તેલંગાણામાં કેમિકલ ફેક્ટરીમાં વિસ્ફોટ:10 મજૂરોનાં મોત

તેલંગાણાના સાંગારેડ્ડી જિલ્લાના પાશા મેલારામ ઔદ્યોગિક વિસ્તારમાં સોમવારે સવારે એક ભયાનક અકસ્માત થયો. અહીં સ્થિત સીગાચી કેમિકલ્સ ફેક્ટરીમાં પ્રચંડ વિસ્ફોટ બાદ ભીષણ આગ ફાટી નીકળી હતી. ફેક્ટરીના રિએક્ટરમાં વિસ્ફોટ થયો હતો અને થોડી જ વારમાં જ આગની જ્વાળાઓએ આખી ફેક્ટરીને લપેટમાં લઈ લીધી હતી. આ અકસ્માતમાં 10 કામદારોના મોત થયા હતા, જ્યારે 20 કામદારો ઘાયલ થયા હતા, જેમાંથી કેટલાકની હાલત ગંભીર હોવાનું કહેવાય છે.

વિસ્ફોટ એટલો શક્તિશાળી હતો કે તેનો અવાજ ઘણા કિલોમીટર દૂર સુધી સંભળાયો હતો અને ફેક્ટરીની આસપાસના વિસ્તારોમાં ગભરાટ ફેલાઈ ગયો હતો. કામદારો ભયથી અહીં-ત્યાં દોડવા લાગ્યા. પ્રત્યક્ષદર્શીઓના જણાવ્યા અનુસાર, વિસ્ફોટને કારણે ઘણા કામદારો 100 મીટર દૂર સુધી પડી ગયા હતા.

ફાયર બ્રિગેડના ચાર એન્જિન ઘટનાસ્થળે પહોંચ્યા

ફાયર બ્રિગેડના ચાર એન્જિન ઘટનાસ્થળે પહોંચી ગયા છે અને આગ ઓલવવાનું કામ ઝડપથી ચાલી રહ્યું છે. 108 એમ્બ્યુલન્સ અને તબીબી કર્મચારીઓ પણ ઘટનાસ્થળે પહોંચી ગયા છે. ઘાયલોને પ્રાથમિક સારવાર માટે તંચેરુની હોસ્પિટલમાં લઈ જવામાં આવ્યા હતા, જ્યારે ગંભીર રીતે ઘાયલોને હૈદરાબાદ રિફર કરવામાં આવ્યા છે.

અકસ્માત બાદ ફેક્ટરીની ઇમારત ધરાશાયી થઈ ગઈ. કાટમાળમાં કામદારો ફસાયા હોવાની શક્યતા છે. સ્થાનિક સૂત્રોના જણાવ્યા અનુસાર, આ અકસ્માતમાં 10 કામદારો જીવતા બળી ગયા છે, જોકે હજુ સુધી સત્તાવાર પુષ્ટિ કરવામાં આવી નથી. વહીવટીતંત્રે તાત્કાલિક કાર્યવાહી કરી છે અને ફેક્ટરી અને આસપાસના વિસ્તારને ખાલી કરાવવાનું શરૂ કર્યું છે.

ફેક્ટરીમાં 100 થી વધુ કામદારો કામ કરે છે

સ્થાનિક લોકોએ જણાવ્યું હતું કે આ કંપની દવાઓના ઉત્પાદનમાં વપરાતો પાવડર બનાવે છે અને વિવિધ રાજ્યોના 100 થી વધુ કામદારો અહીં કામ કરે છે. અકસ્માતના સમાચાર મળતા જ કામદારોના સંબંધીઓ ફેક્ટરીની બહાર ભેગા થઈ ગયા હતા.

વહીવટીતંત્ર દ્વારા લોકોને ઘટનાસ્થળથી દૂર રહેવાની સલાહ આપવામાં આવી છે. હાલમાં રાહત અને બચાવ કાર્ય ચાલુ છે અને અકસ્માતના કારણોની તપાસ શરૂ કરવામાં આવી છે.