એનઆઈએએ તમિલનાડુ ટ્રેન અકસ્માતની તપાસ શરૂ કરી

નેશનલ ઈન્વેસ્ટિગેશન એજન્સી (એનઆઈએ)એ તમિલનાડુમાં શુક્રવારે થયેલા ટ્રેન અકસ્માતની તપાસ શરૂ કરી દીધી છે. આ અકસ્માતમાં 19 લોકો ઘાયલ થયા હતા. શનિવારે એનઆઈએની એક ટીમ તે સ્થળે પહોંચી  જ્યાં મૈસુરુ-દરભંગા બાગમતી એક્સપ્રેસ એક સ્થિર માલગાડી સાથે ટકરાઈ હતી.પોલીસે જણાવ્યું હતું કે સંભવિત કાવતરાના એંગલની તપાસ કરવામાં આવી રહી છે, જેના કારણે એનઆઈએની ટીમ આવી પહોંચી હતી.

શુક્રવારે રાત્રે થયેલા અકસ્માતમાં એક્સપ્રેસ ટ્રેનના 12 ડબ્બા પાટા પરથી ઉતરી ગયા હતા.કોરુક્કુપેટની સરકારી રેલ્વે પોલીસે ગુનો નોંધ્યો છે.આ દરમિયાન તમિલનાડુના ઉપમુખ્યમંત્રી ઉધયાનિધિ સ્ટાલિને કેન્દ્ર સરકારની આલોચના કરતા કહ્યું કે કેન્દ્રએ ટ્રેન દુર્ઘટનાઓ રોકવા માટે પગલા લેવા જોઈએ.રેલ્વેના સૂત્રોએ આઈએએનએસને જણાવ્યું હતું કે, આ ઘટના સિગ્નલ નિષ્ફળતાને કારણે બની છે.
ટ્રેન નંબર 12578 મૈસુર-દરભંગા એક્સપ્રેસને મુખ્ય લાઇનમાંથી પસાર થવાનો ઇશારો કરવામાં આવ્યો હતો. પરંતુ 75 કિમી પ્રતિ કલાકની ઝડપે આગળ વધતી વખતે ટ્રેન લૂપ લાઇનમાં પ્રવેશીને ઉભી રહેલી માલગાડીના પાછળના ભાગ સાથે અથડાઇ હતી. 

રેલ્વે અધિકારીઓએ પુષ્ટિ આપી હતી કે ક્રૂને કોઈ નુકસાન થયું નથી અને પાર્સલ વાનમાં લાગેલી આગને કાબૂમાં લેવામાં આવી છે. એક અધિકારીએ જણાવ્યું હતું કે, "હજી સુધી કોઈ જાનહાનિના અહેવાલ નથી, કેટલાક લોકો ઘાયલ થયા છે." ઘાયલ થયેલા તમામ મુસાફરોને નજીકની હોસ્પિટલોમાં લઈ જવામાં આવ્યા છે. "આ વિભાગની બંને બાજુ ટ્રેનની અવરજવરને અસર થઈ છે અને મુસાફરોની અવરજવર માટે વૈકલ્પિક વ્યવસ્થા કરવામાં આવી રહી છે.

– આઈએએનએસ