Kolkata : MBBS સ્ટુડન્ટનો મૃતદેહ પંખાથી લટકતો મળ્યો, આરજી કર મેડિકલ કોલેજમાં કરતી હતી અભ્યાસ

પશ્ચિમ બંગાળના કોલકાતા સ્થિત આરજી કર મેડિકલ કોલેજ સાથે જોડાયેલા વધુ એક મોટા સમાચાર સામે આવ્યા છે. આરજી કર મેડિકલ કોલેજની MBBSના બીજા વર્ષની વિદ્યાર્થિનીનો મૃતદેહ બેરકપુરમાં તેના રૂમમાં પંખાથી લટકતી હાલતમાં મળી આવ્યો હતો. વિદ્યાર્થીના મૃતદેહ પાસે કોઈ સુસાઈડ નોટ મળી નથી. 

શું છે સમગ્ર મામલો?

ઉત્તર 24 પરગના જિલ્લાના કમરહાટી ક્વાર્ટરમાં ગુરુવારે રાત્રે આરજી કર મેડિકલ કોલેજમાંથી MBBS કરી રહેલી વિદ્યાર્થીનીની લાશ લટકતી હાલતમાં મળી આવી હતી. વિદ્યાર્થીનીની ઉંમર માત્ર 20 વર્ષની હતી. પોલીસ સૂત્રોનું કહેવું છે કે મૃતક વિદ્યાર્થીની માતા વ્યવસાયે ડોક્ટર છે અને તેના પિતા બેંક કર્મચારી છે. પિતા કામ માટે મુંબઈમાં રહેતા હતા અને વિદ્યાર્થીની તેની માતા સાથે તેમના હોસ્પિટલના ક્વાર્ટર્સમાં રહેતી હતી.

ગુરુવારે રાત્રે વિદ્યાર્થિની તેના ક્વાર્ટરમાં એકલી હતી. બહારથી લોકોએ ફોન કરતાં દરવાજો ન ખૂલતાં દરવાજો તોડ્યો હતો. અહીં મેડિકલ સ્ટુડન્ટનો મૃતદેહ પંખાથી લટકતી હાલતમાં મળી આવ્યો હતો. જોકે, મૃતદેહ પાસે કોઈ સુસાઈડ નોટ મળી નથી. પોલીસે અકુદરતી મૃત્યુનો ગુનો નોંધી તપાસ શરૂ કરી છે. જો કે, મૃતક વિદ્યાર્થીના પરિવારજનો મીડિયાને મોતના કારણ અંગે કંઈ જણાવી રહ્યા નથી.

તમને જણાવી દઈએ કે, ગયા વર્ષે 9 ઓગસ્ટના રોજ આરજી કર મેડિકલ કોલેજ અને હોસ્પિટલમાં એક મહિલા તાલીમાર્થી ડોક્ટર સાથે બળાત્કાર અને હત્યાનો મામલો સામે આવ્યા બાદ વ્યાપક વિરોધ થયો હતો. આ કેસમાં દોષિત સંજય રોયને સિયાલદહ જિલ્લા અને સેશન્સ કોર્ટે આજીવન કેદની સજા ફટકારી હતી. જોકે, CBI એ કોર્ટમાં સંજય રોયને ફાંસીની સજાની માંગ કરી હતી.

18 જાન્યુઆરીના રોજ સિયાલદહ કોર્ટે સંજય રોયને ઓગસ્ટ 2024 માં આરજી કર હોસ્પિટલની મહિલા તાલીમાર્થી ડૉક્ટર પર બળાત્કાર અને ગળું દબાવવા માટે દોષિત ઠેરવ્યો હતો.