું હતું. તે સતત આઈસોલેશન અને પેનિક ડિસઓર્ડરથી પીડાતી હતી. બાદમાં તેણે મનોચિકિત્સકની મદદ લીધી અને તેનું સ્વાસ્થ્ય સુધર્યું. તેને MBBSમાં એડમિશન પણ મળી ગયું.
વર્ષ 2024 માં, હોસ્ટેલમાં રહેતી વખતે તેણે આરોપી જેવી જ દેખાતી એક વ્યક્તિને જોઈ, જેનાથી તેના જૂના જખમ તાજા થયા અને તે માનસિક રીતે વિચલિત થઈ ગઈ. ડોક્ટર સાથેની પરામર્શ દરમિયાન તેણે આખરે 11 વર્ષ જૂની હકીકત જણાવી, ત્યારબાદ પોલીસે આરોપીની ધરપકડ કરી હતી.
તિરુવનંતપુરમ ફાસ્ટ ટ્રેક સ્પેશિયલ કોર્ટના જજ અંજુ મીરા બિરલાએ આરોપીને IPC અને પોક્સો (POCSO) એક્ટ હેઠળ વિવિધ ગુનાઓમાં કુલ 18 વર્ષની જેલની સજા ફટકારી છે.
જોકે, આ તમામ સજાઓ એકસાથે ચાલશે, તેથી આરોપીએ મહત્તમ 5 વર્ષ જેલમાં રહેવું પડશે. કોર્ટે આરોપી પર 35,000 રૂપિયાનો દંડ પણ ફટકાર્યો છે અને પીડિતાને વળતર આપવાનો આદેશ આપ્યો છે.

જાતીય શોષણના કેસમાં 18 વર્ષની જેલ

પૂર્વ ટ્યુટરે ધોરણ 5માં વિદ્યાર્થિની પર આચર્યું હતું દુષ્કર્મ; 11 વર્ષ બાદ થયો ખુલાસો..

March 6, 2026 | 14:31 IST