NEET-UG 2026નું પરિણામ જાહેર, 11.21 લાખ ક્વોલિફાઈડ

NEET UG 2026 Result: નેશનલ ટેસ્ટિંગ એજન્સી (NTA)એ NEET (UG) 2026નું પરિણામ જાહેર કર્યુ છે. પરિણામ જાહેર થતાં હવે MBBS, BDS, AYUSH સહિતના મેડિકલ કોર્સમાં પ્રવેશ માટે કાઉન્સેલિંગ પ્રક્રિયા સમયસર શરૂ થઈ શકશે. આ વર્ષે દેશ-વિદેશના 20 લાખ વિદ્યાર્થીઓએ પરીક્ષામાં ભાગ લીધો હતો. જેમાંથી 11.21 લાખથી વધુ ઉમેદવારો લાયક ઠર્યા છે.

દેશના 5,440 કેન્દ્રો પર યોજાઈ હતી પરીક્ષા
NEET (UG) 2026ની પરીક્ષા ભારતના 551 શહેરો અને વિદેશના 14 શહેરોમાં આવેલા કુલ 5,440 પરીક્ષા કેન્દ્રો પર યોજાઈ હતી. 21 જૂન 2026ના રોજ યોજાયેલી પરીક્ષામાં 20 લાખ ઉમેદવારો બેઠાં હતાં. જેમાંથી 11.21 લાખ ઉમેદવારો વિવિધ અંડરગ્રેજ્યુએટ મેડિકલ કોર્સમાં પ્રવેશ માટે લાયક બન્યા છે. ઉમેદવારો સ્કોરકાર્ડ સત્તાવાર વેબસાઇટ પરથી ડાઉનલોડ કરી શકે છે. રાજ્યવાર ટોપર્સ, કેટેગરીવાર ટોપર્સ, કટ-ઓફ માર્ક્સ અને ભાષાવાર આંકડા પણ જાહેર કરવામાં આવ્યા છે.

દીકરીઓએ મેદાન માર્યુ
આ વર્ષે લાયક ઉમેદવારોમાં દીકરીઓનું પ્રમાણ નોંધપાત્ર રહ્યું છે. કુલ લાયક ઉમેદવારોમાંથી 58 ટકાથી વધુ વિદ્યાર્થીનિઓ છે. સફળતા દરની દ્રષ્ટિએ પણ મહિલાઓ પુરુષો કરતાં આગળ રહી છે. મોટાભાગના ટોચના રેન્કર્સ 17 થી 19 વર્ષની વયજૂથના છે. જે દર્શાવે છે કે પ્રથમ પ્રયાસમાં અનેક વિદ્યાર્થીઓએ ઉત્તમ પ્રદર્શન કર્યું છે.

 

NTA Declares Result of NEET (UG) 2026

11.21 lakh candidates qualify;
Results declared in time for counselling and Medical College Admissions;
Toppers from almost all States and Union Territories;
More than 58 per cent of qualified candidates are women;
Examination conducted in…

— National Testing Agency (@NTA_Exams) July 16, 2026

 

ટોપર્સનું શાનદાર પ્રદર્શન
આ વર્ષે 138 ઉમેદવારોએ 690થી વધુ ગુણ મેળવ્યા છે. જ્યારે 19 ઉમેદવારોએ 700થી વધુ ગુણ મેળવવાનો સિદ્ધિભર્યો દેખાવ કર્યો છે. સૌથી વધુ 715 ગુણ સાથે પંજાબના આર્યન ગુપ્તા અને હરિયાણાના પંશુલ બંસલ સંયુક્ત રીતે ટોચ પર રહ્યા છે.

આ ઉપરાંત:

• 1,492 ઉમેદવારોએ 650થી વધુ ગુણ મેળવ્યા
• 10,160 ઉમેદવારોએ 600થી વધુ ગુણ મેળવ્યા
• 90,780 ઉમેદવારોએ 500થી વધુ ગુણ મેળવ્યા

દેશભરમાંથી ટોપર્સ
ટોપ રેન્કર્સ દેશના 66 અલગ-અલગ શહેરોમાંથી આવ્યા છે. 705થી વધુ ગુણ મેળવનારા વિદ્યાર્થીઓ પંજાબ, હરિયાણા, રાજસ્થાન, ઉત્તર પ્રદેશ, મહારાષ્ટ્ર, બિહાર, તમિલનાડુ અને તેલંગાણા સહિતના રાજ્યોમાંથી છે. લદ્દાખ, લક્ષદ્વીપ અને અંદમાન-નિકોબાર જેવા દૂરના પ્રદેશોના વિદ્યાર્થીઓએ પણ નોંધપાત્ર સફળતા મેળવી છે.

