લોકસભામાં વકફ સુધારા બિલ રજૂ, કિરેન રિજિજુએ કહ્યું- વક્ફે સંસદ ભવન પર પણ કર્યો હતો દાવો...

લોકસભામાં વકફ સુધારા બિલ રજૂ કરવામાં આવ્યું છે. સંસદીય બાબતોના પ્રધાન કિરેન રિજિજુએ આ બિલ લોકસભામાં રજૂ કર્યું હતું. આ બિલ પર ચર્ચા માટે 8 કલાકનો સમય આપવામાં આવ્યો છે પરંતુ સરકારે કહ્યું છે કે જો ગૃહ સંમત થાય તો ચર્ચાનો સમય વધારી શકાય છે. સરકાર આજે જ ચર્ચાનો જવાબ પણ આપશે. અગાઉ, શાસક પક્ષ ભાજપે તેના તમામ સાંસદો માટે વ્હીપ જારી કરીને તેમને આજે ગૃહમાં હાજર રહેવા જણાવ્યું હતું. તેવી જ રીતે, TDP, JDU, RLD એ તેમના સાંસદોને વ્હીપ જારી કર્યો છે. બીજી તરફ, વિપક્ષ પણ વક્ફ બિલનો વિરોધ કરવા માટે એકજૂથ છે.

ભારતમાં વિશ્વમાં સૌથી વધુ વકફ મિલકતો છે: રિજિજુ

કિરેન રિજિજુએ કહ્યું કે ભારતમાં વિશ્વમાં સૌથી વધુ વકફ મિલકતો છે, છતાં આપણા મુસ્લિમો ગરીબ કેમ છે? મુસ્લિમો શિક્ષણથી કેમ વંચિત છે, તેમને રોજગાર કેમ નથી? ધર્મ અને જાતિથી આગળ વધીને, તમારા હૃદયથી વિચારો. સદીઓ સુધી દેશ યાદ રાખશે કે આ બિલનું સમર્થન કોણ કરી રહ્યું હતું અને વિરોધ કોણ કરી રહ્યું હતું. ગરીબ મુસ્લિમો માટે વકફમાં સુધારો કરવો પડશે.

મસ્જિદોના સંચાલનમાં કોઈ દખલ નહીં - કિરેન રિજિજુ

વકફ બિલ પર ચર્ચા દરમિયાન કિરેન રિજિજુએ કહ્યું કે, સરકાર કોઈપણ ધર્મમાં દખલ કરવા માંગતી નથી, અમે મસ્જિદોના સંચાલનમાં દખલ કરવા માંગતા નથી. રિજિજુએ કહ્યું કે, આ મસ્જિદ કે ધાર્મિક પ્રવૃત્તિઓ સાથે સંબંધિત મામલો નથી, તે ફક્ત મિલકતના સંચાલન સાથે સંબંધિત મામલો છે. જો કોઈ મુસ્લિમ જકાત આપે તો આપણે કોણ તેને પ્રશ્ન કરવાવાળા? આપણે ફક્ત તેના સંચાલન વિશે વાત કરી રહ્યા છીએ. તેનો ધાર્મિક વ્યવસ્થા સાથે કોઈ સંબંધ નથી.

વક્ફે સંસદ ભવન પર પણ દાવો કર્યો: રિજિજુ

કિરેન રિજિજુએ પોતાના ભાષણ દરમિયાન કેટલાક જૂના દસ્તાવેજોનો ઉલ્લેખ કરતા કહ્યું કે વક્ફે સંસદ ભવન પર પણ દાવો કર્યો હતો. કિરેન રિજિજુએ કહ્યું કે જો અમે સુધારો ન લાવ્યા હોત, તો અમે જ્યાં બેઠા છીએ તે જગ્યા પણ વકફ મિલકત હોત. જો યુપીએ સરકાર હોત, તો કોણ જાણે કેટલી મિલકતો ડીનોટિફાઇ થઈ હોત. આ અંગે વિપક્ષ દ્વારા વાંધો ઉઠાવવામાં આવ્યો હતો. રિજિજુએ કહ્યું કે હું દસ્તાવેજોના આધારે આ કહી રહ્યો છું. યુપીએ શાસન દરમિયાન, 123 મિલકતો વકફને આપવામાં આવી હતી.