મુઝફ્ફરપુરમાં મોટો માર્ગ અકસ્માત, નેપાળના 5 શ્રદ્ધાળુઓના મોત, 4 ગંભીર રીતે ઘાયલ

બિહાર (Bihar)ના મુઝફ્ફરપુરમાં મહાકુંભમાંથી પરત ફરી રહેલા નેપાળી શ્રદ્ધાળુઓ સાથે મોટો અકસ્માત થયો છે. બાઇક બચાવવાનો પ્રયાસ કરતી વખતે શ્રદ્ધાળુઓથી ભરેલી સ્કોર્પિયો પલટી ખાઇ ગઇ હતી. આ અકસ્માતમાં 5 લોકોના મોત થયા હતા, જ્યારે 4 લોકો ઘાયલ થયા હતા. સૂત્રોના જણાવ્યા અનુસાર તમામ ઘાયલોને સારવાર માટે SKMCH માં દાખલ કરવામાં આવ્યા છે. અકસ્માત સમયે સ્કોર્પિયોની ઝડપ 100 કિલોમીટર પ્રતિ કલાકથી વધુ હોવાનું કહેવાય છે. આ અકસ્માત સદર પોલીસ સ્ટેશન વિસ્તારમાં મધુબની મંદિર પાસે ચાર માર્ગીય રોડ પર થયો હતો.

પ્રત્યક્ષદર્શીઓના જણાવ્યા અનુસાર, એક બાઇક સવાર અચાનક જ ઝડપથી આવતા વાહનની સામે આવી ગયો હતો. તેને બચાવવાનો પ્રયાસ કરતી વખતે ડ્રાઈવરે અચાનક કાબુ ગુમાવી દીધો, જેના કારણે કાર ડિવાઈડર સાથે અથડાઈ. આ પછી કાર પલટી ગઈ. અવાજ સાંભળીને લોકોના ટોળા સ્થળ પર એકઠા થઈ ગયા હતા. આ પછી પોલીસને જાણ કરવામાં આવી હતી. પોલીસ મૃતકોની ઓળખ માટે પ્રયાસો કરી રહી છે.

તમામ ઘાયલો નેપાળના રહેવાસી...

જણાવવામાં આવી રહ્યું છે કે, તમામ ઘાયલો નેપાળના જનકપુર વિસ્તારના રહેવાસી છે. પોલીસના જણાવ્યા અનુસાર, વાહન 3 થી 4 વખત પલટી ગયું હતું. પોલીસે ઘાયલોની માહિતી લીધી છે. તમામ મૃતકો અને ઇજાગ્રસ્તો એક જ પરિવારના હોવાનું કહેવાય છે, જેઓ મહાકુંભમાંથી પરત ફરી રહ્યા હતા. ઇજાગ્રસ્તોમાં એક બાળક પણ સામેલ છે; અકસ્માત દરમિયાન વાહનની એરબેગ્સ પણ ખુલી ન હતી. શુક્રવારે સાંજે પણ મહાકુંભમાં સંગમમાં સ્નાન કરીને પરત ફરી રહેલા લોકો સાથે મોટો અકસ્માત સર્જાયો હતો. ગાઝીપુરમાં બાંસગાંવના હરદિચક ગામના આઠ શ્રદ્ધાળુઓના મોત થયા હતા. આ વાત ગામમાં પહોંચતા જ હોબાળો મચી ગયો હતો. આ ગામના 24 લોકો કુંભમાં સ્નાન કરવા ગયા હતા.

બારાંમાં મહિલાએ જીવ ગુમાવ્યો...

શનિવારે, UP ના બારાંના કેલવાડા શહેરમાંથી કુંભ માટે ગયેલા પરિવારની કાર કાનપુર-પ્રયાગરાજ રોડ પર અકસ્માતનો ભોગ બની હતી. એક મહિલાનું ઘટનાસ્થળે જ મોત નીપજ્યું હતું, જ્યારે 7 લોકો ઘાયલ હોવાનું કહેવાય છે. પરિવાર 25 જાન્યુઆરીએ ચિત્રકૂટ ગયો હતો. ત્યાંથી તેઓ 26 મીએ અયોધ્યા અને 27 મી જાન્યુઆરીએ મહાકુંભ જવા રવાના થયા હતા. 30 જાન્યુઆરીએ રાત પડયા બાદ પરિવારના સભ્યોએ મા કાત્યાયની મંદિરમાં આરામ કર્યો હતો. શુક્રવારે સવારે 5.30 કલાકે તેઓ બહાર નીકળ્યા ત્યારે અજાણ્યા વાહને તેમને ટક્કર મારી હતી.