શંકરાચાર્યને હાઈકોર્ટે આપ્યા જામીન

અલ્હાબાદ હાઈકોર્ટે બુધવારે શંકરાચાર્ય સ્વામી અવિમુક્તેશ્વરાનંદ સરસ્વતીને મોટી રાહત આપી છે. યૌન ઉત્પીડનના ગંભીર આરોપોનો સામનો કરી રહેલા શંકરાચાર્યની જામીન અરજી કોર્ટે મંજૂર કરી લીધી છે. જસ્ટિસ જિતેન્દ્ર કુમાર સિંહાની બેન્ચે આદેશ આપ્યો છે કે જ્યાં સુધી પોલીસ આ મામલે ચાર્જશીટ દાખલ નહીં કરે ત્યાં સુધી તેમની ધરપકડ કરી શકાશે નહીં.

કડક શરતો સાથે મળી રાહત : 

હાઈકોર્ટે જામીન આપતી વખતે બંને પક્ષો માટે કેટલીક કડક મર્યાદાઓ નક્કી કરી છે. અદાલતે સ્પષ્ટ નિર્દેશ આપ્યો છે કે શંકરાચાર્ય અવિમુક્તેશ્વરાનંદ અને ફરિયાદી આશુતોષ બ્રહ્મચારી બંનેમાંથી કોઈ પણ પક્ષ આ કેસ બાબતે મીડિયામાં કોઈ પણ પ્રકારની નિવેદનબાજી કરશે નહીં કે ઈન્ટરવ્યુ આપશે નહીં. જો કોઈ પણ પક્ષ આ શરતોનું ઉલ્લંઘન કરશે, તો સામો પક્ષ જામીન રદ કરાવવા માટે ફરીથી કોર્ટના દ્વાર ખખડાવી શકશે.

શું હતો સમગ્ર વિવાદ ?

આ વિવાદની શરૂઆત ત્યારે થઈ જ્યારે તુલસી પીઠાધીશ્વર સ્વામી રામભદ્રાચાર્યના શિષ્ય આશુતોષ બ્રહ્મચારીએ ફેબ્રુઆરી મહિનામાં જિલ્લા કોર્ટમાં અરજી કરી હતી. આ અરજી બાદ કોર્ટના આદેશ પર ઝૂંસી પોલીસ સ્ટેશનમાં સ્વામી અવિમુક્તેશ્વરાનંદ વિરુદ્ધ બટુકો સાથે અકુદરતી કૃત્ય કરવા બદલ એફઆઈઆર નોંધવામાં આવી હતી. આ ગંભીર આક્ષેપો બાદ શંકરાચાર્યએ ધરપકડથી બચવા માટે આગોતરા જામીન મેળવવા હાઈકોર્ટનો સંપર્ક કર્યો હતો.

સત્ય સાબિત કરવાની તૈયારી : 

કોર્ટના આ નિર્ણય બાદ શંકરાચાર્યએ પોતાનો પક્ષ રજૂ કરતા જણાવ્યું હતું કે તેઓ સત્યને બહાર લાવવા માટે નાર્કો ટેસ્ટ સહિતની તમામ કાયદાકીય તપાસ માટે તૈયાર છે. તેમણે વિશ્વાસ વ્યક્ત કર્યો હતો કે ખોટા આરોપો લાંબો સમય ટકી શકતા નથી અને તેઓ તમામ પુરાવાઓ યોગ્ય સમયે રજૂ કરશે. જો જરૂર પડશે તો તેઓ ન્યાય માટે સુપ્રીમ કોર્ટ સુધી જવાની તૈયારી પણ રાખી રહ્યા છે.

હાલમાં હાઈકોર્ટના આ નિર્ણયથી શંકરાચાર્યને કામચલાઉ રક્ષણ મળ્યું છે, પરંતુ તપાસ હજુ ચાલુ છે. પોલીસની તપાસમાં સહયોગ આપવાની શરત પણ કોર્ટે યથાવત રાખી છે. આ કેસમાં હવે પોલીસ ચાર્જશીટ ક્યારે રજૂ કરે છે તેના પર સૌની નજર રહેશે.