6 રાજ્યોમાં વરસાદ અને હિમવર્ષાનું એલર્ટ

ભારતીય હવામાન વિભાગે આગામી દિવસોમાં ઉત્તર-પશ્ચિમ ભારતના હવામાનમાં મોટા ફેરફારોની આગાહી કરી છે, જેમાં પશ્ચિમી વિક્ષેપ સક્રિય થવાને કારણે 6થી વધુ રાજ્યોમાં વરસાદ અને હિમવર્ષાની શક્યતા વર્તાઈ છે. હિમાચલ પ્રદેશ, ઉત્તરાખંડ અને જમ્મુ-કાશ્મીરના ઊંચાઈવાળા વિસ્તારોમાં હળવી હિમવર્ષા અને નીચાણવાળા વિસ્તારોમાં વરસાદ થઈ શકે છે, જ્યારે પંજાબ, હરિયાણા અને પશ્ચિમ ઉત્તર પ્રદેશમાં 18થી 22 જાન્યુઆરી દરમિયાન છૂટાછવાયા વરસાદની અપેક્ષા છે. આ ફેરફારોને કારણે ભારતમાં આગાહી મુજબ આગામી 5-6 દિવસમાં લઘુત્તમ તાપમાનમાં 4થી 6 ડિગ્રી સેલ્સિયસનો વધારો થતા લોકોને કાતિલ ઠંડીથી આંશિક રાહત મળી શકે છે, જોકે, 21 જાન્યુઆરીથી ફરીથી ઠંડીનો નવો રાઉન્ડ આવવાની શક્યતા છે.

તાપમાન 4 ડિગ્રીથી વધીને 7 ડિગ્રી નોંધાયું

દિલ્હી અને NCRમાં કડકડતી ઠંડીની સાથે પ્રદૂષણની ગંભીર સમસ્યા ઉભી થઈ છે, જેને પગલે AQI 368 સુધી પહોંચી ગયો છે. પરિસ્થિતિની ગંભીરતા જોતા કમિશન ફોર એર ક્વોલિટી મેનેજમેન્ટે તાત્કાલિક અસરથી ગ્રેડેડ રિસ્પોન્સ એક્શન પ્લાન GRAPનો સ્ટેજ-III લાગુ કર્યો છે, જે અંતર્ગત બાંધકામ પ્રવૃત્તિઓ અને BS-III પેટ્રોલ તથા BS-IV ડીઝલ વાહનો પર પ્રતિબંધ મૂકવામાં આવ્યો છે. શનિવારે સવારે દિલ્હીમાં ગાઢ ધુમ્મસને કારણે વિઝિબિલિટી ઘટીને 150 મીટર થઈ ગઈ હતી, જેના લીધે IGI એરપોર્ટ પર અનેક ફ્લાઈટ્સ પ્રભાવિત થઈ હતી. જોકે, દિલ્હીમાં લઘુત્તમ તાપમાન શુક્રવારના 4 ડિગ્રીથી વધીને શનિવારે 7 ડિગ્રી સેલ્સિયસ નોંધાયું હતું.

હવામાનના મિશ્ર પ્રતિસાદ જોવા મળી રહ્યા

ઉત્તર પ્રદેશ અને બિહારમાં પણ હવામાનના મિશ્ર પ્રતિસાદ જોવા મળી રહ્યા છે, જ્યાં સવાર-સાંજ ગાઢ ધુમ્મસ અને બર્ફીલા પવનોને કારણે જનજીવન પ્રભાવિત થયું છે. ઉત્તર પ્રદેશના કેટલાક વિસ્તારોમાં વરસાદની સંભાવના છે, જ્યારે બિહારમાં આગામી 7 દિવસ સુધી હવામાન શુષ્ક રહેશે અને તાપમાનમાં ધીમો વધારો જોવા મળશે. કાશ્મીર ખીણમાં પણ પશ્ચિમી વિક્ષેપની અસરથી રાત્રિના તાપમાનમાં સુધારો થયો છે, પરંતુ હિમવર્ષાની ચેતવણી યથાવત છે. હવામાનની આગાહી સૂચવે છે કે, જાન્યુઆરીના અંતિમ સપ્તાહમાં ઉત્તર ભારતના મેદાની વિસ્તારોમાં ઠંડી અને વરસાદનું સંયોજન જોવા મળી શકે છે, જેના માટે તંત્ર દ્વારા યલો એલર્ટ જારી કરવામાં આવ્યું છે.