જયરામ રમેશે PM મોદીને લલકાર્યા, ટેરિફ મુદ્દે શું છે સરકારનો જવાબ?

કોંગ્રેસના મહાસચિવ જયરામ રમેશે અમેરિકાના રાષ્ટ્રપતિ ડોનાલ્ડ ટ્રમ્પ દ્વારા ભારત પર ટેરિફ લાદવાની જાહેરાત પર PM મોદી પર કટાક્ષ કર્યો છે. તેમણે કહ્યું કે, PM નરેન્દ્ર મોદી ફક્ત તેમના વખાણ સાંભળવા માંગે છે અને તેમને 'ટેરિફ'ની કોઈ ચિંતા નથી. 

રમેશે કહ્યું કે, અમેરિકાના ખતરા સામે PM મોદી હવે પોતાની 56 ઇંચની છાતી કેમ નથી બતાવી રહ્યા? કોંગ્રેસના નેતાએ કહ્યું કે ટ્રમ્પની પારસ્પરિક ટેરિફ લાદવાની જાહેરાત અને અમેરિકાના 'ધમકી'નો જવાબ આપવા માટે, ભારતે પક્ષીય રાજકારણથી ઉપર ઉઠીને સામૂહિક સંકલ્પ બતાવવાની જરૂર છે. તેમણે આરોપ લગાવ્યો કે PM મોદી આવા મહત્વપૂર્ણ મુદ્દાઓ પર જવાબ આપતા નથી અને જ્યારે વિદેશ પ્રધાન એસ જયશંકર બોલે છે, ત્યારે તેઓ અમેરિકાના "પ્રવક્તા અને રાજદૂત" ની જેમ વાત કરે છે.

અમેરિકાના રાષ્ટ્રપતિ ટ્રમ્પે ગુરુવારે પુનરોચ્ચાર કર્યો હતો કે અમેરિકન માલ પર ટેરિફ લગાવનારા દેશો પર પ્રતિક્રિયાત્મક ટેરિફ 2 એપ્રિલથી અમલમાં આવશે. ટ્રમ્પે કહ્યું, 'સૌથી મોટી વાત 2 એપ્રિલના રોજ હશે જ્યારે પ્રતિશોધાત્મક ટેરિફ લાગુ કરવામાં આવશે, પછી ભલે તે ભારત હોય કે ચીન કે કોઈ પણ દેશ... ભારત એક એવો દેશ છે જે ખૂબ ઊંચા ટેરિફ લાદે છે.'

આપણા PM પ્રશંસા સાંભળવા માંગે છે: કોંગ્રેસ મહાસચિવ

ટ્રમ્પની જાહેરાત વિશે પૂછવામાં આવતા, કોંગ્રેસના નેતા રમેશે દાવો કર્યો કે, 'આપણા PM ફક્ત પ્રશંસા સાંભળવા માંગે છે, તેમને ટેરિફની ચિંતા નથી.' આપણા નાગરિકોને અમેરિકાથી અપમાનજનક રીતે દેશનિકાલ કરવામાં આવ્યા. PM આ અંગે સંપૂર્ણપણે મૌન રહ્યા. PM ફક્ત ખુશામત કરી રહ્યા છે. તેમણે સીધું બોલવું જોઈએ, નાના દેશો બોલી રહ્યા છે.

ઈન્દિરાએ નિક્સનને જવાબ આપ્યો હતો, હવે PM મોદીનો વારો છે : જયરામ રમેશ

તેમણે કટાક્ષમાં પૂછ્યું, 'ટ્રમ્પ ભારત જેવા દેશને ધમકી આપી રહ્યા છે, તો PM તેમની 56 ઇંચની છાતી કેમ નથી બતાવી રહ્યા?' રમેશે કહ્યું, 'ઈન્દિરા ગાંધીજી (ભૂતપૂર્વ PM) એ તત્કાલીન અમેરિકી રાષ્ટ્રપતિ રિચાર્ડ નિક્સનને શું કહ્યું હતું?' આ યાદ રાખો! ૪ નવેમ્બર, ૧૯૭૧ ના રોજ, જ્યારે નિક્સન અને હેનરી કિસિંજર (નિક્સના સમયમાં યુએસ સેક્રેટરી ઓફ સ્ટેટ અને નેશનલ સિક્યુરિટી સલાહકાર) એ ભારતને બદનામ કરવાનો પ્રયાસ કર્યો, ત્યારે ઇન્દિરાજી ઉભા થયા અને કહ્યું કે હું ભારતના હિતમાં જે પણ જરૂરી હશે તે કરીશ, પરંતુ આજે આપણા PM નમસ્તે ટ્રમ્પ કહેવા અને ગળે લગાવવામાં વ્યસ્ત છે.

શું તમે ટેરિફ મુદ્દે સંસદમાં સરકારને ઘેરશો? કોંગ્રેસ નેતાએ જવાબ આપ્યો

કોંગ્રેસ નેતાના મતે, અમેરિકામાં જે રીતે ભારતીય નાગરિકોને નિશાન બનાવવામાં આવી રહ્યા છે તે આપણી સાર્વભૌમત્વનો પ્રશ્ન છે. જ્યારે તેમને પૂછવામાં આવ્યું કે શું કોંગ્રેસ બજેટ સત્રના બીજા તબક્કા દરમિયાન ટેરિફના મુદ્દા પર સંસદમાં PM પાસેથી જવાબ માંગશે, ત્યારે રમેશે કહ્યું, 'PM જવાબ આપતા નથી, તેઓ વિદેશ પ્રધાનને મોકલે છે.' વિદેશ મંત્રી અમેરિકાના પ્રવક્તા અને અમેરિકાના રાજદૂત તરીકે બોલે છે.

ચીન મુદ્દે જયરામ રમેશે શું કહ્યું?

તેમણે કહ્યું, 'આ એક ગંભીર મુદ્દો છે. ચીન વિશે કંઈ કહેવામાં આવ્યું નહીં, શું કોઈ સમજૂતી થઈ છે? લોકસભા અને રાજ્યસભામાં ચીન પર કોઈ ચર્ચા થઈ ન હતી. વિદેશ મંત્રીએ ફક્ત એક લેખિત નિવેદન વાંચ્યું અને ચાલ્યા ગયા. રમેશે કહ્યું કે, અમેરિકાનો મુદ્દો સંવેદનશીલ છે અને તેના પર સામૂહિક સંકલ્પ બતાવવાની જરૂર છે. વિપક્ષ સર્વપક્ષીય બેઠકની માંગ કરશે કે કેમ તે પ્રશ્નના જવાબમાં કોંગ્રેસના નેતાએ કહ્યું, "PM (સર્વપક્ષીય બેઠકમાં) આવતા નથી, વિદેશ પ્રધાન આવે છે અને ઉપદેશ આપે છે."