Delhi : દેશભરમાં ₹51,000 કરોડના ઈ-ચલણ અધ્ધરતાલ, તંત્રની બેદરકારી કે લોકોનો બેફામ વલણ?

ભારતમાં ટ્રાફિક નિયમોના ભંગ બદલ જારી થતા ઈ-ચલણની વસૂલાત પ્રણાલી કેટલી કથળી ગઈ છે તેનો ચોંકાવનારો ખુલાસો થયો છે. RTI એક્ટિવિસ્ટ સંજય ઇઝાવા દ્વારા પ્રાપ્ત થયેલી માહિતી મુજબ, છેલ્લા 10 વર્ષમાં દેશભરમાં 34 કરોડથી વધુ ઈ-મેમો ફટકારવામાં આવ્યા છે, જેની કુલ કિંમત રૂ. 51,000 કરોડથી વધુ થાય છે. જોકે, આમાંથી માત્ર 37.62 % રકમ જ વસૂલી શકાઈ છે, જ્યારે 21 કરોડથી વધુ ઈ-ચલણની ભરપાઈ હજુ પણ બાકી છે. આ આંકડાઓ દર્શાવે છે કે, ડિજિટલ ટ્રાફિક મેનેજમેન્ટની આ ક્રાંતિકારી યોજના કડક અમલવારીના અભાવે નિષ્ફળ પુરવાર થઈ રહી છે.

ટોપ-5 રાજ્યોમાં મેમોનો ભરાવો, વસૂલાતમાં નિષ્ફળતા...

RTI ડેટા અનુસાર, સૌથી વધુ ઈ-મેમો ફટકારવામાં આવતા ટોપ-5 રાજ્યોમાં તમિલનાડુ, ઉત્તર પ્રદેશ, કેરળ, હરિયાણા અને દિલ્હીનો સમાવેશ થાય છે. આ રાજ્યોમાં ટ્રાફિક નિયમોનો ભંગ મોટા પાયે થઈ રહ્યો છે, પરંતુ મેમો ફટકાર્યા બાદ તેની વસૂલાત કરવામાં તંત્ર સાવ નિષ્ફળ ગયું છે. બીજી તરફ, ટોપ-5 રેવન્યૂવાળા રાજ્યોમાં યુ.પી., હરિયાણા, રાજસ્થાન, બિહાર અને મહારાષ્ટ્રનો સમાવેશ થાય છે, જે સૂચવે છે કે કેટલાક રાજ્યો વસૂલાતમાં અન્ય કરતા વધુ સક્રિય છે, છતાં કુલ ચિત્ર નિરાશાજનક છે.

ગયા વર્ષે ₹1.62 લાખ કરોડના મેમો, માત્ર 22% વસૂલ...

RTI માં એ પણ ખુલાસો થયો છે કે, છેલ્લા એક જ વર્ષમાં રૂ. 1.62 લાખ કરોડના ઈ-ચલણ જારી કરવામાં આવ્યા હતા, જેમાંથી માત્ર 22% રકમ જ વસૂલી શકાઈ છે. આ દર્શાવે છે કે, સમસ્યા દિવસેને દિવસે વધુ વકરી રહી છે અને તંત્ર આ વસૂલાતની પ્રક્રિયાને ગંભીરતાથી લઈ રહ્યું નથી.

આ પણ વાંચો : Mumbai : 160 બાંગ્લાદેશીઓને દેશનિકાલ કરતા પોલીસ કાફલાની 19 ગાડીઓ અથડાઈ!

કેમ નથી થતી વસૂલાત? તંત્રની બેદરકારી કે લોકોનું બેફામ વલણ?

ઈ-ચલણની આટલી ઓછી વસૂલાતના અનેક કારણો હોઈ શકે છે. શું પોલીસ અને ટ્રાફિક વિભાગ દ્વારા વસૂલાત માટે પૂરતા પ્રયાસો કરવામાં આવતા નથી? શું લોકો મેમો ભરી રહ્યા નથી કારણ કે તેમને કાયદાનો કોઈ ડર નથી? કે પછી ટેકનિકલ ખામીઓ કે જાગૃતિના અભાવે આ સમસ્યા સર્જાઈ રહી છે? આ પ્રશ્નોના જવાબ શોધવા અને કડક પગલાં લેવા અત્યંત જરૂરી છે. જો આ રીતે કરોડો રૂપિયાના મેમો બાકી રહેશે તો તે માત્ર સરકારી તિજોરીને જ નહીં, પરંતુ ટ્રાફિક નિયમોના પાલનને પણ ગંભીર નુકસાન પહોંચાડશે.

આ પણ વાંચો : 93 વર્ષના પતિએ પત્ની માટે ખરીદ્યું મંગળસૂત્ર, દુકાનદારે માત્ર 20 રૂપિયામાં આપી પ્રેમભરેલું ભેટરૂપ

ઈ-ચલણ સિસ્ટમનો મુખ્ય હેતુ ટ્રાફિક નિયમોનું પાલન કરાવવાનો અને રસ્તાઓ પર સુરક્ષા સુનિશ્ચિત કરવાનો છે. પરંતુ જો મેમોની વસૂલાત જ ન થાય, તો આ હેતુ નિષ્ફળ જાય છે. સરકારે તાત્કાલિક આ મામલે ગંભીરતા દાખવી, વસૂલાત પ્રક્રિયાને મજબૂત કરવી જોઈએ અને કાયદાનું પાલન ન કરનારાઓ સામે કડક કાર્યવાહી કરવી જોઈએ, જેથી ટ્રાફિક વ્યવસ્થા સુધરે અને અકસ્માતોમાં ઘટાડો થાય.

આ પણ વાંચો : એર ઈન્ડિયા પ્લેન ક્રેશ બાદ તંત્ર સફાળું જાગ્યું, જુઓ સિવિલ એવિએશનના નવા નિયમો