ત્રિપુરાના DGPનું શંકાસ્પદ મોત!

Tripura DGP Died In Office :ત્રિપુરાના પોલીસ વિભાગમાંથી એક ચોંકાવનારા સમાચાર સામે આવ્યા છે. રાજ્યના પોલીસ મહાનિર્દેશક (DGP) અનુરાગ ધનખડનો મૃતદેહ અગરતલામાં આવેલા રાજ્ય પોલીસ હેડક્વાર્ટરમાં તેમની ઓફિસમાંથી મળતા સમગ્ર પોલીસ તંત્ર અને વહીવટી તંત્રમાં ભારે ખળભળાટ મચી ગયો છે. શરૂઆતની માહિતી અનુસાર તેમને તાત્કાલિક હોસ્પિટલ લઈ જવામાં આવ્યા હતા, જ્યાં ડોક્ટરોએ તેમને મૃત જાહેર કર્યા હતા. જોકે, તેમના મૃત્યુનું ચોક્કસ કારણ હજુ સુધી સત્તાવાર રીતે જાહેર કરવામાં આવ્યું નથી અને સમગ્ર મામલે તપાસ શરૂ કરવામાં આવી છે.

ઓફિસમાંથી મળ્યો મૃતદેહ
સોમવારે અગરતલાના પોલીસ હેડક્વાર્ટરમાં અનુરાગ ધનખડ પોતાની ઓફિસમાં હતા. થોડા સમય બાદ તેમની ઓફિસમાંથી તેઓ બેભાન હાલતમાં મળ્યાની માહિતી સામે આવી. ત્યારબાદ તાત્કાલિક તેમને હોસ્પિટલ લઈ જવાયા, પરંતુ તબીબોએ તેમને મૃત જાહેર કર્યા. આ ઘટનાએ સમગ્ર રાજ્યમાં ચકચાર મચાવી દીધી છે.

હોસ્પિટલમાં પહોંચતા જ ડોક્ટરોએ તેમને મૃત જાહેર કર્યા
ઘટના પછી તરત જ અનુરાગ ધનખરને અગરતલાની ગોવિંદ વલ્લભ પંત હોસ્પિટલમાં લઈ જવામાં આવ્યા, જ્યાં ડોક્ટરોએ તેમને મૃત જાહેર કર્યા. ત્યારબાદ પોલીસે ઘટનાસ્થળેથી પુરાવા એકત્રિત કરવાનું શરૂ કર્યું.ફોરેન્સિક ટીમ પણ ઘટનાસ્થળે તપાસ કરી રહી છે.

ઘટનાસ્થળે ઉચ્ચ અધિકારીઓનો કાફલો પહોંચ્યો
પોલીસ મુખ્યાલય પરિસરમાંથી ડીજીપીનો મૃતદેહ મળી આવ્યા બાદ તુરંત જ વરિષ્ઠ અધિકારીઓ ઘટનાસ્થળે પહોંચી ગયા હતા. ઉચ્ચ સત્તાવાળા દ્વારા સમગ્ર વિસ્તારને કોર્ડન કરી લેવામાં આવ્યો છે અને ફોરેન્સિક ટીમ (Forensic Team) દ્વારા પ્રાથમિક તપાસ હાથ ધરવામાં આવી રહી છે. ઘટના પાછળનું સાચું કારણ શું છે તે અંગે હજુ સુધી કોઈ સત્તાવાર નિવેદન આપવામાં આવ્યું નથી.ઘટનાની જાણ થતાં જ રાજ્યના મુખ્યમંત્રી ડૉ. માણિક સહા સહિત મુખ્ય સચિવ અને અન્ય વરિષ્ઠ અધિકારીઓ હોસ્પિટલ પહોંચ્યા હતા. પોલીસ વિભાગના અનેક અધિકારીઓ પણ ઘટનાસ્થળે દોડી આવ્યા અને સમગ્ર પરિસ્થિતિની સમીક્ષા કરવામાં આવી.રાજ્યના સર્વોચ્ચ પોલીસ અધિકારીના અચાનક અવસાનથી સમગ્ર પોલીસ વિભાગમાં શોકનું વાતાવરણ છવાઈ ગયું છે. અનેક અધિકારીઓ અને કર્મચારીઓએ આ ઘટનાને આઘાતજનક ગણાવી છે.

