RSSએ એન્જિનિયર આત્મહત્યા કેસના દાવા નકારી કાઢ્યા

કેરળના તિરુવનંતપુરમમાં 9 ઓક્ટોબરના રોજ 26 વર્ષીય સોફ્ટવેર એન્જિનિયરની આત્મહત્યાના કેસમાં RSS પર ગંભીર આરોપો લાગ્યા છે. કોટ્ટાયમ જિલ્લાના એલિકુલમના આ એન્જિનિયરનો મૃતદેહ તિરુવનંતપુરમના થમ્પાનૂરના એક લોજના રૂમમાં ફાંસો ખાધેલી હાલતમાં મળી આવ્યો હતો. મૃત્યુ પહેલાં, તેમણે ઈન્સ્ટાગ્રામ પર 15 પાનાનો સુસાઇડ નોટ પોસ્ટ કર્યો હતો. 

RSS કેમ્પમાં યૌન શોષણનો આરોપ

આ સુસાઈડ નોટમાં તેમણે સ્પષ્ટપણે જણાવ્યું હતું કે, તે એક વ્યક્તિ અને RSSને કારણે આઘાત સહન કરી રહ્યા છે. તેમણે RSS કેમ્પમાં યૌન શોષણનો ગંભીર આરોપ લગાવ્યો હતો અને દાવો કર્યો હતો કે અન્ય ઘણા બાળકોએ પણ આવો જ અનુભવ કર્યો છે. એન્જિનિયરે સુસાઇડ નોટમાં લખ્યું હતું કે, 'તેઓ મને કોઈ કારણ વગર લાકડીઓથી મારતા. RSSથી વધુ નફરત મને બીજી કોઈ સંસ્થા પર નથી.' 

આ પણ વાંચો: કેરળ IT પ્રોફેશનલની આત્મહત્યા: RSS પર ભયંકર આક્ષેપ

માતા-પિતાને બાળકો સાથે સારા સંબંધો વિકસાવવા વિનંતી 

આ ઉપરાંત, તેમણે NM નામના એક વ્યક્તિ દ્વારા 3-4 વર્ષની ઉંમરથી જ યૌન શોષણનો પણ ઉલ્લેખ કર્યો હતો, જેના કારણે તે OCDના દર્દી બની ગયા હતા. તેમણે માતા-પિતાને બાળકો સાથે સારા સંબંધો વિકસાવવા માટે વિનંતી કરી હતી જેથી બાળકો તેમના ડર વિશે ખુલ્લેઆમ વાત કરી શકે.

RSSએ દાવા પાયાવિહોણા ગણાવ્યા

જોકે, RSSના દક્ષિણ કેરળ એકમે સોમવારે એક નિવેદન જાહેર કરીને પોતાને સંપૂર્ણપણે નિર્દોષ જાહેર કર્યો છે અને સુસાઈડ નોટમાં લગાવવામાં આવેલા તમામ આરોપોને પાયાવિહોણા ગણાવ્યા છે. RSS એ કહ્યું કે, મૃતકનો પરિવાર ઘણા વર્ષોથી સંઘ સાથે સંકળાયેલો છે અને તેમના પિતા RSSના કાર્યકર હતા. RSS એ આ મામલાની નિષ્પક્ષ તપાસની માંગણી કરી છે અને વિશ્વાસ વ્યક્ત કર્યો છે કે, સ્વતંત્ર તપાસ સંઘની નિર્દોષતા સાબિત કરશે. બીજી તરફ, કોંગ્રેસના સાંસદ પ્રિયંકા ગાંધીએ આ ગંભીર આરોપો પર RSS પાસેથી તાત્કાલિક જવાબ માંગ્યો છે અને કહ્યું છે કે, છોકરાઓનું પણ છોકરીઓ જેટલું જ યૌન શોષણ થઈ રહ્યું છે અને આ જઘન્ય ગુનાઓ પરનું મૌન તોડવું જોઈએ. પોલીસે આ મામલે તપાસ શરૂ કરી છે.