VIDEO: પરભણીમાં હનુમાન મંદિરના હોલનો સ્લેબ ધરાશાયી

Maharashtra Temple Accident: મહારાષ્ટ્રના પરભણી જિલ્લાના માનવત તાલુકામાં આવેલા પ્રખ્યાત યશવાડી (યશવંતવાડી) મારુતિ મંદિર સંકુલમાં શનિવારે એક અત્યંત કરુણ અને મોટી દુર્ઘટના સર્જાઈ છે. મંદિરમાં ગર્ભગૃહની સામે બનાવવામાં આવી રહેલા સભા ખંડ (હોલ)ની છતનો સ્લેબ અચાનક પત્તાની મહેલની જેમ ધરાશાયી થયો હતો. શનિવાર હોવાથી મંદિરમાં કીર્તન અને મહાપ્રસાદ માટે ભક્તોની ભારે ભીડ ઉમટી હતી, જેના કારણે સ્લેબ તૂટતા જ 20 થી 30 ભક્તો કાટમાળ નીચે દટાઈ ગયા હતા. આ ભયાનક અકસ્માતમાં અત્યાર સુધીમાં 5 ભક્તોના કરુણ મોત નીપજ્યા હોવાના અહેવાલ છે, જ્યારે 30 થી 40 જેટલા શ્રદ્ધાળુઓ ગંભીર રીતે ઘાયલ થયા છે.

 

#Maharashtra
પરભણીના યશવાડી ગામમાં હનુમાન મંદિરમાં છત ધરાશાયી

મંદિરમાં દર્શન કરી રહેલાં પાંચ જેટલા શ્રદ્ધાળુઓના મોત

સભા મંડપના કાટમાળ નીચેથી પાંચ મૃતદેહો બહાર કાઢવામાં આવ્યા

આઠથી દસ શ્રદ્ધાળુઓને સારવાર માટે નજીકની હોસ્પિટલોમાં ખસેડવામાં આવ્યા

હજુ પણ કેટલાક લોકો કાટમાળ નીચે… pic.twitter.com/4pYSnL8XB7

— Benefit News 24 (@BenefitNews24) June 20, 2026

 

શનિવારની ભીડ વચ્ચે અચાનક મચી અફરાતફરી
સ્થાનિક સૂત્રોના જણાવ્યા અનુસાર, યશવાડી દેવસ્થાનમાં હનુમાન મંદિરની સામે એક મોટા સભા ખંડનું બાંધકામ છેલ્લા કેટલાક સમયથી ચાલી રહ્યું હતું. શનિવારનો પવિત્ર દિવસ હોવાથી મંદિરમાં વિવિધ ધાર્મિક કાર્યક્રમો અને કીર્તનનું આયોજન કરવામાં આવ્યું હતું. ભક્તોની ભારે ભીડને ધ્યાનમાં રાખીને બાંધકામનું કામ તે દિવસે બંધ રાખવામાં આવ્યું હતું, પરંતુ દર્શનાર્થીઓ તે નિર્માણાધીન શેડ અને હોલની આસપાસ એકઠા થયા હતા. આ દરમિયાન આશરે 15 ફૂટ લાંબો અને 15 ફૂટ પહોળો લોખંડના સળિયા અને સિમેન્ટનો બનેલો સ્લેબ અચાનક તૂટી પડ્યો હતો. કાટમાળ, ભારે પથ્થરો અને લોખંડના સળિયા નીચે પડતાં જ ઘટનાસ્થળે ચીસાચીસ અને ભારે અંધાધૂંધી વ્યાપી ગઈ હતી.

વહીવટીતંત્ર દ્વારા યુદ્ધના ધોરણે રેસ્ક્યુ ઓપરેશન
દુર્ઘટના સર્જાતા જ આસપાસના સ્થાનિક નાગરિકો અને અન્ય ભક્તોએ માનવતા દાખવીને તાત્કાલિક પોતાની રીતે બચાવ કામગીરી શરૂ કરી દીધી હતી. ઘટનાની માહિતી મળતાં જ જિલ્લા કલેક્ટર, પોલીસ અધિક્ષક સહિત જિલ્લા વહીવટીતંત્રનો મોટો કાફલો અને ડિઝાસ્ટર મેનેજમેન્ટની ટીમો ઘટનાસ્થળે દોડી ગઈ હતી. પોલીસે સમગ્ર વિસ્તારની નાકાબંધી કરીને ક્રેન અને જેસીબી (JCB) મશીનોની મદદથી કાટમાળ હટાવવાનું કામ યુદ્ધના ધોરણે શરૂ કર્યું હતું. કાટમાળમાંથી અત્યાર સુધીમાં 5 મૃતદેહો બહાર કાઢવામાં આવ્યા છે. આ ઉપરાંત અંદાજે 40 જેટલા ઈજાગ્રસ્તોને તાત્કાલિક એમ્બ્યુલન્સ મારફતે પરભણીની જિલ્લા જનરલ હોસ્પિટલ, આર.પી. હોસ્પિટલ અને અન્ય નજીકની સરકારી હોસ્પિટલોમાં સારવાર અર્થે દાખલ કરવામાં આવ્યા છે, જેમાં કેટલાકની હાલત નાજુક હોવાનું કહેવાય છે.

રાજકીય નેતાઓ અને મંત્રીઓએ પરિસ્થિતિનો તાગ મેળવ્યો
આ ભયાનક અકસ્માતને પગલે મહારાષ્ટ્ર સરકારના મંત્રી મેઘના બોર્ડીકરે તાત્કાલિક સમગ્ર ઘટનાની ગંભીરતાથી નોંધ લીધી હતી. તેમણે પરભણીના જિલ્લા કલેક્ટર અને પોલીસ વડા સાથે સીધો સંપર્ક સાધીને ઘટનાસ્થળે વધારાની રાહત સામગ્રી, તબીબી ટીમો અને ક્રેન મોકલવાના કડક આદેશ આપ્યા હતા. આ સાથે જ એનસીપી (NCP) ના ધારાસભ્ય રાજેશ વિટેકર સહિત જિલ્લાના અન્ય અગ્રણી રાજકીય નેતાઓએ પણ વહીવટી અધિકારીઓ સાથે વાતચીત કરીને બચાવ કામગીરી વધુ ઝડપી બનાવવા અને ઘાયલોને શ્રેષ્ઠ સારવાર આપવા માટે સૂચનાઓ આપી છે. હાલમાં વહીવટીતંત્રનો સંપૂર્ણ ભાર કાટમાળ નીચે ફસાયેલા તમામ લોકોને વહેલી તકે સુરક્ષિત બહાર કાઢવા પર છે. સત્તાવાર રીતે મૃત્યુઆંક અંગે હજુ વિગતવાર આંકડા જાહેર થવાના બાકી છે, પરંતુ કાટમાળની તીવ્રતા જોતાં મૃત્યુઆંક વધવાની આશંકા સેવાઈ રહી છે.