રસ્તાના અભાવે સગર્ભા મહિલા 6 કિમી પગપાળા ચાલી

મહારાષ્ટ્રના ગઢચિરોલી જિલ્લામાંથી સિસ્ટમની નિષ્ફળતા અને માનવતાને શર્મસાર કરતી એક હૃદયદ્રાવક ઘટના સામે આવી છે. જિલ્લાના એટાપલ્લી તાલુકાના આલદંડી ટોલા ગામમાં રહેતી 24 વર્ષીય આશા સંતોષ કિરંગા નામની સગર્ભા મહિલા માટે પાકા રસ્તાનો અભાવ જીવલેણ સાબિત થયો છે. આ ગામ મુખ્ય માર્ગથી સંપર્ક વિહોણું હોવાને કારણે અને ગામમાં પ્રસૂતિની કોઈ સુવિધા ન હોવાથી, મહિલાને મજબૂરીમાં જંગલના કાચા રસ્તે 6 કિલોમીટર સુધી પગપાળા ચાલવું પડ્યું હતું. આ અત્યંત મુશ્કેલ મુસાફરીના કારણે સર્જાયેલી આ હૃદયદ્રાવક ઘટના એ સમગ્ર પંથકમાં અરેરાટી ફેલાવી દીધી છે.

પતિ સાથે જંગલના રસ્તે 6 કિમી ચાલી

મળતી માહિતી મુજબ, આશા કિરંગા 9 મહિનાની ગર્ભવતી હતી અને તેની પ્રસૂતિનો સમય નજીક હતો. 1 જાન્યુઆરીના રોજ વધુ સારી તબીબી સુવિધાની અપેક્ષાએ તે પોતાના પતિ સાથે જંગલના રસ્તે 6 કિલોમીટર ચાલીને તેની બહેનના ઘરે પેઠા પહોંચી હતી. પ્રેગ્નન્સીના અંતિમ તબક્કામાં આટલું લાંબુ અંતર ચાલવાની તેના શરીર પર ગંભીર અસર પડી હતી, જે આ ઘટનાનું મુખ્ય કારણ બની હતી. 2 જાન્યુઆરીની સવારે તેને પ્રસૂતિની પીડા ઉપડતા તાત્કાલિક એમ્બ્યુલન્સ દ્વારા હેદરીની કાલી અમ્માલ હોસ્પિટલમાં ખસેડવામાં આવી હતી.

હસતાં-રમતાં પરિવારે પોતાની હોનારત વહોરી

હોસ્પિટલમાં ડૉક્ટરોએ પરિસ્થિતિની ગંભીરતા જોઈને તાત્કાલિક સિઝેરિયન ઓપરેશન કરવાનો નિર્ણય લીધો હતો, પરંતુ કમનસીબે ત્યાં સુધીમાં ઘણું મોડું થઈ ચૂક્યું હતું. વધુ પડતા શારીરિક શ્રમને કારણે ગર્ભમાં જ શિશુનું મૃત્યુ નીપજ્યું હતું. આ ઘટના અહીં જ ન અટકી, બાળક ગુમાવ્યા બાદ મહિલાનું બ્લડ પ્રેશર અચાનક વધી ગયું હતું અને સારવાર દરમિયાન માતાએ પણ દમ તોડી દીધો હતો. તંત્રની ઉદાસીનતાને કારણે એક હસતાં-રમતાં પરિવારે પોતાની હોનારત વહોરી લીધી છે.

આધુનિક યુગમાં રસ્તા જેવી પાયાની સુવિધા નહિ

ગઢચિરોલીના જિલ્લા આરોગ્ય અધિકારી ડૉ. પ્રતાપ શિંદેએ આ ઘટના અંગે દુઃખ વ્યક્ત કરતા જણાવ્યું હતું કે, મહિલાની નોંધણી આશા વર્કરો પાસે થયેલી હતી. તેમણે સ્વીકાર્યું હતું કે, અચાનક પ્રસૂતિની પીડા અને જટિલતાઓ કદાચ વધુ પડતા ચાલવાને કારણે થઈ હોઈ શકે છે. આ મામલે તાલુકા હેલ્થ ઓફિસર પાસેથી વિગતવાર અહેવાલ મંગાવવામાં આવ્યો છે અને તપાસના આદેશો આપવામાં આવ્યા છે. જોકે, તપાસ ગમે તે હોય, પરંતુ વાસ્તવિકતા એ છે કે આધુનિક યુગમાં પણ રસ્તા જેવી પાયાની સુવિધા ન હોવાને લીધે આ ઘટના ઘટી છે.

એમ્બ્યુલન્સ ન મળતા ઈ-રિક્ષામાં બાળકનો જન્મ

આ અગાઉ ઉત્તર પ્રદેશના હરદોઈમાં પણ એમ્બ્યુલન્સ ન મળતા ઈ-રિક્ષામાં બાળકના જન્મની ઘટના બની હતી, જે દર્શાવે છે કે, ગ્રામીણ ભારતમાં સ્વાસ્થ્ય સુવિધાઓની સ્થિતિ કેટલી ચિંતાજનક છે. ગઢચિરોલીની આ ઘટના એ વિકાસના દાવાઓ સામે અનેક સવાલો ઉભા કર્યા છે. શું આઝાદીના આટલા વર્ષો પછી પણ એક ગર્ભવતી મહિલાને હોસ્પિટલ પહોંચવા માટે જંગલોમાં ભટકવું પડશે? આ ઘટના બાદ સ્થાનિક લોકોમાં ભારે રોષ જોવા મળી રહ્યો છે અને તંત્ર પાસે પાકા રસ્તાની માંગ તેજ બની છે જેથી ભવિષ્યમાં આવી કોઈ બીજી હૃદયદ્રાવક ઘટના ન બને.