ફરીદાબાદમાં ચાલતી વેનમાં મહિલા દુષ્કૃત્યનો ભોગ બની

નવા વર્ષની પૂર્વસંધ્યાએ હરિયાણાના ફરીદાબાદમાં એક અત્યંત ખૌફનાક અને શરમજનક ઘટના સામે આવી છે. અહીં એક 28 વર્ષીય પરિણીત મહિલાને ચાલતી વેનમાં અઢી કલાક સુધી બંધક બનાવી બે નરાધમોએ સામૂહિક  દુષ્કર્મ ગુજાર્યો હતો. આટલી ક્રૂરતા બાદ આરોપીઓએ મહિલાને લોહીલુહાણ હાલતમાં ચાલતી ગાડીમાંથી રસ્તા પર ફેંકી દીધી હતી.

ઘટનાની વિગત મુજબ, સોમવાર અને મંગળવારની મધ્યરાત્રિએ આ 28 વર્ષીય મહિલા ઘરે જવા માટે વાહનની રાહ જોઈ રહી હતી. આ દરમિયાન એક વેન ત્યાં આવી ઊભી રહી હતી અને તેમાં સવાર બે યુવાનોએ મહિલાને સુરક્ષિત રીતે ઘરે મૂકી જવાની લાલચ આપી ગાડીમાં બેસાડી હતી. જોકે, ઘરે લઈ જવાને બદલે આરોપીઓ ગાડીને ગુડગાંવ રોડ તરફ દોડાવી ગયા હતા.

પીડિતાએ પોલીસ ફરિયાદમાં જણાવ્યું છે કે, આરોપીઓએ અઢી કલાક સુધી ચાલતી વેનમાં તેની સાથે દુષ્કર્મ આચર્યું હતું. મહિલાના વિરોધ છતાં નરાધમો અટક્યા નહોતા અને તેને જાનથી મારી નાખવાની ધમકી આપી હતી. રાત્રે અંદાજે 3 વાગ્યે, આરોપીઓએ SGM નગરના રાજા ચોક પાસે મહિલાને ચાલતી ગાડીમાંથી બહાર ફેંકી દીધી હતી. આ પછડાટને કારણે મહિલાના ચહેરા પર ગંભીર ઈજાઓ થઈ હતી અને તે લોહીલુહાણ થઈ ગઈ હતી.

મહિલાએ કોઈ રીતે પોતાની બહેનને ફોન કરીને જાણ કરતા પરિવારજનો ઘટનાસ્થળે દોડી આવ્યા હતા. પીડિતાને તાત્કાલિક હોસ્પિટલ ખસેડવામાં આવી હતી, જ્યાં તેના ચહેરા પર 10થી 12 ટાંકા લેવા પડ્યા છે. હાલ પીડિતાની હાલત સ્થિર છે પરંતુ તે આઘાતમાં હોવાથી તેનું વિગતવાર નિવેદન નોંધવાનું બાકી છે.

પોલીસે આ મામલે ત્વરિત કાર્યવાહી કરતા બંને આરોપીઓની ધરપકડ કરી લીધી છે અને ગુનામાં વપરાયેલી વેન પણ જપ્ત કરી છે. પીડિતા ત્રણ બાળકોની માતા છે અને પારિવારિક વિવાદને કારણે તેના પતિથી અલગ રહે છે. આ ઘટનાએ ફરી એકવાર મહિલાઓની સુરક્ષા પર ગંભીર સવાલો ઉભા કર્યા છે.