પ્રયાગરાજ મહાકુંભમાં સ્નાન કરવા જવા માટે દેશમાંથી લાખો શ્રદ્ધાળુઓ પ્રયાગરાજ તરફ જઇ રહ્યા છે ત્યારે દેશમાં ઠેર ઠેર ટ્રાફિક જામની સ્થિતી જોવા મળી રહી છે. બિહારના કેમુર જિલ્લામાંથી પસાર થતા નેશનલ હાઇવે 19 પર ભારે ટ્રાફિક જામની સમસ્યા જોવા મળી રહી છે. હાઇવે પ બંને તરફ હજારો વાહનો ટ્રાફિક જામમાં ફસાયા છે. ઘણા વાહન ચાલકો તો 72 કલાકથી એક જ સ્થળે ફસાયેલા છે. સ્થિતી એટલી ગંભીર છે કે એમ્બ્યુલન્સને પણ પસાર થવા માટે જગ્યા નથી.&nbsp;
સ્થાનિક પોલીસ વહીવટીતંત્ર જામ દૂર કરવા માટે સતત પ્રયાસ કરી રહ્યું છે અને વિવિધ સ્થળોએ વાહનોનું નિયમન પણ કરવામાં આવી રહ્યું છે. જોકે, બંને લેનમાં બંને દિશામાં વાહનોની ભારે અવરજવર હોવાથી પરિસ્થિતિ વધુ વણસી ગઈ છે. ઘણા મુસાફરો 72 કલાકથી વધુ સમયથી જામમાં ફસાયેલા છે, જ્યારે કેટલાક કહે છે કે તેમનું વાહન 8 કલાકથી એક ઇંચ પણ આગળ વધ્યું નથી. બિહાર સરકારના ગેરવહીવટને કારણે લોકોને વધુ સમસ્યાઓનો સામનો કરવો પડી રહ્યો છે.
મુર્શિદાબાદથી કુંભ મેળા માટે બસમાં મુસાફરી કરી રહેલા ડ્રાઇવર છોટુ કુમારે જણાવ્યું કે તે 30 મુસાફરોને લઈને બસમાં કુંભ જઈ રહ્યો છે. બિહારમાં પ્રવેશતાની સાથે જ અમને ટ્રાફિક જામનો સામનો કરવો પડ્યો અને અત્યાર સુધી, અમે ૧૨ કલાકમાં માત્ર ૫૦ કિમીનું અંતર કાપી શક્યા છીએ. તેમનું કહેવું છે કે બંને લેન સંપૂર્ણપણે જામ છે અને પરિસ્થિતિ ખૂબ જ ખરાબ છે.
એક મુસાફરે કહ્યું- અમે ત્રણ દિવસથી ટ્રાફિક જામમાં ફસાયેલા છીએ
આ દરમિયાન, અનિતા શુક્લા, જે પોતાના ખાનગી વાહનમાં આસનસોલથી ચંદૌલી જઈ રહી હતી, તેણે કહ્યું કે તે ત્રણ દિવસથી ટ્રાફિક જામમાં ફસાઈ હતી અને કુદ્રા પહોંચવામાં ઘણી મુશ્કેલીઓનો સામનો કરવો પડ્યો હતો. તેણી કહે છે કે છેલ્લા 8 કલાકથી પોતાની કાર એક ઇંચ પણ ખસેડી શકી નથી અને તે એ પણ સમજી શકતી નથી કે શા માટે જામ સર્જાયો છે.
ટ્રક ચાલકો ત્રણ દિવસથી ટ્રાફિક જામમાં ફસાયા
કોલકાતાથી દિલ્હી જતા એક ટ્રક ડ્રાઈવરે પણ આવી જ સમસ્યાઓનો ઉલ્લેખ કર્યો. તેણે કહ્યું કે તે ત્રણ દિવસથી ટ્રાફિક જામમાં ફસાયો છે અને જો ટ્રાફિક જામ ન હોત, તો તે અત્યાર સુધીમાં દિલ્હી પહોંચી ગયો હોત અને પોતાનો ટ્રક ફરીથી લોડ કરીને પાછો જઈ શક્યો હોત.
પોલીસ &nbsp;ટ્રાફિક ક્લિયર કરાવામાં વ્યસ્ત
પોલીસે જણાવ્યું હતું કે કુંભ મેળાને કારણે બંને લેનમાં ટ્રાફિક જામ છે અને પોલીસ જામને ક્લિયર કરવામાં વ્યસ્ત છે. તેમણે કહ્યું કે ટ્રાફિક જામની પરિસ્થિતિને પહોંચી વળવા માટે વિવિધ સ્થળોએ પોલીસ દળ તૈનાત કરવામાં આવ્યું છે અને સતત પ્રયાસો કરવામાં આવી રહ્યા છે.

દેશના તમામ વાહનો જાણે કે પ્રયાગરાજ તરફ, પોલીસ ટ્રાફિક ક્લિયર કરાવામાં વ્યસ્ત 

January 29, 2025 | 12:47 IST