ગીર સોમનાથમાં BLOએ કામના ભારણથી કરી આત્મહત્યા

Update news 5.45... તાપીમાં BLOના સહાયક આચાર્યનું હાર્ટ એટેકથી નિધન

ગુજરાતમાં BLO (બૂથ લેવલ ઓફિસર)ની કામગીરીના તણાવ વચ્ચે વધુ એક દુઃખદ બનાવ સામે આવ્યો છે. તાપી જિલ્લાના વાલોડ તાલુકાના બેલધા ગામની પ્રાથમિક શાળાના આચાર્ય કલ્પનાબેન પટેલનું હાર્ટ એટેકના કારણે નિધન થયું છે.

• ઘટના: 56 વર્ષીય આચાર્ય કલ્પનાબેન પટેલ BLOના સહાયક તરીકેની કામગીરી કરી રહ્યા હતા.

• નિધન: તેમને રાત્રિ દરમિયાન હૃદય રોગનો હુમલો આવ્યો હતો.

• સારવાર: તબિયત લથડતા તેમને તાત્કાલિક બારડોલીની હોસ્પિટલ ખાતે ખસેડવામાં આવ્યા હતા, જ્યાં ફરજ પરના તબીબે તેમને મૃત જાહેર કર્યા હતા.

• શોકની લાગણી: શિક્ષણ જગતમાં કલ્પનાબેનના નિધનથી શોકની લાગણી પ્રસરી છે.

Update news 2.05... ગીર સોમનાથ: BLO સુસાઇડ મામલે કલેક્ટરે કરી સ્પષ્ટતા

ગીર સોમનાથ: BLOની કામગીરી કરતા શિક્ષક દ્વારા સુસાઇડ કર્યા બાદ સોશિયલ મીડિયા પર BLOને 'મધ્યરાત્રિ સુધી કામ કરવા' અને 'જાગીને મોડે સુધી કામ પૂર્ણ કરવા'ની સૂચનાના વાયરલ મેસેજ અંગે કલેક્ટર એન. વી. ઉપાધ્યાયે સ્પષ્ટતા કરી છે.

કલેક્ટર એન. વી. ઉપાધ્યાયનું નિવેદન:

• સામાન્ય નિર્દેશ: કલેક્ટરે જણાવ્યું કે 'મધ્યરાત્રિ સુધી કામ કરવાની સૂચના' તમામ BLOs માટે મામલતદાર તરફથી જારી કરાયેલો એક સામાન્ય નિર્દેશ હતો, જે વાયરલ થઈ રહેલી ઇમેજમાં જોવા મળે છે.

• વ્યક્તિગત લક્ષ્ય નહોતું: તેમણે સ્પષ્ટ કર્યું કે દિવંગત શિક્ષક અરવિંદભાઈનું પ્રદર્શન સંતોષકારક હતું અને આ મેસેજ તેમને વ્યક્તિગત રીતે લક્ષ્ય કરીને મોકલવામાં આવ્યો ન હતો.

• કોના માટે હતો મેસેજ? આ મેસેજ ખાસ કરીને તે BLO માટે હતો જેમનું કામ હજી 20% પણ પહોંચ્યું નથી.

• સામાન્ય કાર્યભાર: કલેક્ટરે સ્વીકાર્યું કે એક સામાન્ય કાર્યભાર (work pressure) આપણા બધા પર હોય છે, માત્ર BLO પર નહીં. પ્રક્રિયાની જટિલતાને કારણે ઘણીવાર મધ્યરાત્રિ સુધી કામ કરવું પડે છે. જે કોઈ દિવસે કામ પૂરું ન કરી શકે, તેમને રાત્રે મોડે સુધી કામ કરીને તેને પૂર્ણ કરવું જરૂરી છે.

 

Update news 1.35...

