"હું જનતાની માફી માંગુ છું".. મહાકુંભના સમાપન સમયે PM મોદીએ કેમ માફી માંગી?

ઐતિહાસિક મહાકુંભ 2025 ખૂબ જ ધામધૂમથી પૂર્ણ થયું છે. આ અંગે પીએમ મોદીએ જનતાની માફી માંગી. તેમણે કહ્યું કે જો ભક્તોની સેવામાં કોઇકમી રહી ગઇ હોય તો હું લોકોની ક્ષમા માંગુ છું.

મહા કુંભ મેળો 2025 ખૂબ જ ધામધૂમથી પૂર્ણ થયો. ૪૫ દિવસ સુધી ચાલેલા આ ઐતિહાસિક કાર્યક્રમમાં કરોડો ભક્તોએ શ્રદ્ધા અને ભક્તિ સાથે ત્રિવેણી સંગમમાં પવિત્ર સ્નાન કર્યું. મહાકુંભના સમાપન સમારોહ પ્રસંગે, પ્રધાનમંત્રી નરેન્દ્ર મોદીએ તેને 'એકતાનો મહાયજ્ઞ' ગણાવ્યો અને આ દિવ્ય કાર્યક્રમનો ભાગ બનવા બદલ તમામ ભક્તોનો આભાર માન્યો. આ ઉપરાંત, તેમણે ભક્તોને થયેલી અસુવિધા બદલ માફી પણ માંગી.

પીએમ મોદીએ માફી કેમ માંગી?
Narendramodi.in પર લખેલા પોતાના વિચારોની શરૂઆતમાં, પીએમ મોદીએ બધાની માફી માંગી. તેમણે લખ્યું, 'મને ખબર છે, આટલા મોટા કાર્યક્રમનું આયોજન કરવું સરળ નહોતું. હું માતા ગંગા... માતા યમુના... માતા સરસ્વતી... ને પ્રાર્થના કરું છું. હે માતા, જો આપની પૂજામાં કોઈ ખામી હોય તો કૃપા કરીને અમને માફ કરો. જનતા, જે મારા માટે ભગવાનનું સ્વરૂપ છે, જો હું ભક્તોની સેવા કરવામાં નિષ્ફળ ગયો હોઉં, તો હું જનતાની પણ માફી માંગુ છું.

મહાકુંભ વિશે પીએમ મોદીએ શું કહ્યું?
આ ઉપરાંત, પીએમ મોદીએ એક પછી એક ટ્વીટમાં કહ્યું, જ્યારે 140 કરોડ દેશવાસીઓની શ્રદ્ધા એક જગ્યાએ ભેગી થાય છે, ત્યારે તે દ્રશ્ય અવિસ્મરણીય બની જાય છે. પ્રયાગરાજમાં મહાકુંભ દરમિયાન અમે આ અદ્ભુત દૃશ્ય જોયું. આ કાર્યક્રમ ફક્ત ધાર્મિક તહેવાર નથી પણ આપણી સાંસ્કૃતિક એકતા અને અખંડિતતાનું પ્રતીક છે. પીએમ મોદીએ વધુમાં કહ્યું, 'જ્યારે કોઈ રાષ્ટ્ર પોતાની સદીઓ જૂની ગુલામી માનસિકતા તોડીને આગળ વધે છે અને એક નવા આત્મવિશ્વાસ સાથે ખુલ્લી હવામાં શ્વાસ લે છે, ત્યારે આ મહાકુંભમાં આપણે જે દ્રશ્યો જોયા હતા તે જ દ્રશ્યો જોવા મળે છે.'