રામ મંદિરમાં રામલલાની 30 કરોડના મૂલ્યની પ્રતિમા

અયોધ્યાના શ્રી રામ જન્મભૂમિ મંદિર પરિસરમાં એક ભવ્ય અને કિંમતી રત્નજડિત પ્રતિમા ટૂંક સમયમાં સ્થાપિત કરવામાં આવશે.  એક ગુપ્ત દાતાદ્વારા અર્પણ કરાયેલી આ પ્રતિમા મંગળવારે (23 ડિસેમ્બર 2025) સાંજે અયોધ્યા પહોંચી ગઈ છે. આ પ્રતિમા સોના, ચાંદી, હીરા, પન્ના અને અન્ય કિંમતી રત્નોથી જડેલી છે, જેની અંદાજિત કિંમત 30 કરોડ રૂપિયા છે.

પ્રતિમાના વિશેષતા દક્ષિણ ભારતીય (કર્ણાટક અને તાંજોર) શૈલીમાં તૈયાર કરાયેલી આ પ્રતિમા આશરે 10 ફૂટ ઊંચી અને 8 ફૂટ પહોળી છે. તેનું વજન લગભગ 500 કિલો (પાંચ ક્વિન્ટલ) છે. તાંજોરના કુશળ કારીગરોએ આ પ્રતિમાનું નિર્માણ કર્યું છે. હાલ નિષ્ણાતો દ્વારા તેમાં વપરાયેલી ધાતુ અને રત્નોની તપાસ કરવામાં આવી રહી છે.

શ્રી રામ જન્મભૂમિ તીર્થ ક્ષેત્ર ટ્રસ્ટના સભ્ય ડૉ. અનિલ મિશ્રાએ જણાવ્યું કે, દાતાએ પોતાની ઓળખ ગુપ્ત રાખી છે. આ પ્રતિમા ભક્તિ અને કલાનું અદ્ભુત ઉદાહરણ છે.

ક્યાં થશે સ્થાપના? આ ભવ્ય પ્રતિમાને મંદિર પરિસરમાં સંત તુલસીદાસ મંદિર પાસે આવેલા અંગદ ટીલા પર સ્થાપિત કરવામાં આવશે. 29 ડિસેમ્બર 2025ના રોજ વૈદિક મંત્રોચ્ચાર વચ્ચે ભવ્ય પ્રાણ પ્રતિષ્ઠા મહોત્સવ યોજાશે, જેમાં દેશભરના સાધુ-સંતો અને મહંતો ઉપસ્થિત રહેશે.

પ્રતિષ્ઠા દ્વાદશીની ઉજવણી રામલલાની પ્રાણ પ્રતિષ્ઠાના બીજા વર્ષ પૂર્ણ થવા પર 29 ડિસેમ્બર 2025થી 2 જાન્યુઆરી 2026 સુધી પાંચ દિવસીય 'પ્રતિષ્ઠા દ્વાદશી' મહોત્સવ યોજાશે. આમાં અભિષેક, શૃંગાર, ભોગ અને આરતી જેવા કાર્યક્રમો થશે.