BLO આત્મહત્યા કેસ: રાજ્ય ચૂંટણી પંચે કલેક્ટર પાસેથી રિપોર્ટ માંગ્યો

ગાંધીનગર/ગીર સોમનાથ: ગીર સોમનાથમાં BLOની કામગીરી કરતા શિક્ષકે કરેલી આત્મહત્યાના ગંભીર કેસ અંગે રાજ્ય ચૂંટણી પંચે સંજ્ઞાન લીધું છે.

• રાજ્ય ચૂંટણી પંચનું નિવેદન: રાજ્ય ચૂંટણી પંચના એડિશનલ CEO અશોક પટેલે 'બેનિફિટ ન્યૂઝ'ને જણાવ્યું હતું કે, "હાલમાં, વિભાગ પરિસ્થિતિ પર નજર રાખી રહ્યું છે. આ ઘટના ખૂબ જ દુઃખદ છે."

• રિપોર્ટની માંગ: તેમણે વધુમાં જણાવ્યું કે, "અમે કલેક્ટરને આ ઘટના અંગે વિગતવાર અહેવાલ ટૂંક સમયમાં રજૂ કરવા જણાવ્યું છે."

------------------------------------------------------------------

Update news 12.35...

ગીર સોમનાથ: BLO શિક્ષકની સુસાઇડ બાદ ખળભળાટ, મંત્રીનો કાર્યક્રમ રદ

ગીર સોમનાથમાં BLOની કામગીરી કરતા શિક્ષકે કરેલા સુસાઇડ બાદ ખળભળાટ મચી ગયો છે, જ્યાં BLO ગ્રૂપમાં જિલ્લા ચૂંટણી અધિકારીના નામે એક મેસેજ વાયરલ થયો છે જેમાં શિક્ષકોને રાત્રે 12 વાગ્યા સુધી SIR કામગીરી કરવા જાગીને મોડે સુધી કામ કરવાની સૂચના આપવામાં આવી હોવાનું જણાયું છે; આ ગંભીર ઘટના અને શિક્ષકોના તણાવ વચ્ચે કોડીનારમાં કેબિનેટ શિક્ષણ મંત્રી પ્રદ્યુમન વાજાનો આજે યોજાનારો સહકારીતા સંમેલન અને પદયાત્રાનો કાર્યક્રમ આપઘાતના મામલે રદ કરવામાં આવ્યો છે, અને વહીવટી તંત્ર દ્વારા વાયરલ મેસેજ તેમજ સુસાઇડ મામલે તપાસના આદેશ અપાયા છે.

-----------------------------------------------------------

રાજ્યમાં ચાલી રહેલી મતદાર યાદીની ખાસ સઘન સુધારણા (SIR) ઝુંબેશને કારણે બૂથ લેવલ ઓફિસર (BLO) તરીકે ફરજ બજાવતા શિક્ષકો પર વધતા દબાણથી ગંભીર પરિણામો સામે આવ્યા છે. ગીર સોમનાથ જિલ્લાના કોડીનાર તાલુકાના છારા ગામમાં શિક્ષક અને BLO અરવિંદ મૂળજી વાઢેર (40)એ માનસિક તણાવથી આત્મહત્યા કરી લીધી, જ્યારે ખેડા જિલ્લાના કપડવંજ તાલુકાના જાંબુડી ગામના આચાર્ય રમેશભાઈ રતીલાલ પરમાર (50)નું સતત સ્ટ્રેસ અને 94 કિમીની દૈનિક મુસાફરીથી હાર્ટ અટેક આવ્યું. આ દુઃખદ ઘટનાઓએ શિક્ષક વર્ગમાં ભારે આક્રોશ ફેલાવ્યો છે, જેમાં રાષ્ટ્રીય શૈક્ષિક મહાસંઘ સહિતના સંઘોએ મુખ્યમંત્રી ભૂપેન્દ્ર પટેલને ઉગ્ર રજૂઆત કરી છે. તેઓએ શિક્ષકોને BLO કામગીરીમાંથી મુક્તિ આપવા અને અલગ કેડર ઊભી કરવાની માંગ કરી છે.

