તમિલનાડુમાં ભીષણ માર્ગ અકસ્માત: 12એ જીવ ગુમાવ્યો

તમિલનાડુના શિવગંગા જિલ્લામાં રવિવારે સાંજે એક ગમખ્વાર માર્ગ અકસ્માત સર્જાયો, જેણે સમગ્ર વિસ્તારને હચમચાવી દીધો. કુન્ગમગુડી નજીક એક સાંકડી સડક પર બે બસો સામસામે ટકરાઈ હતી. ટક્કર એટલી ભીષણ હતી કે ઘટનાસ્થળે જ ૧૨ લોકોના મોત નીપજ્યા અને ૪૦ થી વધુ મુસાફરો ગંભીર રીતે ઘાયલ થયા.

બંને બસોના આગળના ભાગને ભારે નુકસાન થયું હતું. અકસ્માતનો જોરદાર અવાજ સાંભળીને આસપાસના લોકો તરત જ ઘટનાસ્થળે દોડી આવ્યા હતા. સ્થાનિક લોકો અને પોલીસે સાથે મળીને બસની બારીઓ અને દરવાજા તોડીને અંદર ફસાયેલા મુસાફરોને બહાર કાઢવા માટે ભારે જહેમત ઉઠાવવી પડી હતી.

40થી વધુ ઘાયલો હોસ્પિટલમાં દાખલ

પોલીસના જણાવ્યા અનુસાર, ઘાયલોને તાત્કાલિક શિવગંગા અને કારાઇકુડીની સરકારી હોસ્પિટલોમાં ખસેડવામાં આવ્યા છે. ઘણા મુસાફરોને ગંભીર ફ્રેક્ચર, માથામાં ગંભીર ઈજાઓ અને આંતરિક ઈજાઓ પહોંચી છે, જેના કારણે અનેક ઘાયલોની હાલત હજુ પણ ગંભીર જળવાયેલી છે.

પોલીસનું કહેવું છે કે અકસ્માતનું ચોક્કસ કારણ સ્પષ્ટ નથી, પરંતુ પ્રાથમિક સંકેતો ઓવરસ્પીડિંગ, ઓછી વિઝિબિલિટી અથવા ડ્રાઇવરની થાક તરફ ઇશારો કરે છે. પોલીસે અકસ્માત અંગે કેસ નોંધીને તપાસ શરૂ કરી છે.

તમિલનાડુમાં માર્ગ સલામતી પર સવાલો

શિવગંગામાં થયેલા આ ભીષણ અકસ્માતે એકવાર ફરી તમિલનાડુમાં વધી રહેલી માર્ગ અકસ્માતોની ગંભીર સમસ્યાને સામે લાવી દીધી છે. આંકડા દર્શાવે છે કે તમિલનાડુમાં 2023 દરમિયાન 67,000થી વધુ માર્ગ અકસ્માતો નોંધાયા હતા, જે સમગ્ર ભારતમાં સૌથી વધુ છે.

લોકો હવે માંગ કરી રહ્યા છે કે સરકારી બસો પરની દેખરેખ વધારવામાં આવે, ડ્રાઇવરોના સ્વાસ્થ્યની નિયમિત તપાસ થાય અને ખરાબ રસ્તાઓનું તાત્કાલિક સમારકામ કરવામાં આવે.