અરુણાચલ પ્રદેશના ખીણમાં ટ્રક ખાબકી, 22 ના મોત

અરુણાચલ સરહદ નજીક ભયાનક અકસ્માત: 22 શ્રમિકોના મોતની આશંકા

અરુણાચલ પ્રદેશના અંજા જિલ્લામાં ભારત-ચીન સરહદ નજીક એક ગમખ્વાર દુર્ઘટના સર્જાઈ છે. શ્રમિકોને લઈ જઈ રહેલી એક ટ્રક હાયુલિયાંગ-ચગલાગામ સરહદી માર્ગ પર કાબૂ ગુમાવી ઊંડી ખીણમાં ખાબકી હતી. ટ્રકમાં કુલ 21 શ્રમિકો સવાર હતા, જેમાંથી પ્રાથમિક અહેવાલ મુજબ 22 લોકોના કરુણ મોત થયા હોવાની આશંકા છે.

ખતરનાક પર્વતીય માર્ગ પર અકસ્માત : 

અંજા જિલ્લાના ડેપ્યુટી કમિશનર (DC) મિલો કોજિને આ અકસ્માતની પુષ્ટિ કરી છે. તેમણે જણાવ્યું કે અકસ્માત ખૂબ જ જોખમી પર્વતીય વળાંક પર થયો હતો. આ રસ્તો અત્યંત સાંકડો અને ઢાળવાળો છે. આ તમામ શ્રમિકો ભારત-ચીન સરહદ પર ચાલી રહેલા રોડ બાંધકામના સ્થળે જઈ રહ્યા હતા.

દુર્ઘટનાની ગંભીરતાને જોતાં જિલ્લા વહીવટીતંત્ર દ્વારા તાત્કાલિક પોલીસ, આપત્તિ વ્યવસ્થાપન દળો (NDRF/SDRF), અને સેનાની ટીમોને રાહત અને બચાવ કામગીરી માટે ઘટનાસ્થળે મોકલી આપવામાં આવી હતી

બચાવ કામગીરીમાં મુશ્કેલી : 

આ વિસ્તારની મુશ્કેલ ભૌગોલિક પરિસ્થિતિઓને કારણે બચાવ કામગીરીમાં ભારે મુશ્કેલીઓ પડી રહી છે. શ્રમિકો ખીણમાં ફસાયેલા હોવાથી તેમને બહાર કાઢવામાં સમય લાગી રહ્યો છે. અકસ્માત બાદ સૌથી પહેલા નજીકના ગ્રામજનો ઘટનાસ્થળે પહોંચ્યા અને મદદ શરૂ કરી હતી.

અધિકારીઓએ જણાવ્યું છે કે અકસ્માતનું ચોક્કસ કારણ જાણવા માટે સંપૂર્ણ તપાસ કરવામાં આવશે, જેમાં ટ્રકની ગતિ અને રસ્તાની સ્થિતિની ભૂમિકા ચકાસવામાં આવશે. સરહદી વિસ્તારોમાં કામ કરતા કામદારો દરરોજ જોખમી ભૂપ્રદેશ અને ખરાબ હવામાનનો સામનો કરે છે.