આત્મહત્યાના કિસ્સામાં સુસાઇડ નોટમાં દબાણનો ઉલ્લેખ

 

ગીર સોમનાથ જિલ્લાના કોડીનાર તાલુકાના છારા ગામમાં કન્યા શાળામાં સરકારી શિક્ષક તરીકે ફરજ બજાવતા અરવિંદ વાઢેરે તેમના વતન દેવળી ખાતે આત્મહત્યા કરી લીધી. પ્રાથમિક તપાસમાં જાણવા મળ્યું કે, તેમણે પત્નીને સંબોધિત સુસાઇડ નોટમાં લખ્યું હતું, "છેલ્લા કેટલાક દિવસોથી SIR કામગીરીના ભારે દબાણથી સતત થાક અને માનસિક તણાવ અનુભવું છું." વાઢેર પોતાની શાળા અને BLO ફરજ વચ્ચે સંતુલન રાખવામાં અસમર્થ બન્યા હતા. આ ઘટનાથી સમગ્ર વિસ્તારમાં શોકની લહેર ફરી વળી છે, અને પોલીસ તપાસ કરી રહી છે.

આ કિસ્સો રાજ્યભરમાં શિક્ષકો પર પડતા BLO ભારણની ગંભીરતા દર્શાવે છે. તેવી જ રીતે, કપડવંજના જાંબુડી ગામમાં રહેતા અને નવાપુરા પ્રાથમિક શાળાના આચાર્ય રમેશભાઈ પરમારનું 19 નવેમ્બરના રોજ હાર્ટ અટેકથી અવસાન થયું. તેમની દીકરી શિલ્પા પરમારે જણાવ્યું, "પપ્પા રોજ 94 કિમી મુસાફરી કરીને શાળા અને BLO કામ પૂરું કરતા. છેલ્લા પખવાડિયાથી SIRના કારણે રાતે 11:30 સુધી ઉજાગરા કરીને એન્ટ્રી કરતા, જમ્યા વિના સૂતા. 5 વાગ્યે ઉઠવાનું નિયમ હતું, પણ તે દિવસે જાગ્યા નહીં." મૃતકના પિતરાઈ ભાઈ નરેન્દ્રભાઈ પરમારે કહ્યું, "નેટવર્ક ન આવતા મારા ઘરે આવીને હોટસ્પોટથી કામ કરતા. BLOનું ભારણ અને દબાણથી તેમનું નિધન થયું." આ ઘટના પછી શાળામાં વિદ્યાર્થીઓએ 2 મિનિટનું મૌન પાળ્યું અને શૈક્ષણિક કાર્ય બંધ રાખ્યું.

BLO કામગીરીની મુશ્કેલીઓ: શિક્ષકોના વોરંટ અને વિરોધના કિસ્સા

આ ઘટનાઓએ રાજ્યભરમાં શિક્ષકોમાં અકળાટ વધાર્યો છે. BLO તરીકે શિક્ષકોને શાળા/સરકારી ફરજ સાથે વધારાનું ચૂંટણી કામ સંભાળવાનું દબાણ, રાત્રે મોડા સુધી કામ, વહેલી સવારે ફિલ્ડમાં જવું, ટાર્ગેટ પૂર્ણ કરવા અધિકારીઓનું દબાણ, વારંવાર ફોન/વોટ્સએપથી મોનિટરિંગ, માર્ગસુવિધા/પરિવહન/સુરક્ષાનો અભાવ અને બાળકો-વડીલા-ઘરકામ વચ્ચે સંતુલનની મુશ્કેલીઓનો સામનો કરવો પડે છે.

