ફરીદાબાદમાં 50 કિલોથી વધુ વિસ્ફોટકો સાથે 2ની ધરપકડ

રાષ્ટ્રીય રાજધાની દિલ્હીને અડીને આવેલા હરિયાણાના ફરીદાબાદમાં સુરક્ષા એજન્સીઓએ સતત બીજા દિવસે મોટી કાર્યવાહી હાથ ધરી છે. ક્રાઈમ બ્રાન્ચે સેક્ટર-56માંથી 50થી 60 કિલોગ્રામ વિસ્ફોટક સામગ્રી સાથે 2 શંકાસ્પદ વ્યક્તિઓની ધરપકડ કરી છે. આ કાર્યવાહી સોમવારે થયેલા મોટા પર્દાફાશ બાદ કરવામાં આવી છે, જ્યારે એજન્સીઓએ ફરીદાબાદમાંથી લગભગ 2900 કિલોગ્રામ વિસ્ફોટક સામગ્રી, હથિયારો અને દારૂગોળો જપ્ત કર્યો હતો.

7 શંકાસ્પદ આતંકવાદીઓની કરી ધરપકડ

તે સમયે, આ મોડ્યુલ સાથે જોડાયેલા 7 શંકાસ્પદ આતંકવાદીઓની ધરપકડ કરવામાં આવી હતી, જેમાં 2 ડૉક્ટરોનો પણ સમાવેશ થાય છે. આ તમામ શંકાસ્પદ વ્યક્તિઓનો જમ્મુ-કાશ્મીર કનેક્શન સામે આવ્યું છે, જેમાં શ્રીનગર, ગાંદરબલ, પુલવામા અને કુલગામના રહેવાસીઓનો સમાવેશ થાય છે, જેમની ઓળખ આરિફ નિસાર ડાર, યાસિર-ઉલ-અશરફ, મકસૂદ અહેમદ ડાર, જમીર અહેમદ અહંગર, ડૉ. મુઝમ્મિલ અહેમદ ગનાઈ અને ડૉ. અદીલ તરીકે થઈ છે.

આતંકવાદી નેટવર્કની કરી સઘન તપાસ

ડૉ. મુઝમ્મિલ અહેમદ ગનાઈ અલ ફલાહ યુનિવર્સિટીમાં ભણાવતા હોવાથી, શંકાસ્પદ આતંકવાદીઓના તાર ફરીદાબાદના ધૌજમાં સ્થિત અલ ફલાહ યુનિવર્સિટી સાથે પણ જોડાઈ રહ્યા છે. હરિયાણાના DGP ઓપી સિંહે મંગળવારે જણાવ્યું હતું કે, યુનિવર્સિટીના સમગ્ર કેમ્પસમાં સર્ચ ઓપરેશન ચાલુ છે અને આતંકવાદી નેટવર્કની સઘન તપાસ કરવામાં આવી રહી છે.

સમગ્ર રાજ્યને હાઈ એલર્ટ પર રખાયું

ફરીદાબાદ પોલીસે મુઝમ્મિલના સહકર્મીઓ, વિદ્યાર્થીઓ અને મેડિકલ કોલેજના પ્રિન્સિપાલ સહિત 50થી વધુ લોકોની પૂછપરછ કરી છે. DGPએ એ પણ સ્પષ્ટ કર્યું કે, આ તપાસ માત્ર ફરીદાબાદ પૂરતી મર્યાદિત નથી, પરંતુ અન્ય સ્થળોએ પણ ઈન્ટેલિજન્સ ઇનપુટ્સના આધારે સર્ચ ઓપરેશન ચાલી રહ્યું છે. દિલ્હી પોલીસની સ્પેશિયલ સેલ અને કેન્દ્રીય એજન્સીઓને સતત સહયોગ આપવામાં આવી રહ્યો છે. હાલમાં સમગ્ર રાજ્યને હાઈ એલર્ટ પર રાખવામાં આવ્યું છે.