મહાકુંભ નાસભાગમાં ષડયંત્રની આશંકા, STF તપાસમાં નવા ખુલાસા

મહાકુંભમાં મૌની અમાવસ્યા દરમિયાન મચેલી નાસભાગમાં ષડયંત્રની આશંકા છે. સુત્રો પાસેથી મળેલી માહિતી મુજબ ષડયંત્રના ભાગરૂપે નાસભાગ મચી જવાની આશંકા છે. STF ની ટીમ કાવતરાના એંગલની તપાસમાં વ્યસ્ત છે. પ્રાપ્ત માહિતી અનુસાર, સંગમ નાકાની આસપાસ એક્ટિવ મોબાઈલ નંબરની શોધ કરવામાં આવી રહી છે. 16 હજારથી વધુ મોબાઈલ નંબરની તપાસ કરવામાં આવી રહી છે. અત્યાર સુધીની તપાસમાં ઘટના બાદ ઘણા મોબાઈલ નંબર સ્વિચ ઓફ જોવા મળ્યા છે. કંટ્રોલ રૂમના CCTV માંથી ફેસ રેકગ્નિશન એપ દ્વારા શંકાસ્પદની ઓળખ કરવામાં આવી રહી છે. તમને જણાવી દઈએ કે, મૌની અમાવસ્યાના દિવસે મહાકુંભમાં ભાગદોડ મચી ગઈ હતી. આ નાસભાગ વહેલી સવારે 2 વાગે થઈ હતી. વહીવટીતંત્રે કહ્યું હતું કે, નાસભાગમાં 30 લોકોના મોત થયા છે અને 60 લોકો ઘાયલ થયા છે.

પોલીસ અને સુરક્ષા એજન્સીઓ હાઈ એલર્ટ પર...

બીજી તરફ વિપક્ષનું કહેવું છે કે, વહીવટીતંત્ર મૃતકોની સંખ્યા છુપાવી રહ્યું છે પરંતુ હવે તપાસ એજન્સીઓને નાસભાગની ઘટનામાં ષડયંત્રની ગંધ આવી રહી છે. STF ની નજર ઘટનાના દિવસે જોવામાં આવેલા તમામ શકમંદો પર છે. હાલમાં આવતીકાલે બસંત પંચમીનું અમૃત સ્નાન છે. આવી સ્થિતિમાં પોલીસ અને સુરક્ષા એજન્સીઓ હાઈ એલર્ટ પર છે. આવતીકાલે યોજાનાર અમૃત સ્નાનને લઈને સુરક્ષા એજન્સીઓ અને UP પોલીસ એલર્ટ પર છે. UP પોલીસના અનેક વરિષ્ઠ અધિકારીઓએ મહાકુંભમાં પડાવ નાખ્યો છે. હવે જોવાનું એ રહે છે કે નાસભાગની તપાસ દરમિયાન STF વધુ શું માહિતી આપે છે.