આંધ્ર પ્રદેશમાં 24 કલાકમાં બે અકસ્માતો: 6 જીવ ગયા

આંધ્ર પ્રદેશમાં રવિવારે (23 નવેમ્બર, 2025) બે અલગ-અલગ ગમખ્વાર માર્ગ અકસ્માતોમાં કુલ 6 લોકોના કરુણ મોત થયા છે, જ્યારે 16થી વધુ લોકો ઘાયલ થયા છે. આ ઘટનાઓ રાજ્યના શ્રીકાકુલમ અને નંદયાલ જિલ્લામાં બની હતી, જેના કારણે સમગ્ર વિસ્તારમાં શોકનું મોજું ફરી વળ્યું છે.

શ્રીકાકુલમમાં યાત્રાળુઓ ભરેલું વાહન અકસ્માતગ્રસ્ત

શ્રીકાકુલમ જિલ્લામાં રવિવારે સવારે એક મોટી ઘટના બની હતી. કોટબોમ્માલી મંડલના યેત્તુરાલ્લાપાડુ ગામ પાસે નેશનલ હાઇવે પર યાત્રાળુઓને લઈ જઈ રહેલું એક મલ્ટી-યુટિલિટી વ્હીકલ (MUV) ઊભેલા ટ્રક સાથે પાછળથી ધડાકાભેર અથડાયું હતું. આ અકસ્માતમાં ચાર લોકોના ઘટનાસ્થળે જ મોત થયા હતા, જ્યારે અન્ય 6 લોકો ઘાયલ થયા હતા.

પોલીસના જણાવ્યા અનુસાર, મધ્ય પ્રદેશના આ યાત્રાળુઓ ઓડિશાના પૂરીની યાત્રા પૂર્ણ કર્યા બાદ શ્રીશૈલમ મંદિર જઈ રહ્યા હતા. મૃતકોમાં વિજય સિંહ તોમર (65), સિંહ પવાર (60), કુસલ સિંહ (62) અને સંતોષી બાઈ (62)નો સમાવેશ થાય છે. પોલીસનું અનુમાન છે કે MUV ચાલકને ઝપકી આવી જવાથી આ ગંભીર અકસ્માત સર્જાયો હશે. ઘાયલોને નરસારાવપેટની સરકારી હોસ્પિટલમાં દાખલ કરવામાં આવ્યા છે.

નંદયાલ જિલ્લામાં બસ-ટ્રક અથડામણ

બીજી એક દુર્ઘટના નંદયાલ જિલ્લાના અલ્લાગડ્ડા મંડલમાં પેરયાપલેમ નજીક થઈ હતી, જ્યાં એક ખાનગી બસની બે ટ્રક સાથે ટક્કર થઈ હતી. આ અકસ્માતમાં બસમાં પાછળની સીટ પર બેઠેલા બે મુસાફરોનાં મોત નીપજ્યાં હતાં અને અન્ય 10 લોકો ઘાયલ થયા હતા, જેમાંથી ચારની હાલત ગંભીર હોવાનું જણાવાયું છે.

આ સિવાય કૃષ્ણા જિલ્લાના ગન્નવરમ પાસે ચેન્નાઈ-કોલકાતા હાઈવે પર એક ટ્રક સાથે ટકરાતા બચવાના પ્રયાસમાં એક ટ્રાવેલ બસ રસ્તા પરથી લપસી ગઈ હતી. આ ઘટનામાં મુસાફરોનો બચાવ થયો હતો, પરંતુ બસના આગળના ભાગને નુકસાન થયું હતું.

બાયોડીઝલ બંકમાં આગ

માર્ગ અકસ્માતોની સાથે, પલનાડુ જિલ્લામાં એક બાયોડીઝલ બંકમાં આગ લાગવાની ઘટનામાં એક વ્યક્તિનું જીવતા સળગી જવાથી મોત થયું હતું અને અન્ય એક વ્યક્તિ ઘાયલ થયો હતો. મૃતકની ઓળખ બંક કર્મચારી રશીદ તરીકે થઈ છે. ફાયર ફાઇટિંગ સ્ટાફે સમયસર પહોંચીને આગ પર કાબૂ મેળવ્યો હતો.