કેટેગરીવાર લાયક ઉમેદવારો
NTAએ વિવિધ કેટેગરી મુજબ લાયક ઉમેદવારોની સંખ્યાનો પણ ખુલાસો કર્યો છે.

• સામાન્ય વર્ગઃ 2.91 લાખ
• OBC-NCL: 5.12 લાખ
• SC :1.59 લાખ
• ST: 63,716
• Gen-EWS: 95,026
• PwBD: 3,666
• PwD: 303

કેટેગરી મુજબની કટ-ઓફ અને પર્સન્ટાઇલ પણ જાહેર કરવામાં આવી છે.

13 ભાષાઓમાં યોજાઈ હતી પરીક્ષા
NEET (UG) 2026 કુલ 13 ભાષાઓમાં લેવામાં આવી હતી. જેમાં ગુજરાતી, હિન્દી, અંગ્રેજી, મરાઠી, તમિલ, તેલુગુ, કન્નડ, મલયાલમ, બંગાળી, આસામી, ઓડિયા, પંજાબી અને ઉર્દૂનો સમાવેશ થાય છે. દેશના વિવિધ ભાષાકીય વિસ્તારોના વિદ્યાર્થીઓને પોતાની ભાષામાં પરીક્ષા આપવાની તક મળી.

પરિણામ જાહેર કરવાની નવી પ્રક્રિયા
NTAએ આ વર્ષે પરિણામ ઝડપથી જાહેર કરવા માટે સમગ્ર પ્રક્રિયામાં સુધારા કર્યા હતા. OMR શીટ, આન્સર કી અને મૂલ્યાંકનની પ્રક્રિયાને સમાંતર રીતે પૂર્ણ કરવામાં આવી હતી. 25 જૂને પ્રોવિઝનલ આન્સર કી જાહેર થઈ હતી. ત્યારબાદ ઉમેદવારોને OMR શીટ જોવા આપવામાં આવી હતી અને 16 જુલાઈએ અંતિમ આન્સર કી સાથે પરિણામ જાહેર કરવામાં આવ્યું હતું.

કાઉન્સેલિંગ માટે ઉમેદવારોને સૂચના
MBBS અને BDS માટેની ઓલ ઇન્ડિયા ક્વોટાની કાઉન્સેલિંગ મેડિકલ કાઉન્સેલિંગ કમિટી (MCC) દ્વારા કરવામાં આવશે. જ્યારે રાજ્ય ક્વોટાની પ્રક્રિયા સંબંધિત રાજ્ય સરકારો હાથ ધરશે. NTAએ ઉમેદવારોને નકલી ફોન, મેસેજ અને ફેક વેબસાઇટથી સાવચેત રહેવા અપીલ કરી છે. પ્રવેશ કે સ્કોર સુધારવાના નામે કોઈપણ પ્રકારની છેતરપિંડીથી બચવા માટે માત્ર સત્તાવાર વેબસાઇટનો જ ઉપયોગ કરવાની સલાહ આપવામાં આવી છે.

2027થી NEET પરીક્ષામાં કરાયો મોટો ફેરફાર
પેપર લીક થયા બાદ કેન્દ્ર સરકારે NEET પરીક્ષામાં ફેરફાર કર્યો છે. 2027થી NEET-UG કમ્પ્યુટર બેઝ્ડ ટેસ્ટ (CBT) એટલે કે ઓનલાઈન મોડમાં યોજાશે. હાલમાં પરીક્ષા ઓફલાઈન (પેન-એન્ડ-પેપર) મોડમાં થાય છે. નવી વ્યવસ્થામાં વિદ્યાર્થીઓ કમ્પ્યુટર પર પ્રશ્નો હલ કરશે. જોકે, અભ્યાસક્રમ, પ્રશ્નોની સંખ્યા, વિષય અને માર્કિંગ સ્કીમમાં કોઈ ફેરફાર થશે નહીં. ઉમેદવારોને ઓનલાઈન પરીક્ષા માટે અગાઉથી મોક ટેસ્ટ અને ડેમોની સુવિધા આપવામાં આવશે. જેથી તેઓ નવી સિસ્ટમ અનુસાર તૈયારી કરી શકે.

પેપર લીક થવાના કારણે બીજી વખત NEET પરીક્ષા યોજાઈ હતી
આ વર્ષે NEET-UG 2026 પરીક્ષા બે વખત યોજાઈ હતી. પ્રથમ વખત પરીક્ષા 3 મે 2026ના રોજ યોજાઈ હતી. પરંતુ પેપર લીક થવાને કારણે તેને રદ કરવામાં આવી હતી. ત્યારબાદ NTAએ 21 જૂને ફરીથી પરીક્ષા લીધી હતી. બપોરે 2 થી 5 વાગ્યા સુધી ઓફલાઈન (પેન-એન્ડ-પેપર) મોડમાં યોજાઈ હતી.