મણિપુરમાં ફરી હિંસા કેમ ભડકી? 10નાં મોત અને એક ઘટનાએ વધાર્યો તણાવ

Manipur Ethnic Violence Escalates: મણિપુરમાં ફરી એકવાર હિંસા અને વંશીય તણાવ વધ્યો છે. રાજ્યના કાંગપોકપી, કામજોંગ અને ઉખરુલ જિલ્લામાં શુક્રવાર અને શનિવારે થયેલી અલગ-અલગ હિંસક ઘટનાઓમાં ઓછામાં ઓછા 10 લોકોનાં મોત થયાના અહેવાલ છે. તાજી હિંસા બાદ કેટલાક વિસ્તારોમાં પ્રતિબંધાત્મક આદેશો લાગુ કરવામાં આવ્યા છે અને સુરક્ષા દળોની તૈનાતી વધારવામાં આવી છે.

કાંગપોકપીમાં હત્યા બાદ તણાવ વધુ ગંભીર
આ દરમિયાન કાંગપોકપી જિલ્લામાં 52 વર્ષીય અજિનબોઉ આરના મોતનો મામલો વધુ ગંભીર બની રહ્યો છે. અહેવાલો અનુસાર, મકુઈ અશાંગ ગામમાં શંકાસ્પદ સશસ્ત્ર હુમલા દરમિયાન અજિનબોઉની હત્યા કરવામાં આવી હતી. ત્યારબાદ તેમનો માથા વગરનો મૃતદેહ મળી આવ્યો હતો અને તેને પોસ્ટમોર્ટમ માટે ઇમ્ફાલની જવાહરલાલ નેહરુ ઇન્સ્ટિટ્યૂટ ઓફ મેડિકલ સાયન્સિસ (JNIMS) ખાતે લાવવામાં આવ્યો હતો. સોશિયલ મીડિયા પર એક વીડિયો વાયરલ થયો હોવાના અહેવાલ છે, જેમાં અજિનબોઉનું માથું હોવાનો દાવો કરવામાં આવ્યો છે. 

‘માથું પાછું ન મળે ત્યાં સુધી પોસ્ટમોર્ટમ નહીં’
અજિનબોઉના મૃતદેહ સાથે જોડાયેલા મામલે જોઇન્ટ ટ્રાઇબ્સ કાઉન્સિલ મણિપુર (JTC) એ કેન્દ્ર અને મણિપુર સરકારને 48 કલાકનું અલ્ટીમેટમ આપ્યું છે. સંગઠનની માંગ છે કે અજિનબોઉનું ગુમ થયેલું માથું શોધી પરિવારને સોંપવામાં આવે, જેથી અંતિમ સંસ્કાર સન્માનપૂર્વક થઈ શકે. JTCએ જણાવ્યું છે કે માથું પરિવારને પરત ન મળે ત્યાં સુધી પોસ્ટમોર્ટમ કરવાની મંજૂરી આપવામાં નહીં આવે. સંગઠને 48 કલાકમાં કાર્યવાહી નહીં થાય તો કડક પગલાં લેવાની ચેતવણી પણ આપી છે.

નાગા-કુકી તણાવ વચ્ચે સુરક્ષા વધારાઈ
મણિપુરના પહાડી જિલ્લાઓમાં નાગા અને કુકી સમુદાયો વચ્ચેનો તણાવ ફરી હિંસામાં ફેરવાયો છે. તાજેતરની ઘટનાઓમાં ગોળીબાર, ઘરોને આગ લગાડવા અને અન્ય હુમલાના અહેવાલ સામે આવ્યા છે. પરિસ્થિતિને કાબૂમાં લેવા માટે સુરક્ષા દળોની તૈનાતી વધારવામાં આવી છે અને કેટલાક વિસ્તારોમાં લોકોની અવરજવર પર નિયંત્રણ મૂકવામાં આવ્યું છે. મણિપુરમાં તાજી હિંસાએ ફરી કાયદો અને વ્યવસ્થા તથા નાગરિકોની સુરક્ષાને લઈને ચિંતા વધારી છે. હાલ સમગ્ર ધ્યાન અજિનબોઉના ગુમ થયેલા માથાની શોધ, તાજી હિંસાની તપાસ અને આગામી દિવસોમાં વધુ અથડામણ અટકાવવા માટેની સુરક્ષા વ્યવસ્થા પર છે.