સ્કૂલ સ્ટાફે 4 વર્ષની બાળકીને પગથી કચડી

તેલંગાણાની રાજધાની હૈદરાબાદમાં શાહપુર નગર વિસ્તારમાં આવેલી એક ખાનગી શાળામાં 4 વર્ષની નર્સરીની માસૂમ બાળકી સાથે સ્કૂલની જ સફાઈ કર્મચારી લક્ષ્મી દ્વારા ખૂબ જ હેવાનિયત આચરવામાં આવી છે. આ આરોપી મહિલાએ બાળકીને વોશરૂમમાં લઈ જઈને ફર્શ પર પછાડી, પછી તેને પગથી કચડી થપ્પડ માર્યા અને ગળું દબાવવાનો પ્રયાસ કર્યો હતો. આ સમગ્ર ઘટના સ્કૂલના CCTV ફૂટેજમાં કેદ થઈ ગઈ છે. સોશિયલ મીડિયો પર વીડિયો વાયરલ થયા બાદ પોલીસ હરકતમાં આવી અને આરોપી મહિલાને તાત્કાલિક અસરથી ધરપકડ કરી છે.

અંગત અદાવતમાં બાળકીને બનાવ્યું નિશાન

પોલીસ દ્વારા કરવામાં આવેલી પ્રાથમિક પૂછપરછમાં સામે આવ્યું છે કે, આ કૃત્ય પાછળનું કારણ બદલાની ભાવના હતી. આરોપી લક્ષ્મી અને પીડિત બાળકીની માતા, જે તે જ સ્કૂલની બસ કંડક્ટર છે, વચ્ચે નોકરીને લઈને જૂનો વિવાદ ચાલતો હતો. લક્ષ્મીને શંકા હતી કે, બાળકીની માતા તેની નોકરી છીનવી લેશે. રવિવારે સાંજે જ્યારે બાળકીની માતા બાળકોને બસથી ઘરે મૂકવા ગઈ હતી, ત્યારે તેની 4 વર્ષની દીકરી સ્કૂલ કેમ્પસમાં માતાની રાહ જોઈ રહી હતી. આ તકનો લાભ લઈને લક્ષ્મીએ બાળકીને વોશરૂમમાં લઈ જઈને તેની પર બેહદ નિર્દયતાથી હુમલો કર્યો. શાહપુર નગર પોલીસ સ્ટેશનના ઈન્સ્પેક્ટરે જણાવ્યું કે, બાળકી ચીસો પાડતી રહી, પણ આરોપી અટકી ન હતી.

આ પણ વાંચો: ફૂટબોલ રમતાં 13 વર્ષના વિદ્યાર્થીનું અચાનક મોત

CCTV ફૂટેજ વાયરલ 

40 સેકન્ડનો આ CCTV ફૂટેજ સોશિયલ મીડિયા પર સોમવારે સાંજે ખૂબ જ ઝડપથી વાયરલ થયો હતો. આ વીડિયોમાં સ્પષ્ટ દેખાય છે કે, લક્ષ્મી બાળકીને ખેંચીને વોશરૂમમાં લઈ જાય છે અને દરવાજો બંધ કરીને અંદર તેને બેરહેમીથી મારે છે. વીડિયો જોઈને લોકોમાં ભારે આક્રોશ છે, અને બાળ સુરક્ષા કાર્યકરોએ સ્કૂલ મેનેજમેન્ટની બેદરકારી પર ગંભીર સવાલો ઉઠાવ્યા છે. બાળકીની માતાએ શાહપુર નગર પોલીસ સ્ટેશનમાં તુરંત ફરિયાદ નોંધાવી હતી, જેના આધારે પોલીસે આરોપી લક્ષ્મીને ગણતરીના કલાકોમાં ધરપકડ કરી લીધી છે. બાળકીનું મેડિકલ કરાવવામાં આવ્યું છે, તેમાં તેના ચહેરા, ગળા અને શરીર પર ઈજાના નિશાન છે, જોકે તેની જાનને કોઈ ખતરો નથી.

સ્કૂલ મેનેજમેન્ટ અને બાળ સુરક્ષા પર સવાલ

સ્કૂલ મેનેજમેન્ટે એક નિવેદન બહાર પાડીને કહ્યું કે, આરોપી લક્ષ્મીને તુરંત નોકરીમાંથી કાઢી મૂકવામાં આવી છે અને તેઓ બાળકોની સુરક્ષા માટે પ્રતિબદ્ધ છે. જોકે, વાલીઓએ સવાલ ઉઠાવ્યો છે કે, સફાઈ કર્મચારીને બાળકની સાથે એકલા રહેવાની મંજૂરી કેમ આપવામાં આવી? આ ઘટના હૈદરાબાદના સ્કૂલોમાં હિંસાની છેલ્લા કેટલાક મહિનાઓની ત્રીજી મોટી ઘટના છે. સપ્ટેમ્બરમાં એક શિક્ષક દ્વારા બાળકને માર મારવો અને ઓક્ટોબરમાં બસ અટેન્ડેન્ટ પર જાતીય સતામણીના આક્ષેપો થયા હતા. વાલી સંગઠનોએ તેલંગાણા સરકાર પાસે તમામ ખાનગી સ્કૂલોમાં મહિલા સ્ટાફનું પોલીસ વેરિફિકેશન અને CCTVની ફરજિયાત વ્યવસ્થા કરવાની માંગ કરી છે. પોલીસ દ્વારા આરોપી લક્ષ્મીની પૂછપરછ ચાલુ છે અને સ્કૂલ મેનેજમેન્ટ વિરુદ્ધ બેદરકારીનો ગુનો દાખલ કરવા અંગે વિચારણા ચાલી રહી છે.