• રાજકોટમાં ઉગ્ર વિરોધ: 15 નવેમ્બરે પ્રાથમિક શૈક્ષણિક મહાસંઘે CMને પત્ર લખીને SIR કામગીરીમાં હાજર ન થતા શિક્ષકો સામે ધરપકડ વોરંટ જારી કરવાની નિંદા કરી. તેઓએ કહ્યું, "બીમાર કે દૂર રહેતા શિક્ષકો પર વોરંટ નીંદનીય છે. BLO માટે અલગ કેડર બનાવો." અમદાવાદ અને રાજકોટમાં કલેક્ટર મારફતે રજૂઆત કરવામાં આવી.
• કચ્છમાં આવેદનપત્ર: ભુજ કલેક્ટરને 17 મુદ્દાઓ સાથે આવેદન આપ્યું, જેમાં રાત્રે 10 વાગ્યા પછી મીટિંગ ન બોલાવવી, સહાયક BLO આપવા અને દબાણ ન કરવાની માગ.
• સુરતમાં રાહત: ચૂંટણી પંચે BLOને અન્ય કામગીરીમાંથી મુક્તિ આપી, પણ સામાજિક/મેડિકલ રજા માટે દબાણની ફરિયાદો કાયમ છે.
• જુનાગઢમાં વિવાદ: 200થી વધુ મહિલા BLOને રાત્રે પ્રાંત કચેરી બોલાવવાથી આક્રોશ. શૈક્ષણિક સંઘોએ તીવ્ર વિરોધ નોંધાવ્યો.
• ગાંધીનગરમાં પરેશાની: શૈક્ષીક મહાસંઘે BLO ફરજથી શિક્ષણ પર અસર થતી હોવાનું જણાવ્યું. એક BLOને 1400 મતદારોની વિગતો એકત્ર કરવી પડે છે, જેમાં વ્યક્તિગત નંબર જાહેર થવાથી ત્રાસ થાય છે.

રાષ્ટ્રીય સ્તરે પણ ચિંતા: અન્ય રાજ્યોમાં સમાન કિસ્સા

ગુજરાત સિવાય કેરળ, તમિલનાડુ, રાજસ્થાનમાં પણ BLO આત્મહત્યા અને વિરોધના કિસ્સા સામે આવ્યા છે. કેરળમાં એક BLOએ SIR દબાણથી આત્મહત્યા કરી, જેના પછી IUMLએ સુપ્રીમ કોર્ટમાં અરજી કરી. રાજસ્થાનના જયપુરમાં BLO મુકેશચંદ જાંગીડે અધિકારીઓના હેરાનગતિનો આરોપ લગાવીને આત્મહત્યા કરી. આ કિસ્સાઓથી ચૂંટણી પંચ પર દબાણ વધ્યું છે.

રાષ્ટ્રીય શૈક્ષિક મહાસંઘના પ્રમુખોએ CMને લખેલા પત્રમાં કહ્યું, "શિક્ષકોને BLO કામગીરીમાંથી મુક્ત કરો, અલગ કેડર બનાવો અને દબાણ/વોરંટ બંધ કરો. વર્કલોડ, અનુરૂપ નથી ટાર્ગેટ અને થાકથી જીવન જોખમમાં છે." પ્રાથમિક શિક્ષક સંઘે પણ આવેદનમાં ખોટું દબાણ ન કરવા અને વધુ ઓપરેટરોની માંગ કરી.

આ મુદ્દા પર ચૂંટણી વિભાગના અધિકારીઓએ કહ્યું કે, BLO કામગીરી માટે 12 કેડરમાંથી કર્મચારીઓને સમાન ફાળવણી કરવામાં આવી છે, પણ શિક્ષકોની વધુ ઉપલબ્ધતા હોવાથી તેમને વધુ જવાબદારી મળે છે. તેઓએ વધુ સુવિધા આપવાનું વચન આપ્યું છે.

આ ઘટનાઓથી શિક્ષણ વિભાગ પર પડતા BLO ભારણની અસર વિશે ગંભીર પ્રશ્નો ઊભા થયા છે. અમે આ મામલાની વધુ અપડેટ્સ લાવીશું...