T20 વર્લ્ડ કપ : ઈડન ગાર્ડન્સની ટિકિટના ભાવ જાહેર

T20 વર્લ્ડ કપ 2026: કોલકાતાના ઈડન ગાર્ડન્સમાં માત્ર ₹100માં માણી શકાશે મેચ, જાણો સંપૂર્ણ વિગત : 

ભારત અને શ્રીલંકાની યજમાનીમાં યોજાનારા T20 વર્લ્ડ કપ 2026ને લઈને ક્રિકેટ પ્રેમીઓમાં ભારે ઉત્સાહ જોવા મળી રહ્યો છે. આ ટુર્નામેન્ટની 10મી સીઝન 7 ફેબ્રુઆરીથી શરૂ થવા જઈ રહી છે. આ દરમિયાન કોલકાતાના ઐતિહાસિક ઈડન ગાર્ડન્સ મેદાન ખાતે રમાનારી મેચો માટે ટિકિટના દરોની સત્તાવાર જાહેરાત ક્રિકેટ એસોસિએશન ઓફ બંગાળ (CAB) દ્વારા કરવામાં આવી છે.

સૌથી સસ્તી ટિકિટ ₹100 થી શરૂ :

ક્રિકેટ ચાહકો માટે સારા સમાચાર એ છે કે કેટલીક મેચોની ટિકિટ માત્ર 100 રૂપિયામાં ઉપલબ્ધ થશે. બાંગ્લાદેશ વિરુદ્ધ ઈટાલી, ઈંગ્લેન્ડ વિરુદ્ધ ઈટાલી અને વેસ્ટ ઈન્ડિઝ વિરુદ્ધ ઈટાલી જેવી ગ્રુપ મેચો માટે અપર બ્લોક્સની ટિકિટની કિંમત ₹100 રાખવામાં આવી છે. જ્યારે આ મેચો માટે પ્રીમિયમ હોસ્પિટાલિટી ટિકિટ ₹4,000 સુધી રહેશે.

હાઈ-વોલ્ટેજ મેચો માટે અલગ ભાવ : 

વેસ્ટ ઈન્ડિઝ vs બાંગ્લાદેશ અને ઈંગ્લેન્ડ vs બાંગ્લાદેશ જેવી મેચોમાં પ્રેક્ષકોની વધુ ભીડ રહેવાની શક્યતાને જોતા તેના ભાવ થોડા વધારે રખાયા છે. આ મેચો માટે ટિકિટનો દર ₹300 થી શરૂ થઈને ₹5,000 સુધી રહેશે.

સેમીફાઈનલ અને સુપર-8 ના ભાવ : 

ઈડન ગાર્ડન્સમાં રમાનારી સુપર-8 અને સેમીફાઈનલ મેચો માટે ક્રિકેટ ચાહકોએ વધુ ખિસ્સા હળવા કરવા પડશે. આ મહત્વની મેચો માટે પ્રીમિયમ હોસ્પિટાલિટી ટિકિટ ₹10,000 છે, જ્યારે સૌથી સસ્તી ટિકિટ (અપર બ્લોક) ₹900માં મળશે. નોંધનીય છે કે ટીમ ઈન્ડિયા લીગ સ્ટેજમાં આ મેદાન પર કોઈ મેચ રમવાની નથી, જેના કારણે ભારતની મેચો માટે ₹100 વાળી ટિકિટ ઉપલબ્ધ રહેશે નહીં.