Haryana : ફતેહાબાદમાં ભાખરા કેનાલમાં અકસ્માત, 5 મહિલાઓ સહિત 9 મોત, 3 ગુમ

હરિયાણા (Haryana)ના ફતેહાબાદ જિલ્લામાં ભાખરા કેનાલમાં વાહન પડતાં પાંચ મહિલાઓ સહિત નવ લોકોનાં મોત નીપજ્યાં હતાં, જ્યારે અન્ય ત્રણ હજુ પણ ગુમ છે. પોલીસે જણાવ્યું કે, અકસ્માત સમયે વાહનમાં 14 લોકો મુસાફરી કરી રહ્યા હતા અને એક વ્યક્તિ અને 11 વર્ષના છોકરાને બચાવી લેવામાં આવ્યા છે. તેમણે કહ્યું કે બચાવ કાર્ય ચાલુ છે. પોલીસે જણાવ્યું કે સંભવતઃ ગાઢ ધુમ્મસને કારણે આ ઘટના શુક્રવારે રાત્રે રતિયાના સરદારવાલા ગામમાં બની હતી. 

કાલાવલી વિસ્તારમાંથી સાત મૃતદેહ મળી આવ્યા છે. અકસ્માત સર્જાતું ક્રુઝર વાહન પંજાબથી પરત ફરી રહ્યું હતું અને રાતિયા ફતેહાબાદના સરદારેવાલા ગામ પાસે રાત્રે અકસ્માત સર્જાયો હતો. કારમાં 14 લોકો સવાર હતા. કાલાવલી પોલીસ સ્ટેશન વિસ્તારના ગામ ગદરાણા નજીક કાલુવાના રજવાહમાં મૃતકોની લાશ મળી આવી હતી. ગ્રામજનોએ કેનાલમાંથી મૃતદેહ બહાર કાઢ્યા હતા. NDRF અને SDRF ની ટીમો હજુ પણ ગુમ થયેલા લોકોને શોધી રહી છે.

પોલીસ નિવેદન...

પોલીસના જણાવ્યા અનુસાર, વાહનમાં સવાર મોટાભાગના મુસાફરો મહમરા ગામના રહેવાસી હતા અને પંજાબના ફાઝિલ્કા જિલ્લાના એક ગામમાં આયોજિત લગ્ન સમારોહમાં હાજરી આપીને પરત ફરી રહ્યા હતા. તેમણે જણાવ્યું કે, જ્યારે વાહન સરદારવાલા ગામ પાસે પહોંચ્યું ત્યારે ગાઢ ધુમ્મસને કારણે ડ્રાઈવરે કાબૂ ગુમાવ્યો અને વાહન ભાખરા કેનાલમાં પડી ગયું. નાયબ પોલીસ અધિક્ષક (રતિયા) સંજય કુમારે જણાવ્યું હતું કે, અત્યાર સુધીમાં નવ મૃતદેહ મળી આવ્યા છે અને અન્ય ત્રણ ગુમ મુસાફરોને શોધવાના પ્રયાસો ચાલુ છે. 

ગુમ થયેલા લોકોની શોધ ચાલુ...

અધિકારીએ જણાવ્યું કે, મૃતકોમાં પાંચ મહિલાઓ અને એક 11 વર્ષની છોકરીનો સમાવેશ થાય છે. પોલીસે જણાવ્યું કે, કેનાલમાં પાણીનું સ્તર ઘટી ગયું છે અને નેશનલ ડિઝાસ્ટર રિસ્પોન્સ ફોર્સ (NDRF), સ્ટેટ ડિઝાસ્ટર રિસ્પોન્સ ફોર્સ (SDRF) અને ડાઇવર્સ બચાવ કામગીરી કરી રહ્યા છે.