કોણ હતા અનુરાગ ધનખડ?
અનુરાગ ધનખડ 1994 બેચના IPS અધિકારી હતા. તેઓ ત્રિપુરા કેડરના અધિકારી તરીકે લાંબા સમય સુધી વિવિધ મહત્વપૂર્ણ હોદ્દાઓ પર ફરજ બજાવી ચૂક્યા હતા. મે 2025માં તેમને ત્રિપુરાના નવા DGP તરીકે નિયુક્ત કરવામાં આવ્યા હતા. તે પહેલાં તેઓ ઇન્ટેલિજન્સ સહિત અનેક મહત્વપૂર્ણ વિભાગોમાં સેવા આપી ચૂક્યા હતા.ધનખડે ત્રિપુરામાં આશરે 16 વર્ષથી વધુ સમય વિવિધ જવાબદારીઓ સંભાળી હતી.કાયદો અને વ્યવસ્થા, ગુનાખોરી નિયંત્રણ, આતંકવાદ વિરોધી કામગીરી અને આધુનિક પોલીસિંગ ક્ષેત્રે તેમનો અનુભવ નોંધપાત્ર માનવામાં આવતો હતો.તેમણે અગાઉ કેન્દ્રીય તપાસ એજન્સીઓમાં પણ મહત્વપૂર્ણ જવાબદારીઓ નિભાવી હતી. ખાસ કરીને CBIમાં તેમની કામગીરી દરમિયાન અનેક ચર્ચિત કેસોની તપાસમાં તેમની ભૂમિકા રહી હોવાનું મીડિયા અહેવાલોમાં નોંધાયું છે.

પોલીસ હેડક્વાર્ટરની ઓફિસ સીલ
જે રૂમમાં આ ઘટના બની તેને સુરક્ષાના કારણોસર સીલ કરી દેવામાં આવ્યો છે.ઘટના બાદ પોલીસ અને સંબંધિત એજન્સીઓએ સમગ્ર ઘટનાની તપાસ શરૂ કરી છે. ઓફિસનું નિરીક્ષણ, ફોરેન્સિક તપાસ અને અન્ય જરૂરી પ્રક્રિયાઓ હાથ ધરવામાં આવી રહી છે. અધિકારીઓએ જણાવ્યું છે કે તપાસ પૂર્ણ થયા બાદ જ સમગ્ર ઘટનાક્રમ સ્પષ્ટ થશે.હાલ સમગ્ર દેશની નજર પોસ્ટમોર્ટમ રિપોર્ટ અને તપાસના સત્તાવાર પરિણામો પર છે. મૃત્યુનું કારણ સ્પષ્ટ કરવા માટે આ રિપોર્ટ નિર્ણાયક સાબિત થઈ શકે છે.

મૃત્યુનું કારણ હજુ સ્પષ્ટ નથી
પ્રારંભિક મીડિયા અહેવાલોમાં કેટલીક જગ્યાએ આત્મહત્યાની શંકાનો ઉલ્લેખ કરવામાં આવ્યો છે, પરંતુ પોલીસે હજુ સુધી તેના વિશે કોઈ સત્તાવાર પુષ્ટિ કરી નથી. અધિકારીઓએ જણાવ્યું છે કે મૃત્યુનું વાસ્તવિક કારણ પોસ્ટમોર્ટમ અને તપાસ પૂર્ણ થયા બાદ જ સ્પષ્ટ થશે. તેથી હાલ કોઈપણ કારણને અંતિમ માનવું યોગ્ય નથી.

સત્તાવાર નિવેદનની રાહ
રાજ્ય સરકાર અને પોલીસ વિભાગ તરફથી વધુ વિગતવાર માહિતી તપાસ આગળ વધતા જાહેર કરવામાં આવશે. હાલ ઉપલબ્ધ માહિતી મુજબ માત્ર એટલું જ પુષ્ટિ થયેલું છે કે અનુરાગ ધનખડનો મૃતદેહ પોલીસ હેડક્વાર્ટરમાંથી મળ્યો હતો અને મૃત્યુના કારણની તપાસ ચાલુ છે.