અયોધ્યામાં રામ મંદિર પાસે શંકાસ્પદ ડ્રોન દેખાયું

ઉત્તર પ્રદેશના અયોધ્યામાં રામ મંદિરમાં એકઠી થયેલી ભીડ પર સોમવારે સાંજે અચાનક  ડ્રોન પડ્યું હતું. જે બાદ પોલીસે તાત્કાલિક ડ્રોનને કબજે કરી તપાસ શરૂ કરી. પોલીસના જણાવ્યા અનુસાર લોકોમાં ભાગદોડ જેવી સ્થિતિ ઊભી કરવા માટે કોઈએ આ કૃત્ય કર્યું હતું જેની તપાસ હાલ ચાલુ છે.

અયોધ્યામાં રામ લલ્લા દર્શન માર્ગ પર ડ્રોન કેમેરા જોવા મળ્યા બાદ, સુરક્ષા દળોએ એન્ટી-ડ્રોન સિસ્ટમનો ઉપયોગ કરીને તેને તોડી પાડ્યો. હવે પોલીસ ડ્રોન કેમેરા ઉડાડનાર વ્યક્તિને શોધવામાં વ્યસ્ત છે. આ અંગે ગુપ્તચર એજન્સી પણ સતર્ક છે અને બોમ્બ ડિસ્પોઝલ સ્ક્વોડ દ્વારા ડ્રોન કેમેરાની સંપૂર્ણ તપાસ કરવામાં આવી છે. જોકે, તેમાં પરિસ્થિતિ સામાન્ય જોવા મળી.

આ ડ્રોન કેમેરા જન્મસ્થળ દર્શન માર્ગ પર ઉડાડવામાં આવી રહ્યો હતો. આ સંદર્ભે રામ જન્મભૂમિ પોલીસ સ્ટેશનમાં અજાણ્યા વ્યક્તિઓ વિરુદ્ધ કેસ નોંધવામાં આવ્યો છે. અહીં એન્ટ્રી ડ્રોન સિસ્ટમનું ટ્રાયલ ચાલી રહ્યું છે. આ એન્ટી-ડ્રોન સિસ્ટમ અઢી કિલોમીટરની ત્રિજ્યામાં ઉડતા કોઈપણ ડ્રોનને પોતાની તરફ ખેંચે છે. એવું માનવામાં આવે છે કે ડ્રોન લગ્નમાં ઉડાડવામાં આવી રહ્યું હતું.

મહત્વનું છે કે હાલ રામ મંદિરમાં મોટી સંખ્યામાં શ્રદ્ધાળુઓની મુલાકાત લેવાની અપેક્ષાને ધ્યાનમાં રાખીને રસ્તાઓ પહોળા કરવા અને માળખાગત સુવિધાઓ સુધારવાના પ્રયાસો છતાં, અયોધ્યાની સાંકડી ગલીઓ હજુ પણ ભારે ભીડ જોવા મળી રહી છે. યાત્રાળુઓની ભારે ભીડને કારણે, શહેરમાં ફરવું લગભગ અશક્ય બની ગયું છે. જેના કારણે પરિસ્થિતિ વધુ ખરાબ થઈ ગઈ છે.