કોલ્ડ્રિફ કફ સિરપ મામલે ED દ્વારા મોટી કાર્યવાહી હાથ ધરવામાં આવી છે. આ કફ સિરપના કારણે દેશના વિવિધ રાજ્યોમાં 22 જેટલા નિર્દોષ બાળકોના મોત થયા હતા, જેમાં મુખ્યત્વે મધ્યપ્રદેશના છિંદવાડા જિલ્લાના 5 વર્ષથી ઓછી ઉંમરના બાળકોનો સમાવેશ થાય છે. ED એ મની લોન્ડરિંગ નિવારણ અધિનિયમની જોગવાઈઓ હેઠળ ચેન્નાઈમાં 7 સ્થળોએ દરોડા પાડ્યા છે. આ દરોડા પ્રતિબંધિત કફ સિરપના નિર્માતા શ્રીસન ફાર્માસ્યુટિકલ્સ સાથે સંકળાયેલા છે. EDની તપાસ કેન્દ્રીય તપાસ એજન્સી તમિલનાડુ ડ્રગ કંટ્રોલ ઓફિસના ટોચના અધિકારીઓના નિવાસ્થાનો સુધી પણ પહોંચી છે, જે દર્શાવે છે કે, આ કેસમાં નિયમનકારી બેદરકારી ગંભીર સ્તરે હતી. શ્રીસન ફાર્માસ્યુટિકલ્સના માલિક જી. રંગનાથનને મધ્યપ્રદેશ પોલીસે 9 ઓક્ટોબરે પહેલાથી જ કસ્ટડીમાં લઈ લીધા હતા.
1 દાયકાથી વધુ નિયમોનું ઉલ્લંઘન
સેન્ટ્રલ ડ્રગ્સ સ્ટાન્ડર્ડ કંટ્રોલ ઓર્ગેનાઇઝેશન (CDSCO) દ્વારા હાથ ધરાયેલી તપાસમાં કાંચીપુરમ સ્થિત શ્રીસન ફાર્મા દ્વારા થયેલી નિયમનકારી ધોરણોના ભંગ બદલ તમિલનાડુ ફૂડ એન્ડ ડ્રગ એડમિનિસ્ટ્રેશનની ગંભીર ચૂક સામે આવી છે. માહિતી મુજબ, કંપનીને 2011માં લાઈસન્સ મળ્યું હોવા છતાં, તે નબળા ઈન્ફ્રાસ્ટ્રક્ચર અને રાષ્ટ્રીય ડ્રગ સુરક્ષા નિયમોના અનેક ઉલ્લંઘન સાથે એક દાયકાથી વધુ સમય સુધી ચકાસણી વગર કાર્યરત હતી. CDSCOના તાજેતરના નિરીક્ષણમાં શ્રીસન ફાર્મા ખાતે 'ગુડ મેન્યુફેક્ચરિંગ પ્રેક્ટિસિસ (GMP)' નું ગંભીર બિન-પાલન અને દયનીય કાર્યકારી પરિસ્થિતિઓ સ્પષ્ટપણે નોંધવામાં આવી હતી.
આ પણ વાંચો:<a href="https://www.benefitnews24.com/gujarati/india/madhya-pradesh-syrup-scandal-company-owner-govindan-arrested-/20477" target="_blank" rel="noopener"> </a><a href="https://www.benefitnews24.com/gujarati/india/madhya-pradesh-syrup-scandal-company-owner-govindan-arrested-/20477" target="_blank" rel="noopener">મધ્યપ્રદેશ સિરપ કાંડ: કંપની માલિક ગોવિંદન પકડાયો.</a>
TNFDA દ્વારા સત્તાવાળાઓથી માહિતી છુપાવવાની ગંભીરતા
TNFDA એ શ્રીસન ફાર્મા વિશે CDSCOને જાણ સુદ્ધાં નહોતી કરી, જેના પરિણામે કંપની કેન્દ્રીય નિયમનકારી ડેટાબેસેસમાં નોંધાયેલી નહોતી. વધુમાં, શ્રીસન ફાર્મા ભારતમાં ફાર્માસ્યુટિકલ ઉત્પાદનના વધુ સારા મોનિટરિંગ માટે ફરજિયાત એવા રાષ્ટ્રીય 'સુગમ' પોર્ટલ પર તેના મંજૂર ઉત્પાદનોની નોંધણી કરવામાં પણ નિષ્ફળ રહી હતી. સૌથી ગંભીર બાબત એ છે કે, મધ્યપ્રદેશ સત્તાવાળાઓની વિનંતી પર TNFDA એ ઑક્ટોબરની શરૂઆતમાં શ્રીસન ફાર્માનું ઓડિટ કર્યું હોવા છતાં, તેણે આ માહિતી CDSCO સાથે શેર કરી નહોતી.
ઝેરી રિપોર્ટ રોકી રાખ્યો
3 ઑક્ટોબરે છિંદવાડામાં CDSCO દ્વારા સંયુક્ત જોખમ-આધારિત નિરીક્ષણ દરમિયાન કંપનીના ઉલ્લંઘનો સામે આવ્યા હોવા છતાં, TNFDA અધિકારીઓએ વારંવારની વિનંતીઓ છતાં તેમાં ભાગ લીધો ન હતો. TNFDA એ કોલ્ડ્રિફ સિરપના વિશ્લેષણ રિપોર્ટને જાહેર ન થાય ત્યાં સુધી રોકી રાખ્યો હતો. આ રિપોર્ટમાં અનુમતિપાત્ર 0.1%ની સામે 48% જેટલું ઝેરી સ્તરનું 'ડાઇથિલિન ગ્લાયકોલ' જણાયું હતું, જે બાળકોના મોત માટે જવાબદાર હતું. આનાથી રાજ્ય અને કેન્દ્રીય નિયમનકારો વચ્ચે મોટી મૂંઝવણ ઊભી થઈ હતી. આ તમામ ગંભીર ખુલાસાઓ પછી, CDSCO એ શ્રીસન ફાર્માનું મેન્યુફેક્ચરિંગ લાઈસન્સ રદ્દ કરવાની અને ફોજદારી કાર્યવાહી શરૂ કરવાની ભલામણ કરી હતી. જોકે, TNFDA એ કોઈ તાત્કાલિક પગલાં ન લીધાં અને કંપનીના માલિકની ધરપકડ આખરે 8 ઓક્ટોબર મધ્યપ્રદેશ પોલીસ દ્વારા કરવામાં આવી હતી.

કોલ્ડ્રિફ કફ સિરપ

કોલ્ડ્રિફ કફ સિરપ કેસમાં મની લોન્ડરિંગની તપાસના ભાગરૂપે ED એ 7 સ્થળોએ દરોડા પાડ્યા

October 13, 2025 | 15:59 IST