દાઉદ ગેંગની ડ્રગ્સ સિન્ડીકેટ ઉપર ED ત્રાટકી

દાઉદ ગેંગના કનેક્શન પર EDની કાર્યવાહી

દાઉદ ઇબ્રાહિમના નજીકના સાગરિત ગણાતા આંતરરાષ્ટ્રીય ડ્રગ ટ્રાફિકર સલીમ ડોલા સાથે જોડાયેલા મની લોન્ડરિંગ કેસમાં એન્ફોર્સમેન્ટ ડિરેક્ટોરેટ (ED)એ મહારાષ્ટ્ર અને ગુજરાતમાં વ્યાપક દરોડા પાડ્યા છે. મુંબઈ ઉપરાંત સુરત, રાજકોટ અને અંકલેશ્વર સહિત અનેક સ્થળોએ તપાસ હાથ ધરવામાં આવી છે.

ગુજરાત અને મહારાષ્ટ્રમાં 20 સ્થળોએ તપાસ

સૂત્રોના જણાવ્યા અનુસાર, પ્રિવેન્શન ઓફ મની લોન્ડરિંગ એક્ટ (PMLA) હેઠળ નોંધાયેલા કેસના અનુસંધાને આશરે 20 સ્થળોએ સર્ચ ઓપરેશન ચલાવવામાં આવ્યું હતું. તપાસનો મુખ્ય હેતુ ડ્રગ્સના ગેરકાયદેસર ધંધાથી મેળવાયેલા નાણાં અને તેના નેટવર્કની કડીઓ સુધી પહોંચવાનો છે.

તુર્કીથી ભારત લાવવામાં આવ્યો હતો સલીમ ડોલા

સલીમ ઇસ્માઇલ ડોલા, જેને આંતરરાષ્ટ્રીય સ્તરે ડ્રગ ટ્રાફિકિંગના મોટા ચહેરા તરીકે ઓળખવામાં આવે છે. તેને 2024માં ઇન્ટરપોલની રેડ કોર્નર નોટિસના આધારે તુર્કીમાંથી ઝડપી લેવામાં આવ્યો હતો. બાદમાં ભારત સરકારના પ્રયાસોથી તેને એપ્રિલ-2026માં ભારત લાવવામાં આવ્યો હતો.

રસાયણ સપ્લાયરોથી લઈને હવાલા ઓપરેટરો સુધી તપાસ

EDની કાર્યવાહી દરમિયાન મેફેડ્રોન સહિતના સિન્થેટિક ડ્રગ્સના ઉત્પાદન માટે જરૂરી રસાયણો સપ્લાય કરનારા લોકો, ડ્રગ્સના વચેટિયા, વિતરણકર્તાઓ, હવાલા ઓપરેટરો અને ગેરકાયદે કમાણીથી ખરીદાયેલી બેનામી મિલકતો સાથે સંકળાયેલા લોકોના સ્થળો પર તપાસ કરવામાં આવી રહી છે.

મેફેડ્રોનના ગેરકાયદે ધંધામાં મોટું નામ

તપાસ એજન્સીઓના જણાવ્યા મુજબ, સલીમ ડોલા બે દાયકાથી મધ્યપૂર્વ, આફ્રિકા અને યુરોપ સુધી ફેલાયેલા ડ્રગ નેટવર્ક સાથે સંકળાયેલો રહ્યો છે. હેરોઈન, ચરસ, મેફેડ્રોન અને અન્ય નશીલા પદાર્થોના મોટા કન્સાઈનમેન્ટ્સ સાથે તેનું નામ જોડાતું રહ્યું છે. ડ્રગ્સ જગતમાં તેને ‘મેફેડ્રોન કિંગ’ તરીકે પણ ઓળખવામાં આવે છે.

તુર્કીમાં નામ બદલી નાગરિકતા મેળવવાની તૈયારી

તપાસ દરમિયાન જાણવા મળ્યું છે કે સલીમ ડોલા તુર્કીમાં ‘હમઝા’ અને ‘અબ્દુલ’ જેવા ઉપનામોથી રહેતો હતો. ત્યાં સ્થાવર મિલકતો ખરીદીને નાગરિકતા મેળવવાનો પણ તેનો પ્રયાસ હતો. આ સમગ્ર નેટવર્કને વધુ મજબૂત બનાવવા માટે તે વિદેશમાં પોતાની હાજરી વિસ્તારી રહ્યો હતો.

સલીમના પુત્રની પણ થઈ હતી ધરપકડ

સલીમ ડોલાના પ્રત્યાર્પણ બાદ મુંબઈ પોલીસે તેના પુત્ર માહિલ સલીમ ડોલા અને અન્ય એક સહયોગીની પણ ધરપકડ કરી હતી. તપાસ એજન્સીઓ હવે ડ્રગ્સના આંતરરાષ્ટ્રીય નેટવર્ક, નાણાકીય વ્યવહારો અને સ્થાનિક કનેક્શનની ઊંડાણપૂર્વક તપાસ કરી રહી છે.