પ્રયાગરાજ: શંકરાચાર્યના સ્નાન મુદ્દે ભારે હોબાળો

ઉત્તર પ્રદેશના પ્રયાગરાજમાં મૌની અમાસના અવસરે આસ્થાના સંગમ પર એક મોટો વિવાદ ઊભો થયો છે. કરોડો શ્રદ્ધાળુઓ જ્યારે સંગમમાં પવિત્ર ડૂબકી લગાવી રહ્યા હતા, ત્યારે શંકરાચાર્ય સ્વામી અવિમુક્તેશ્વરાનંદ સરસ્વતી અને વહીવટીતંત્ર વચ્ચે ઉગ્ર બોલાચાલી અને ધક્કા-મુક્કીના દ્રશ્યો સર્જાયા હતા. આ ઘટના બાદ શંકરાચાર્યએ સ્નાન કર્યા વિના જ પરત ફરીને આમરણાંત ઉપવાસ શરૂ કરી દીધા છે.

ઘટનાનો ઘટનાક્રમ : 

રવિવારે સવારે શંકરાચાર્ય તેમના મોટી સંખ્યામાં અનુયાયીઓ સાથે પાલખીમાં સવાર થઈને સંગમ કિનારે સ્નાન માટે પહોંચ્યા હતા. ઘાટથી માત્ર થોડા અંતરે જ પોલીસે સુરક્ષા અને ભીડનું કારણ આપીને તેમને પાલખી આગળ લઈ જતી રોક્યા હતા. અધિકારીઓએ તેમને પગપાળા જઈને સ્નાન કરવા વિનંતી કરી હતી, જેનો શંકરાચાર્યના સમર્થકોએ વિરોધ કર્યો હતો. આ દરમિયાન પોલીસ અને સમર્થકો વચ્ચે ભારે ખેંચતાણ થઈ હતી, જેમાં કેટલાક સંતોને ઈજા પહોંચી હોવાના પણ અહેવાલ છે.

શંકરાચાર્યના ગંભીર આક્ષેપો : 

આ સમગ્ર મામલે નારાજગી વ્યક્ત કરતા શંકરાચાર્યએ વહીવટીતંત્ર પર આકરા પ્રહારો કર્યા છે. તેમણે જણાવ્યું કે આ તેમની વિરુદ્ધનું એક મોટું ષડયંત્ર હતું. પોલીસ બળના પ્રયોગ દરમિયાન તેમનું પવિત્ર છત્ર પણ તૂટી ગયું હતું અને તેમના શિષ્યો સાથે ગેરવર્તણૂક કરવામાં આવી હતી. તેમણે મૌન વ્રત ધારણ કર્યું છે અને જાહેરાત કરી છે કે જ્યાં સુધી જવાબદાર અધિકારીઓ તેમને સન્માનપૂર્વક સ્નાન માટે નહીં લઈ જાય ત્યાં સુધી તેઓ અન્ન-જળનો ત્યાગ કરશે.

વહીવટીતંત્રનો ખુલાસો : 

બીજી તરફ, સરકારી અધિકારીઓએ જણાવ્યું છે કે અમાસના દિવસે ભીડને જોતા આખા વિસ્તારને વાહન મુક્ત ઝોન જાહેર કરવામાં આવ્યો હતો. શંકરાચાર્ય કોઈપણ પૂર્વ મંજૂરી વિના મોટી સંખ્યામાં લોકો સાથે પાલખીમાં આવ્યા હતા, જેનાથી વ્યવસ્થા ખોરવાઈ શકે તેમ હતી. તંત્રના જણાવ્યા અનુસાર, શ્રદ્ધાળુઓની સુરક્ષાને ધ્યાનમાં રાખીને તેમને રોકવામાં આવ્યા હતા, પરંતુ તેમના સમર્થકોએ બેરિયર તોડવાનો પ્રયાસ કર્યો હતો.

હાલમાં આ મામલે પ્રયાગરાજના માઘ મેળામાં ભારે તણાવની સ્થિતિ જોવા મળી રહી છે અને સંતોમાં વહીવટીતંત્ર સામે રોષ ફેલાયો છે.