CA વિદ્યાર્થીઓ માટે લેવાયો આ મહત્વપૂર્ણ નિર્ણય

ચાર્ટર્ડ એકાઉન્ટન્ટ બનવાની પ્રક્રિયામાં પ્રેક્ટિકલ ટ્રેનિંગને વધુ પારદર્શક અને ટેકનોલોજી આધારિત બનાવવા માટે ઇન્સ્ટિટ્યૂટ ઓફ ચાર્ટર્ડ એકાઉન્ટન્ટ્સ ઓફ ઇન્ડિયા (ICAI)એ મહત્વપૂર્ણ પગલું ભર્યું છે. ICAI દ્વારા આર્ટિકલ ટ્રેનીઝ માટે ફરજિયાત E-ડાયરી સિસ્ટમની જાહેરાત કરવામાં આવી છે, જે 1 જાન્યુઆરી 2026થી અમલમાં આવશે.

નવી વ્યવસ્થા હેઠળ CA વિદ્યાર્થીઓને હવે પોતાની હાજરી, કરવામાં આવેલા કામ અને શીખવાની વિગતો ડિજિટલ માધ્યમથી નોંધવી ફરજિયાત રહેશે. આ E-ડાયરી સિસ્ટમનો મુખ્ય હેતુ આર્ટિકલ ટ્રેનિંગમાં એકરૂપતા લાવવો, ગુણવત્તા સુધારવી અને રિયલ-ટાઇમ મોનીટરીંગ શક્ય બનાવવાનો છે.

ICAI દ્વારા સ્પષ્ટ કરવામાં આવ્યું છે કે ટ્રેનીઝે દર પંદર દિવસે પોતાના દ્વારા કરવામાં આવેલા કાર્યો E-ડાયરીમાં અપલોડ કરવાના રહેશે. સિસ્ટમ દ્વારા એન્ટ્રીઓની પૂર્ણતા ચકાસવામાં આવશે. ત્યારબાદ પ્રિન્સિપલ (મેન્ટર CA) એન્ટ્રીઓનું રિવ્યુ કરશે અને જરૂરી સુધારા સૂચવી શકશે. સૂચન મળ્યા બાદ ટ્રેનીને 7 દિવસમાં સુધારેલી એન્ટ્રી ફરી સબમિટ કરવી પડશે.

આ ડિજિટલ ડાયરી સિસ્ટમમાં સ્ટાઇપેન્ડની માહિતી પણ સામેલ રહેશે, જે પેમેન્ટના પ્રથમ પંદર દિવસમાં દેખાશે. ઉપરાંત, ટ્રેનીઝ પોતાના જૂના રેકોર્ડ જોઈ શકશે, સબમિશન પહેલા એડિટ અથવા ડિલીટ કરી શકશે અને એપ્રુવલ સ્ટેટસ પણ ટ્રેક કરી શકશે.

E-ડાયરી સિસ્ટમને ICAIના Self Service Portal (SSP) સાથે જોડવામાં આવી છે. ટ્રેનીઝ SSPના લોગિન ક્રેડેન્શિયલ્સ દ્વારા સીધી ઍક્સેસ મેળવી શકશે. આ પ્લેટફોર્મ Form 109 (ટ્રેનિંગ ટર્મિનેશન) સાથે પણ લિંક રહેશે અને ICAIની ટ્રેનિંગ માર્ગદર્શિકાઓ સાથે સુસંગત રહેશે. 

ICAIનું માનવું છે કે આ પહેલથી આર્ટિકલ ટ્રેનિંગની ગુણવત્તા સમાન થશે. ટ્રેનીઝ પોતાનું કામ સ્વયં મૂલ્યાંકન કરી શકશે, શીખણમાં રહેલી ખામી ઓળખી શકશે અને ઓડિટ, ટેક્સેશન તથા કન્સલ્ટન્સી જેવા ક્ષેત્રોમાં કેટલો સમય આપ્યો તે સ્પષ્ટ રીતે જાણી શકશે.

પ્રિન્સિપલ CA માટે પણ આ સિસ્ટમ ઉપયોગી સાબિત થશે. તેઓ ટ્રેનીઝની કામગીરી પર રિયલ-ટાઇમ નજર રાખી શકશે, ક્ષમતાના આધારે કામ વહેંચી શકશે અને તાલીમને વધુ અસરકારક બનાવી શકશે. સાથે સાથે, દસ્તાવેજી પ્રક્રિયા સરળ બનશે અને કાગળ આધારિત કામગીરીમાં ઘટાડો થશે.