ગ્વાટેમાલામાં બે ભારતીય યુવકોની હત્યાથી ચકચાર

ત્રણ ગુજરાતીઓને ઈરાનમાં બંધક બનાવી ઢોર માર મારવામાં આવ્યો હોવાની હચમચાવી દે તેવી ઘટનાની તપાસ ચાલી રહી છે. તેવામાં હવે ગ્વાટેમાલામાં બે ભારતીય યુવકોની ઘાતકી હત્યા કરી દેવામાં આવી હોવાનો એક કિસ્સો પ્રકાશમાં આવ્યો છે. મોતને ભેટેલો 21 વર્ષિય સાહિબસિંઘ પંજાબનો અને 18 વર્ષિય યુવરાજસિંઘ તરીકે હરિયાણાનો હોવાની ઓળખ કરવામાં આવી છે.

યુવરાજ અને સાહિબ બંને સાથે અમેરિકા જવા નીકળ્યા હતા. પરંતુ તેમનું અમેરિકાનું સપનું ગ્વાટેમાલામાં તેમના અણધાર્યા મોત સાથે જ સમાપ્ત થઈ ગયું છે. બંનેના મોત બાદ પણ એજન્ટ્સ અને ડોન્કર્સ તેમના પરિવારને જૂના વિડીયો મોકલી પૈસા ઉઘરાવતા રહ્યા હતા.

સાહિબના પરિવારજનોના જણાવ્યા મુજબ, નવેમ્બર 2024માં તે અમેરિકા જવા નીકળ્યો હતો. થોડી જ વાર પછી ખંડણી માટેના વિડીયો આવવા લાગ્યા. પરિવારજનોને લાગ્યું કે તેને કિડનેપ કરી રાખવામાં આવ્યો છે, પરંતુ વાસ્તવમાં માર્ચ 2025માં જ તેની હત્યા થઈ ગઈ હતી. મેક્સિકોની હોસ્પિટલમાંથી મળેલા સર્ટિફિકેટ મુજબ સાહિબનો મોતનો દિવસ 4 માર્ચ હતો.

હરિયાણાના યુવરાજ સિંહનું ભવિષ્ય પણ એ જ રીતે ખતમ થયું. બંનેને ગ્વાટેમાલાના ડોન્કર્સે ડિસેમ્બર 2024માં જ કિડનેપ કરી લીધા હતા. બંનેના પરિવારોએ લાખો રૂપિયા ચૂકવ્યા છતાં પણ તેઓને છોડવામાં આવ્યા નહોતા. સાહિબના પિતાએ દીકરાને બચાવવા માટે જમીન વેચી કુલ 49 લાખ રૂપિયા આપ્યા, જ્યારે યુવરાજના પરિવારજનો દ્વારા આઠ લાખ ચૂકવાયા છતાં કોઈ પરિણામ આવ્યું નહીં.

પછી ખુલ્યું કે એજન્ટ્સે ખંડણીના પૈસા ખાય ગયા અને ગ્વાટેમાલા સુધી પહોંચાડ્યા જ નહોતા. ત્રણ લોકલ એજન્ટ્સની ધરપકડ પણ થઈ છે. યુવરાજના મામાને એક નેપાળી એજન્ટ પાસેથી મૃતકોના ફોટા અને ડેથ સર્ટિફિકેટ મળ્યા, પરંતુ બંનેની બોડી આજ સુધી મળી શકી નથી.

આ ઘટનાએ ફરી એક વાર બતાવ્યું છે કે ગેરકાયદેસર રીતે અમેરિકા જવા નીકળતા ભારતીયો કેવી રીતે ડોન્કર્સ અને એજન્ટ્સના શિકાર બની રહ્યા છે. સપનાની શોધમાં નીકળેલા અનેક યુવાનોનું જીવન વિદેશી ધરા પર સમાપ્ત થઈ રહ્યું છે.