રૂપિયો ગગડવા બાદતે નાણાણંત્રીએ આપ્યો સંસદમાં જવાબ

કેન્દ્રીય નાણામંત્રી નિર્મલા સીતારમણે તાજેતરમાં એક કાર્યક્રમ દરમિયાન ડોલર સામે સતત નબળા થઈ રહેલા ભારતીય રૂપિયાની સ્થિતિ અંગે પ્રતિક્રિયા આપી હતી. તેમણે ભારપૂર્વક જણાવ્યું હતું કે રૂપિયાની વર્તમાન પરિસ્થિતિ અંગે ચિંતા કરવાની કોઈ જરૂર નથી, અને રૂપિયો પોતાનું સંતુલન (લેવલ) જાતે જ બનાવી લેશે.

નોંધનીય છે કે અમેરિકન ડોલર સામે ભારતીય રૂપિયો ગગડીને 90ના સ્તરને પાર કરી ગયો છે. હાલમાં જ 3જી ડિસેમ્બરે રૂપિયો 90.43 સુધી પહોંચ્યો હતો, જે અત્યાર સુધીનો સૌથી નીચો રેકોર્ડ છે. ગુરુવારે ડોલર સામે રૂપિયો 89.89 પર અને શુક્રવારે 89.94 પર બંધ રહ્યો હતો.

UPA સમયની પરિસ્થિતિ હતી અલગ

ડોલરના મુકાબલે રૂપિયાની નબળી સ્થિતિ અંગેના પ્રશ્નોના જવાબમાં નાણામંત્રી સીતારમણે ભૂતકાળની પરિસ્થિતિઓનો ઉલ્લેખ કર્યો હતો. તેમણે કહ્યું કે, "જ્યારે અમે વિપક્ષમાં હતા અને રૂપિયાની સ્થિતિ અંગે સવાલ ઉઠાવતા હતા, ત્યારે પરિસ્થિતિ આજે કરતાં ઘણી જુદી હતી."

તેમણે ઉમેર્યું કે, UPAના શાસનકાળમાં મોંઘવારીનું પ્રમાણ ખૂબ જ વધારે હતું, અર્થવ્યવસ્થાની સ્થિતિ સારી નહોતી, અને આવી સ્થિતિમાં જો કરન્સી પર અસર પડે તો તેનાથી દરેક વ્યક્તિ પ્રભાવિત થાય છે.

કરન્સીને વ્યાપક સંકેતમાં જોવાની અપીલ

સીતારમણે રૂપિયાના મૂલ્યાંકન (કરન્સી વેલ્યુએશન)ની વાત કરતી વખતે લોકોને રૂપિયાની સ્થિતિને વ્યાપક આર્થિક સંકેતોના સંદર્ભમાં જોવાની અપીલ કરી હતી.

આ દરમિયાન તેમણે દેશના અર્થતંત્રના માળખાને સમજાવતા કહ્યું હતું કે, "અર્થતંત્રના પાયાના સિદ્ધાંતોને જુઓ. આપણે અત્યારે જે સ્થિતિમાં છીએ, તેમાં અમુક પરિબળો ખૂબ જ મહત્વપૂર્ણ છે, જે ભારતને થોડી અલગ સ્થિતિમાં મૂકે છે." તેમણે ભારપૂર્વક જણાવ્યું કે રૂપિયાની આ ચર્ચાને આપણે આર્થિક વાસ્તવિકતાઓના સંદર્ભમાં કરવી જરૂરી છે.