Delhi Election પહેલા AAP ને મોટો ઝટકો, 8 ધારાસભ્યો સહિત કાઉન્સિલરો ભાજપમાં જોડાયા

દિલ્હી વિધાનસભા ચૂંટણી (Delhi Election) પહેલા આમ આદમી પાર્ટીને મોટો ઝટકો લાગ્યો છે. આમ આદમી પાર્ટીના 8 ધારાસભ્યો અને કેટલાક વર્તમાન અને ભૂતપૂર્વ કાઉન્સિલરો ભાજપમાં જોડાયા છે. ચૂંટણી (Delhi Election) પહેલા આટલી મોટી સંખ્યામાં AAP નેતાઓનું BJP માં જોડાવાથી કેજરીવાલ માટે મુશ્કેલી વધી શકે છે. આમ આદમી પાર્ટી છોડનારા આ ધારાસભ્યોએ આરોપ લગાવ્યો હતો કે AAP તેના મૂળ સિદ્ધાંતોથી ભટકી ગઈ છે અને ભ્રષ્ટાચારમાં સંડોવાયેલી છે. આમાંથી ઘણા ધારાસભ્યોને દિલ્હી વિધાનસભા ચૂંટણી 2025 માં ટિકિટ આપવામાં આવી ન હતી, જેના કારણે તેઓ નારાજ હતા.

બીજી તરફ AAP નેતા ઋતુરાજ ઝાએ રાજીનામું આપનારા ધારાસભ્યોની ટીકા કરતા કહ્યું કે, તેઓએ એ ન ભૂલવું જોઈએ કે અરવિંદ કેજરીવાલે તેમને ધારાસભ્ય બનાવ્યા હતા અને રાજકારણમાં ટિકિટ મેળવવી એ જ બધું નથી. આ રાજીનામા દિલ્હીની ચૂંટણી 2025 પહેલા પાર્ટીની છબીને અસર કરી શકે છે, જોકે વિશ્લેષકો માને છે કે ચૂંટણી પરિણામો પર તેની મર્યાદિત અસર પડશે.

AAP ના કયા નેતાઓ ભાજપમાં જોડાયા?

ભાવના ગૌર, પાલમના ધારાસભ્ય (બે વખત ધારાસભ્ય)

કસ્તુરબા નગરથી ત્રણ વખત ધારાસભ્ય મદન લાલ 

ગિરીશ સોની, ત્રણ વખત ધારાસભ્ય 

રાજેશ ઋષિ બે વખત ધારાસભ્ય રહી ચૂક્યા છે 

નરેશ યાદવ, ધારાસભ્ય 

પવન શર્મા, ધારાસભ્ય 

રોહિત મહેરોલીયા, ધારાસભ્ય

બિજેન્દ્ર ગર્ગ, પૂર્વ ધારાસભ્ય

અજય રાય, કોર્પોરેશન કાઉન્સિલર

AAP ના 10 ધારાસભ્યો ભાજપમાં જોડાવાની તૈયારી કરી રહ્યા હતા!

દિલ્હી વિધાનસભા ચૂંટણી 2025 ના મતદાન પહેલા આમ આદમી પાર્ટી (AAP) ના 8 ધારાસભ્યો BJP કેમ્પમાં જોડાઈ શકે છે તેવા સમાચારે રાજકીય હલચલ મચાવી દીધી છે. અહેવાલ છે કે પાર્ટીના લગભગ 10 વર્તમાન ધારાસભ્યો છેલ્લા ઘણા દિવસોથી ભારતીય જનતા પાર્ટી (BJP)માં જોડાવાની તૈયારી કરી રહ્યા હતા. આ ધારાસભ્યોએ કેન્દ્રીય ગૃહમંત્રી અમિત શાહને મળવા માટે સમય માંગ્યો હતો. આ તમામ એવા નેતાઓ છે જેમને આમ આદમી પાર્ટીએ આ વખતે ટિકિટ આપી નથી.

ટિકિટ કાપવાથી નારાજ AAP ધારાસભ્યનો બળવો?

આ વખતે દિલ્હી વિધાનસભા ચૂંટણીમાં આમ આદમી પાર્ટીએ 20થી વધુ ધારાસભ્યોની ટિકિટ રદ કરી છે. હવે આમાંથી ઘણા નેતાઓ પાર્ટીથી નારાજ દેખાઈ રહ્યા છે. ભાવના ગૌર નામના એક નેતાએ પત્રમાં ત્રણ ભૂતપૂર્વ ધારાસભ્યોનો ઉલ્લેખ પણ કર્યો છે જેઓ પાર્ટી છોડી ચૂક્યા છે. આ ઉપરાંત 10 થી 12 કાઉન્સિલરો પણ ભાજપમાં જોડાવવાની તૈયારીમાં હતા.