ભારતમાં બનેલી 3 કફ સિરપમાં ઝેરી ભેળસેળ: WHO

ભારતમાં ઝેરી કફ સિરપના કારણે 20થી વધુ બાળકોના મોતની ગંભીર ઘટના બાદ WHO એ આ મામલે સંજ્ઞાન લઈને 3 ફાર્મા કંપનીઓને સખત ચેતવણી આપી છે અને તેમની કફ સિરપને લઈને વૈશ્વિક એલર્ટ જાહેર કર્યું છે. ગ્લોબલ હેલ્થ એજન્સીની તપાસમાં આ સિરપમાં ભેળસેળ સામે આવી છે. એલર્ટમાં સામેલ કંપનીઓ અને સિરપના નામ નીચે મુજબ છે: શ્રીસન ફાર્માની 'કોલ્ડ્રિફ', રેડનેક્સ ફાર્માની 'રેસ્પિફ્રેશ ટીઆર' અને શેપ ફાર્માની 'રિલાઈપ' સિરપ.

સિરપથી સ્વાસ્થ્ય માટે ગંભીર જોખમ

WHOનું સ્પષ્ટ કહેવું છે કે, આ સિરપ સ્વાસ્થ્ય માટે ગંભીર જોખમ ઊભું કરી શકે છે અને તેના કારણે જીવલેણ બીમારી પણ થઈ શકે છે. WHO એ લોકોને અપીલ કરી છે કે, જો આ કફ સિરપ ક્યાંય પણ જોવા મળે, તો તાત્કાલિક તેના વિશે સંબંધિત અધિકારીઓને જાણકારી આપો.

સિરપમાં ડાયથિલીન ગ્લાઇકોલ નામનું ઝેરી કેમિકલ

આ ખતરનાક ભેળસેળનું મુખ્ય કારણ કફ સિરપમાં ડાયથિલીન ગ્લાઇકોલ નામનું ઝેરીલું કેમિકલ મોટી માત્રામાં મળી આવવું છે. ચોંકાવનારી વાત એ છે કે, આ કેમિકલનો ન તો કોઈ રંગ હોય છે ન તો ગંધ, જેના કારણે તપાસ કર્યા વિના એ જાણવું મુશ્કેલ છે કે, તેનો ઉપયોગ સિરપને મીઠી કરવા માટે કરવામાં આવ્યો છે.

આ પણ વાંચો: શ્રીસન ફાર્માના 7 સ્થળોએ EDના દરોડા

શ્રીસન ફાર્માસ્યુટિકલ કંપની સામે કાર્યવાહી

જોકે, માનવ સ્વાસ્થ્ય માટે ડાયથિલીન ગ્લાઈકોલનો ઉપયોગ અત્યંત ખતરનાક હોય છે અને તેના લીધે જ અનેક બાળકોના મોત થયા હોવાનું માનવામાં આવે છે. આ તપાસ બાદ તમિલનાડુ સ્થિત શ્રીસન ફાર્માસ્યુટિકલ કંપની સામે કડક કાર્યવાહી કરવામાં આવી છે.

શ્રીસન ફાર્માનું લાઈસન્સ સંપૂર્ણ રીતે રદ્દ

રાજ્ય ઔષધી નિયંત્રણ વિભાગના અધિકારીઓએ એક નિરીક્ષણ દરમિયાન જોયું કે, કફ સિરપમાં 48.6 ટકા જેટલો ડાયએથિલીન ગ્લાઈકૉલ પદાર્થ હાજર હતો. પરિણામે, શ્રીસન ફાર્માનું લાઈસન્સ સંપૂર્ણ રીતે રદ્દ કરી દેવામાં આવ્યું છે, કંપનીના માલિક જી. રંગનાથનની ધરપકડ કરવામાં આવી છે અને કંપનીને તાત્કાલિક બંધ કરવાનો આદેશ પણ આપી દેવાયો છે.