તેલંગાણા: ટ્રક-બસની ટક્કરમાં 20નાં મોત, 18 ઘાયલ

તેલંગાણાના રંગા રેડ્ડી જિલ્લામાં સોમવારે સવારે એક માર્ગ અકસ્માતમાં 20 લોકોનાં મૃત્યુ થયા છે, જ્યારે 18થી વધુ લોકો ઘાયલ થયા હોવાનું પોલીસ દ્વારા જણાવવામાં આવ્યું છે. ચેવેલ્લા મંડળના મિર્જાગુડા ગામ પાસે કાંકરી ભરેલો એક ટ્રક (લોરી) રાજ્ય સંચાલિત રોડ ટ્રાન્સપોર્ટ કોર્પોરેશન (RTC)ની બસ સાથે ધડાકાભેર અથડાયો હતો.

ટ્રકનો કાટમાળ બસ પર પડ્યો

પોલીસના જણાવ્યા અનુસાર, ટેન્ડુર ડેપોની આ બસમાં અંદાજે 70 મુસાફરો સવાર હતા અને તે હૈદરાબાદ તરફ જઈ રહી હતી. સામેથી પૂરપાટ ઝડપે આવી રહેલા ટ્રકે બસને ટક્કર મારતાં ટ્રક બસ પર પલટી ગયો હતો. ટક્કર એટલી ગંભીર હતી કે ટ્રકમાં ભરેલી કાંકરીનો માલસામાન બસ પર પડ્યો, જેના કારણે અનેક મુસાફરો તેની નીચે ફસાઈ ગયા હતા.

મૃતકોમાં RTC બસના ડ્રાઇવર અને ટ્રકના ડ્રાઇવર ઉપરાંત અનેક મહિલાઓ અને તેમની સાથે 10 મહિનાના એક માસૂમ બાળકનો પણ સમાવેશ થાય છે. ઘટનાસ્થળ પર લોકોની બૂમો અને કરૂણ દ્રશ્યો સર્જાતા સ્થાનિકોએ તાત્કાલિક મદદ માટે દોટ મૂકી હતી.

બચાવ કાર્યમાં JCBનો ઉપયોગ

ઘટનાની જાણ થતાં જ ઇમરજન્સી ટીમો અને બચાવ દળો સ્થળ પર પહોંચી ગયા હતા. કાટમાળ હટાવી ફસાયેલા મુસાફરોને બહાર કાઢવા માટે ત્રણ JCB મશીનનો ઉપયોગ કરવામાં આવ્યો હતો. આ બસમાં મોટાભાગના વિદ્યાર્થીઓ અને ઓફિસ જનારા લોકો હતા, જેઓ સપ્તાહાંતની રજાઓ પછી શહેરમાં પાછા ફરી રહ્યા હતા.

આ બચાવ કામગીરી દરમિયાન ચેવેલ્લા સર્કલ ઇન્સ્પેક્ટર ભૂપાલ શ્રીધરને JCBની ટક્કર વાગતાં ડાબા પગમાં ઈજા થઈ હતી અને તેમને હોસ્પિટલમાં ખસેડવામાં આવ્યા હતા. ઘાયલોને ચેવેલ્લા સરકારી હોસ્પિટલમાં ખસેડવામાં આવ્યા છે, જ્યારે ગંભીર ઈજા પામેલા લોકોને વધુ સારી સારવાર માટે હૈદરાબાદ રિફર કરાયા છે. અધિકારીઓએ જણાવ્યું છે કે કેટલાક ઘાયલોની સ્થિતિ ગંભીર હોવાથી મૃત્યુઆંકમાં વધારો થવાની શક્યતા છે.

ઉચ્ચ સ્તરીય તપાસના આપ્યા આદેશ

આ દુર્ઘટના પર તેલંગાણાના મુખ્યમંત્રી એ. રેવંત રેડ્ડીએ આઘાત વ્યક્ત કર્યો છે અને મુખ્ય સચિવ તથા પોલીસ મહાનિર્દેશકને તાત્કાલિક રાહત અને બચાવના પગલાં લેવાનો નિર્દેશ આપ્યો છે. તેમણે તમામ ઘાયલોને વિલંબ વિના હૈદરાબાદ શિફ્ટ કરવાનો આદેશ આપ્યો છે. પ્રાથમિક અહેવાલો મુજબ, ટ્રક ડ્રાઇવરની ઓવરસ્પીડ અને બેકાબૂ થવાને કારણે આ અકસ્માત થયો હોવાનું માનવામાં આવે છે, જે અંગે પોલીસ દ્વારા સઘન તપાસ શરૂ કરાઈ છે.