NEET-UG પુનઃ પરીક્ષામાં સોલ્વર ગેંગનો પર્દાફાશ!

બિહારના લખીસરાયમાં રવિવારે NEET UG પુનઃપરીક્ષા દરમિયાન મુખ્ય સોલ્વર ગેંગનો પર્દાફાશ થયો છે. ત્રણ પરીક્ષા કેન્દ્રોમાંથી સાત સોલ્વર અને એક બાયોમેટ્રિક કંપનીના 14 કર્મચારીઓ સહિત 24 આરોપીઓની ધરપકડ કરવામાં આવી છે. તપાસમાં બહાર આવ્યું છે કે, પરીક્ષામાં બેસવા માટે નકલી ઉમેદવારો પાસેથી 30 થી 40 લાખ રૂપિયા વસૂલવામાં આવ્યા હતા.

બિહારમાં NEET UG પુનઃ પરીક્ષા દરમિયાન મુખ્ય સોલ્વર ગેંગનો પર્દાફાશ કરવામાં આવ્યો છે. લખીસરાય જિલ્લામાં ત્રણ પરીક્ષા કેન્દ્રો પર વહીવટીતંત્ર અને પોલીસ દ્વારા સંયુક્ત કાર્યવાહીમાં સાત સોલ્વર સહિત 24 આરોપીઓની ધરપકડ કરવામાં આવી છે. પકડાયેલાં આરોપીઓમાં બાયોમેટ્રિક વેરિફિકેશન કંપનીના 14 કર્મચારીઓ પણ સામેલ છે. પ્રાથમિક તપાસમાં જાણવા મળ્યું છે કે, અસલી ઉમેદવારોની જગ્યાએ ડમી લોકોને પરીક્ષા આપવા 30 લાખમાં સોદો કરવામાં આવ્યો હતો.

તપાસ એજન્સીઓના જણાવ્યા અનુસાર, આ સમગ્ર રેકેટનો મુખ્ય સૂત્રધાર અર્પિત રાજ છે. જે ગયા મેડિકલ કોલેજનો વિદ્યાર્થી હોવાનું કહેવાય છે. અર્પિતનું નામ 2024ના કુખ્યાત NEET પેપર લીક કેસમાં પણ સામે આવ્યું હતું. તે સમયે CBI દ્વારા તેની પૂછપરછ કરવામાં આવી હતી. હવે, તેનું નામ ફરીથી  પરીક્ષા છેતરપિંડી સંબંધિત કેસમાં સામે આવ્યું છે. જેનાથી ઘણા સવાલ ઉભા થયા છે.

સોલ્વર ગેંગનો કેવી રીતે પર્દાફાશ થયો?
પોલીસના જણાવ્યા અનુસાર, હાજીપુરનો PMCHના વિદ્યાર્થી મયંક કશ્યપ શંકાસ્પદ પ્રવૃત્તિઓ કરતાં પકડાયો હતો. મયંક કથિત રીતે બાયોમેટ્રિક કંપનીના કર્મચારી તરીકે પરીક્ષા કેન્દ્રમાં પ્રવેશ્યો હતો. વહીવટીતંત્રને તેની પ્રવૃત્તિઓ પર શંકા ગઈ હતી. જેના કારણે તેની અટકાયત કરીને પૂછપરછ કરવામાં આવી હતી. તેના આધારે, લખીસરાય પોલીસે સરકારી હાઇસ્કૂલ હસનપુર, KRK હાયર સેકન્ડરી સ્કૂલ અને કેન્દ્રીય વિદ્યાલય પરીક્ષા કેન્દ્રો પર દરોડા પાડીને આરોપીઓની ધરપકડ કરી હતી. પોલીસના જણાવ્યા અનુસાર આરોપીઓ પાસેથી મોબાઇલ ફોન અને ઘણા મહત્વપૂર્ણ દસ્તાવેજો પણ મળી આવ્યા છે.

મેડિકલ વિદ્યાર્થીઓની ધરપકડ
તપાસમાં એ પણ બહાર આવ્યું હતું કે, BHUમાં નર્સિંગની વિદ્યાર્થીની પૂનમ કુમારી એક ઉમેદવારની જગ્યાએ પરીક્ષા આપી રહી હતી. આ રેકેટમાં રાયબરેલીના એઈમ્સના વિદ્યાર્થી સૌરભ ઝા, પટનાના NMCHના વિદ્યાર્થી સંજીત અને ઉત્તર પ્રદેશની મેડિકલ કોલેજના વિદ્યાર્થી અમન અગ્રવાલ પણ સામેલ હોવાનું જાણવા મળ્યું છે. પોલીસે લખીસરાયથી નવ શંકાસ્પદ "મુન્ના ભાઈ" ની પણ ધરપકડ કરી છે. આરોપીઓમાં એક KRK વિદ્યાલયમાંથી, સાત કેન્દ્રીય વિદ્યાલયમાંથી અને એક હસનપુર પરીક્ષા કેન્દ્રમાંથી પકડાયો હતો. બધા શંકાસ્પદ લખીસરાયના રહેવાસી હોવાનું કહેવાય છે.

ઉલ્લેખનીય છે કે, મેડિકલ વિદ્યાર્થીઓને સોલ્વર બનતા અટકાવવા માટે આરોગ્ય વિભાગે રાજ્યભરની તમામ મેડિકલ કોલેજોમાં પરીક્ષા દરમિયાન બપોરે 2 થી સાંજે 5 વાગ્યા સુધી સેમિનાર અને ક્વિઝનું આયોજન કરી તેમની હાજરી ફરજિયાત બનાવી હતી. આમ છતાં, PMCH ના એક વિદ્યાર્થીને કથિત રીતે સોલ્વર કરતી વખતે પકડવામાં આવ્યો હતો, જેનાથી સુરક્ષા વ્યવસ્થા પર ગંભીર પ્રશ્નો ઉભા થયા હતા.

દેશના 5,400 પરીક્ષા કેન્દ્રો પર યોજાયેલી પુનઃ-NEET પરીક્ષા અંગે વિદ્યાર્થીઓની મિશ્ર પ્રતિક્રિયાઓ મળી છે. નિષ્ણાતોના મતે ભૌતિકશાસ્ત્રનું પેપર સૌથી મુશ્કેલ અને લાંબુ હતું. જેના કારણે ઉમેદવારોના સરેરાશ સ્કોરમાં 10 થી 20 ગુણનો ઘટાડો થઈ શકે છે. રસાયણશાસ્ત્રનું સ્તર સરેરાશ હતું. જીવવિજ્ઞાન પ્રમાણમાં સરળ હતું. નિષ્ણાતો માને છે કે મુશ્કેલ ભૌતિકશાસ્ત્રના પેપરને કારણે આ વખતે કટ-ઓફમાં 10 થી 15 ગુણનો ઘટાડો જોવા મળી શકે છે.